Egumbo lyomapenda, Kuiseb lye etelwa omalunduluko

0
179

KuEveline de Klerk

 

WALVIS BAY – Oshilando shaMbaye osha lunduluka oku udha no sha ningi shimwe shomwaambyoka iiwanawa moshilongo, shimwe shomiilando mbyoka tayi dhana onkandangala momahupilo gevi lyomapenda. Nondando oku galukila kwasho miikaha yooyene yasho aaNamibia okwa pula omazigudhe nepupyu, okushi nakulamo miikaha yepangelo lyokatongotongo  omimvo omilongo mbali dha ka londongela.

Nena omuntu oto dhimbulukwa ashike etopolo lyoshilando pethimbo lyokukondjitha epangelo lyokatongo, kwaamboka ya li mekondjo ndika opo oshilando shika shi galukile kuNambia, naashika sho shaningwa mesiku lyo 1Maalitsa 1994.

Ehumokomeho olye etwa kolukanda lwa Kuisebmund , ehala ndyoka kwali kwa tidhilwa aaluudhe aaNamibia okuza kolukanda olukulu ndoka luli mokati kondoolopa nenge pehala mpoka hapa ithanwa opokati kOmbaye nena.

Kuisebmond sigo onena okuna omidhi dhomapenda omalumentu nomakiintu noongundja dhopapolitika ngaashi oonakusa Nathaniel Maxuilili,  Saul /Hanabeb, Adelheid Gontes na Jack Brown oku tumbulapo ashike yamwepo mboka ya li aakomeho mekondjelomanguluko lyaNamibia noshowo lyegalulilo lyOmbaye koNamibia okuza miikaha ya South Africa lyokatongo.

Ngaka ogo omadhimbuluko gomukalimo gwaMbaye, King Mandume Muatunga ngoka wo ali a  kuthombinga onene miiningwanima mbyoka ya fala sigo opegalukilo lyOmbaye koNamibia omumvo 1994.

“Omuntu oto vulu okutya otwa kombamo omathegela agehe gepangelo lyokatongo naashoka sha thigalapo osha pumbiwa oku kalekwapo okupungulilwa omapipi gokomeho okuga dhimbulutha mpoka twa za, nonkene onakuziwa ya li ondhigu naashoka  twa li twa kondjo konima yomimvo 20 dha piti po,” Mwatunga a ti.

Mokudhimbulukwa ekondjo okugalulila Ombaye koNamibia, Mwatunga okwa ti oshilando shika osha li sha topolwa miitopolwa itatu.

“Dhiladhila nokutya otwa li tuna omalelo goomuni geli gatatu kokutya limwe olyoombasitela moNarraville, limwe olyaaluudhe mo Kuisbemund nekwawo olyiilumbu mondoolopa.

Omathimbo ngoka owa li wuna okufuta omayakulo goye gaandjamuni moKuisebmund ngele ngoye ogwaamoka.

Osho oshilando sha li sha topoka ngaaka. Ihe nena ito dhimbulula po we sha kutya monakuziwa omwa li omatopoko gatya ngaaka unene mokati kaakalimo yomoshilando shika.

Otwa longa shili oshilonga shasimana kombinga yokugalulila Ombaye koNamibia moombinga adhihe, kutya opamahupilo, noshowo pankalathano.

Onkene ngashingeyi omandhindhiliko gokatongotongo ito monopo nando olimwe limwe,”osho a fatulula.

Okwa ti olukanda lwa  Kuisebmond ndoka lwali luna ashike oosikola ndatu, ondjila yimwe yatulwa oteya noshowo omagumbo ashike taga yalulwa, olwa nenepala ngashingeyi.

Omimvo omilongo mbali dha yi omagumbo muka oga li owala omashona , ndele ngashingeyi otatu tungu notwa tsikila okutunga , konyala opate kehe oya tulwa oteya naandjoka yaana oteya oya silwa oshimpwiyu nawa.

Omayakulo oga etwa popepi naantu. Ngaashi otuna osasiona mbali dhopolisi moKuisebmund noshowo ooklinika mbali.

“Onkene shika otashi ulike kutya  iilando nOmbaye yoyene oya lunduluka shuudha,’Mwatunga a ti.

Okwa gwedhako a ti nando opena natango omashongo ngashi okugandja omagumbo, oku kondjitha onkalo yokwaana iilonga.

Oshina okudhimbulukiwa kutya Ombaye oya li oshilongo shoka hashi gandja iilonga nenge sha li onzo yiilonga onene,”.

“Otwa ndhindhilike nkene oshilando shika sha ende tashi koko monakuziwa na otandi ku kwashilipaleke kutya shika otashi tsikile nokukoka.

Onkene omuntu owa pumbwa oku longitha ompito kehe yopangeshefa ta yi ya kungoye okushitalela meyokomeho ndika tali ningwa moshilando,’.

Omukalimo gumwe mOmbaye ye okuli omukondjelimanguluko omunamimvo 66 Saul /Hanabeb , okwa ti aagundjuka yonena oye na okudhimbulukwa kutya okukondjela egalukilo lyOmbaye koNamibia osha li oshilonga oshidhigu noshilulu.”Onkene oshinakugwanithwa ngashingeyi shawo opo ya kwatekomeho nokufala oshilando shika pondondo ya dhenga pombanda mehumokomeho,” osho ati.

Elaine Kharuxas omunamimvo 29  okwa ti nando ita dhimbulukwa naanaa kombinga yegalukilo lyOmbaye koNamibia, ota dhimbulukwa nkene yinakulu a li a nyanyukwa  sho Ombaye ya galukile koNamibia. Kandali nde shi tseya ndele ondi shishi kutya osha li shina okukala oshiwanawa unene kutse mbaka mboka tuli aakalimo yomoKuisebmund.Nonando kandali ndishi uviteko nale ngashingeyi ondi shi uvite lela na onda nyanyukwa sho aakuluntu yetu ya kondjele emanguluko lyetu noshowo egalukilo lyOmbaye ku Namibia.

LEAVE A REPLY

Please enter your comment!
Please enter your name here