Enyakwa lyuudhano worugby lya sindana

0
161

KuOtniel Hembapu

 

WINDHOEK – Enyakwa lyuudhano worugby lya Namibia, Western Suburbs olya galukile ishewe mokusindana sho lyo lya dhengemo ospana yorugby yaUnam nookoola 41-16 pokapale ka Suburbs Park Stadium Olyomakaya ga ziko.

Ospana ndjika oya sindana uudhano mbuka konima sho oshiwike sha zileko ya li ya dhengwa kospana ya Rehoboth nookoola 21-17, petameko lyuudhano mbuka oshikako shika. Suburbs oya longitha ompito yayo okudhanena megumbo nokudhengamo ndjoka yoko Unam nongeyi oya koleke ompito yayo oku gamena epapa lyayo lyuunyakwa woliha yorugby ya Namibia ishewe nuumvo.

Ospana yo Suburbs oya tsuwa omukumo kaayambidhidhi yayo mboka ya li ya holoka pokapale kayo Olyomakaya ndjoka yeli mombepo ombwaanawa yenyanyu, naashika oshe yi hwameke opo yaa dhanithe nando ompito yayo okusindana, sho ya tameke uudhano mokuponokela ospana ndjoka yoUnam iikando oyindji.

Ospana ya Suburbs oya kala ya ngungumana noku tsikila tayi dhana nawa aadhani taya paathana omatanga nawa naashika oshe yi kaleke oyo tayi pangele muudhano mbuka medhingoloko lyotango moka ya tulamo ookoola 20-9  omanga uudhano inaa wu ya pokafudho.

Edhingoloko etiyali ospana ndjika yili enyakwa muudhano worugby oyo natango ya tsikile okudhana nawa ngaashi ashike yali tayi dhana medhingoloko lyotango, naashika oshe yi pe ompito oku gwedhako kiitsa yayo.Oya dhana nokugamena ombinga yayo nongeyi oya imbi ospana yaUnam opo yi tulemo ookoola andola dha gwedhwako. Okuuka pehulilo lyedhingoloko etiyali Suburbs okwa dhana nelongekidho ewanawa miitopolwa ayihe yospana, okuyeleka nuudhano mboka a dhanene nospana yokoRehoboth. Suburbs okwa dhana nokutulamo ookoola 41 -16  ndhoka odho dha kala koshipelende shiitsa osigo uudhano wa hulu.

Muudhano wulwe wa dhanwa palwe moshilongo, ospana yoReho Falcon oya dhana woo nawa sho ye shipondola okudhengamo ndjoka yo Polytech nookoola 35-16, omanga ospana yo Wanderers ya dhengwamo kwaandjoka yo United nookola 12-19 muudhano wa li wa dhanwa konyala shi thike pamwe  Olyomakaya gayi  moVenduka. Komunkulofuta kOmbaye ospana yaMbaye oya dhana nomukumo nonehwamo na oya yanda okudhengwa komukondjithi gwayo gwomoshilando osho tuu shoka, Dolphins. Oospana ndhika odha dhana ookoola 38-19, naashika osha tula ospana yaMbaye pomuthika omwaanawa sho yuuka medhingoloko lyahugunina moliha yuudhano wo rugby moshilongo.

LEAVE A REPLY

Please enter your comment!
Please enter your name here