Uudhano woongonyo mokudhimbulukwa esiku lyemanguluko

0
181

WINDHOEK – MTC Nestor ‘Sunshine’ Tobias Boxing & Fitness Academy otaka kala melongekidho okunyanyudha aakwashigwana sho tayi keya etela uudhano woongonyo momasiku 5 ga Apilili nuumvo.

Muudhano mbuka otamu ka kala omudhengingonyo omunene, Immanuel  Prince’ Naidjala ta ka kondjela oshishani shondjundo yo Bantmweight yehangano lyo, World Boxing Organization (WBO) Africa shoka shaana mwene. Naidjala ota ka kondja nomukondjithi gwe a za koTanzania, Francis Miyeyusho. Ehala mpoka tapa ka dhanenwa uudhano mbuka inali tseyika manga.

Naidjala okwa li a kanitha epapa lye lyobantamweight  lyolutu lwoongonyo lwoWBO Africa naashoka  sholutu lwoongonyo lwoInternational Boxing Federation (IBF) sho a kanitha olugodhi moka a li a kondjitha omudhengingonyo omuJapani,Tomoki Kameda omumvo gwayi.

Ngashingeyi Naidjala okwa ti okudhengwa kwe ku Kameda okwe mu nkondopaleke noshowo okwe mu longo oondunge, na okwa uvaneke kutya ota ka longa nuudhiginini opo  a galuleko oshishani she shika noku yanda opo shika shaa ninge shomukondjthi gwe omuTanzania.

Naidjala okwa kondja omalugodhi 19 mwaangoka a sindana omalugodhi 17 a kanitha mo olugodhi lumwe ye ta kondjo shithike pamwe molukwawo. Omukondjithi gwe gwoko Tanzania, Miyeyusho okwa kondja omalugodhi 49 a dhengwa omalugodhi 10, asindana omalugodhi 37 na okwa dhana shi thike pamwe momalugodhi gaali.

Aadhengingonyo yalwe mboka taya ka kondja esiku ndyoka oya kwatelamo, Nathanael Kamati ngoka ta ka kondjitha , Kebonyethebe Ramaboana omuBotswana molugodhi lwondjundo yo Super Bantamweight. Olugodhi nduka otalu ka kondjwa momadhingoloko ga 6. Kamati okwa kondja omalugodhi gane naangoka agehe okwe ga sindanapo. Omanga omukondjithi gwe okwa kondja omalugodhi gaali a sindana mulimwe yeta dhengwa molugodhi olukwawo.

KuOtniel Hembapu

LEAVE A REPLY

Please enter your comment!
Please enter your name here