Jaarman oye enyakwa mondjundo yoNational Welterweight

0
168

KuOtniel Hembapu

 

WINDHOEK – Enyakwa epe mondjundo National Welterweight , Anthony Jaarman okwa kondjo olugodhi lwe olwaanawa sho eshipondola okudhenga mo omukondjithi gwe hadhenge oongonyo dha kukuta, Pohamba Mr President Mandume. Jaarman okwa sindana olugodhi nduka lwa li lwa dhanenwa po Windhoek Country Club Resort & Casino mOlyomakaya ga zi ko.

Jaarman na Mandume  oyo ya kondjo molugodhi olunene lwongulohi ndjoka, moka Jaarman a tameke iiponokela ya geya mokudhenga kolutu lwomukondjithi gwe nuukeka, ye ta nukile kokule opo a yande oongonyo oonene noondhigu dha Mandume omumati gwoshipapa sholutu.

Nonando Mandume omudhengingonyo hadhenge noonkondo, omumati gwokashendjelutu Jaarman okwe mu henuka ngokaandje, nokwa kala te mu dhenge oongonyo tadhi kwata lela komutse noshowo molutu, naashika okwe shi ningi ye ta nukile kokule omanga Mandume inaa ponoka opo e mu dhenge.

Oku fadhukapo noku henuka kwa Jaarman huka okwa ningile Mandume okudhigu opo andola a dhenge nando oyo ongonyo yimwe yili nawa muudhano mbuka.

Mandume okwa kambadhala opo a dhenge omukondjithi gwe nawa  noongonyo dhomolutu, ndhoka omathimbo gamwe dha thiminike nguka opo a shune monima, ndele nando ongaaka , Jaarman oye a li ta dhenge oongonyo odhindji, poompito odhindji  a li ashike ta hogolola kutya okwa hala okudhenga Mandume pehala lini.

Medhingoloko etiheyali Mandume okwa li a holoka a piyagana sho inaa vula nando okudhenga ongonyo yimwe ya kwata omukondjithi gwe, nolundji okwa holoka a fa omudanisi uuvite nayi no kwa li moshiponga sho ku dhengwa noonkondo ngele iniigamena.

Medhingoloko eti  8 neti 9, Jaarman okwa tsikile nokudhenga Mandume ta hogolola mpoka a hala okudhenga, omanga Mandume, aatali yuudhano ya li ya tegelela natango opo a ulike kutya ye ohadhenge oongonyo dha kola ngaashi shi shiwike.

Mandume okwa tsikile ta ende okaendanampadhi mokudhenga oongonyo okuya medhingoloko etimulongo nalimwe, sha fa ashike kutya okwa li a hala okumona ompito yokudhenga ongonyo yimwe yOmosoondaha, osha li sha fa a tegelela sigo Osoondaha opo a gandje yimwe nopevi, unene tuu sho okuuka pehulilo lyedhingoloko ndyoka ye a umbu oongonyo odhindji.

Konyala Jaarman okwa li ewete kutya olugodhi okwe lu sindana onkene okwa tsikile okudhenga Mandume noshiyakela ye ta fadhukapo, omanga Mandume okwa tsikile okuumba oongonyo tadhi palutha unene mokuuva nayi sho ndhoka tadhi kwata ashike ombepo ndele halutu lwa Jaarman.Okuuva nayi kwe okwa hololwa wo koshipala she.

Mandume okwa sizimike omutse gwe pethimbo tashuna kokoona ye pehulilo lyedhingoloko lya hugunina lyolugodhi, omanga Jaarman okwa li ti imemeha okuza kekutsi limwe oku ya ke kwawo oshoka okwa li eshishi kutya olugodhi ndoka oye e lu sindanapo.

Momalugodhi gamwe ngoka ga kondjwa omanga ndoka lwongulohi inaalu adha,  Kennedy Kamati okwa dhengemo Verde Ndayambekwa niitsa momadhingoloko gahamano,Paulus Petrus ta sindi Lukas Mukete niitsa wo, ye Gabriel Imalwa okwa sindana wo niitsa kombanda yomukondjithi gwe Uukelo Christian momalugodhi agehe gomondjundo ompu ga kondjwa momadhingoloko gahamano kehe limwe.

Momalugodhi gondjundo yo featherweight, Eric Kalenga okwa dhenge Mathew Kaandala niitsa, Sebby Sheuyange okwa dhengemo  Johannes Ishono medhingoloko lyotango ongonyo yimwe nopevi. Molugodhi lwa hugunina mondjundo ndjika George Iita okwa sindana wo niitsa sho a dhengemo Peter Philipus. Molugodhi olwo aluke lwondjundo yoBantamweight, Celestinus Haingura okwa dhengemo Nangunda Dorian niitsa.

LEAVE A REPLY

Please enter your comment!
Please enter your name here