Meekulu Hilja gaAngala e tu fiya po

0
262

Komutoolinghundana 

 

Omukalimo womIikokola  moshikandjohoololo shaTsandi mUukwaluudhi moshitukulwa shaMusati a xulifa mepipi leedula 94. Meekulu Hilja  Mbute yaAmakali gaAngala okwa dalelwa mOlukulo 1920/01/01,okwa putukila mOndjeke omukunda u li mUukwaluudhi.

Okwa  hombolwa pamufyuululwakalo komuhomboli waye Nangolo Kapolo, naashi a ka shashwa mo1962, meshasho ova ya mo pamwe novanamati vavali ovo pefimbo opo ve li koshi yomido hetatu. Mohombo ya yapulwa paukriste meedula do1990 okwa kala mo eedula 60.

Konima yefyo lomushamane waye, okwa kala momwenyo eedula 13  nokwa xulifila momukunda Onakatse muMaalisa 06,2014.

ElongeloKalunga loshivilo pako ola ningilwa mongeleka yaNangalo mUukwaluudhi Maalisa 14,2014 nepako omOnangalo.

Mokupopifa ovalilanghali nokuva hokololela onghalamwenyo ya ina,   omufita omundokotola Tshapaka Kapolo,  okwa tumbula nghee omudali wovamati omuwoi nokakadona koshiveli ka xulifa pefimbo louhanana ta ti, okwa li omudali omunashisho , omuhanganifi, omutungaumbo, e na efimaneko kwaaveshe, omunashili nomunahole.

Okwa tekula noku udifila oludalo eshito lounjuni, a kala omuyandji mayele moivilotauluko yopamufyuululwakalo momukunda nomomudingonoko wavo.

Mokati kovana omulongo a eta kombada yedu, okwa fiya po ashike ovana ovalumenhu vavali, omufita Tshapaka Kapolo nondenge yonghelo.

Okwa fiya ko ovatekulu 15, novatekululwa vahetatu.

Okwa kuna ombuto youkriste meumbo nomomukunda oshoyo meongalo nomoshitukulwa. Pefimbo lekondjelomanguluko okwa yakula ovakwaita voSWAPO  peemhito dihapu a makela oululu wokudengwa kovakwaita vaSouth Africa.

Kakele kovahekeleki novatumi vomatumwalaka omahekeleko, oshivilo sha li shi yadi ovahekeleki, mokati kavo omwa li ongudu yovafitaongalo , nova yakula yo omatumwalaka a dja kepangelo oshoyo keembinga neembinga. Omwenyo wameekulu gwaAngala nau tulumukwe nombili.

LEAVE A REPLY

Please enter your comment!
Please enter your name here