Fiyo onena ohema oyo a li a djala fiku letopo loboma mombaanga yaShakati oku i na

0
307
Simeoni Kamati nomukulukadhi gwe Julia

 Komutoolinghundana

 

ONGWEDIVA – Omunamido 57 Simeon Valombweleni Kamati, odalele yokOmafa aKalipi moshitukulwa sha Ohangwena, oumwe wooluxupe moshiponga shetopo loboma i nyanyalifa mombaanga yotete yopashiwana mOshakati muFebuluali 19, 1988.

Meenghundafana noshifo Kundana, Kamati okwa hokolola kutya  oboma oya topa koshivelo kwa li ku yadi ongudu yovayakulwa novanailonga mombaanga.

“Ondali nda ka tala sha koshikololo shombaanga nonda uda omungungumo, kwaau u li popepi kawa kula.

Onde li haluka ndi li momulaulu nonda uda ewi lomunhu ta ti, yuka oku, i tu pitile oku, omanga nda li moshiwiwili.

Nani, onda dja mo noluwewe la fotokela, meendelelo onda twalwa koshitandelo moshipangelo shaShakati”, Kamati ta hokolola kutya omutwe waye owa li wa dinda nai kuhe shiivike ngee nomesho omo e li.

Konima yomafiku avali ,natango okwa tuminwa vali meendelelo koCentral Hospital koWindhoek oko a hangwa nombudu yoitenda momesho, a pya komapepe, keenyala nokoshipala.

Omukulukadi waye Julia oo va hombola  mo1986, okwa hangwa nohanana yoshiveli shokamati keemwedi mbali.

Meenghundafana noshifo Kundana ota ti:

“Onda li nda haluka nai, nokaana onde ka dimbwa fiku olo. Oule weemwedi hamano okudja moshiponga onda kala noku mu kwata kemango e he wete ko.

Konima yetando lomesho okwa mona ko xwepo, nokwa tandwa vali kominwe omuulikwa na shiduledikwao kolumosho”.

Kamati  mwene a hokolola vali kutya:

“Eshi nda shuna moilonga pexulilo lomudo oo, onda longa noudjuu shaashi pefimbo linya kakwa li evalulo loufemba womunhu.

Molwa oudjuu ou onda fiya po oilonga yombaanga momudo 1989.

Onghee 1994 onda ka tameka oulongi woBETD mOngwediva”.

Kamati xe yovamati vatatu nokakadona, nande paife iha mono ko naanaa nawa, e na nomukolo ihau oka, mo1997 okwa tameka oku longa pOshakati Combined School mOshakati oule weedula donhumba, nopaife ota longo ofikola moshikandjolongo shaMuthiya moshitukulwa shaShikoto.

Metopo loboma yomoFirst National Bank mOshakati ya telwa fiku lekwato lovahongi novapangi va li ve yadi mo, omwa fila ovanhu 27.

Oonakufya vahapu moshiponga omo, ova pakwa mombila imwe momaendo eongalo laNgwediva nande vamwe va pakwa komaongalo avo. Nande vahapu va xupa moshiponga eshi alushe tava hambelele eshi va mona emanguluko laNamibia, natango ove udite va pumbwa ku hekelekwa nande itava futwa.

Vamwe ova enda tava fi eshi va kwatwa komaunghundi, sha li sha tilifa yoo Kamati pefimbo linya.

Oshiningwanima eshi sha ningwa konima yeedula 26 paife nefiku eli ohali dimbulukiwa nomailikano nomahambelelo pomhile ei mOshakati penya pa tungwa eembelewa doifendela yoyuuye mo konima yeedula 24  oshilongo sha manguluka, Kamati natango oha di omaxwilili noha pandula Kalunga ou e mu xupifa moshiponga shi tilifa pamwe nooluxupe ovanailonga pamwe naye novayakulwa mombaanga. Onghee okwa diinina ohema yaye oyo a hangelwe a djala efiku loshiponga

LEAVE A REPLY

Please enter your comment!
Please enter your name here