Omuwiliki gwewawa lyaagundjuka moSwapo a kundathana naagundjuka kombinga yomahepeko

0
279

Komutoolinkundana

 

OKAU-KAMASHESHE- Oshilyo shongundumutima yewawa lyaagundjuka yo Swapo  (SPYL), Indileni Set Sam Iipinge okwa indile aagundjuka ya yande okulongitha ekuni ngele omakwatathano gawo gopahole oga adha ekwena lyahula.

Iipinge eindilo ndika okwe li ningi pethimbo a popitha aagundjuka yopomukunda gwawo ongo oshinakugwanithwa she shoku kweenda egumbo negumbo noshowo omukunda nomukunda oku popya naagundjuka kombinga ye indjipalo lyomadhipago gakaanahenda taga ningilwa unene aakiintu naanona.

Iipinge ota talelepo omagumbo nomikunda palombwelo lyaamushangandjayi  gwo SPYL, Elijah Ngurare ngoka a tumu iilyo yongundumutima konima sho ewawa ndika lya li lya tokola opo aagundjuka ya kundathanwe nayo oku ngambeka omadhipago gaakiintu.

Iipinge, okwa popitha tango aagaundjuka yaandjawo pOkau Kamasheshe Olyomakaya ga yi pethimbo lyoshigongi shoshitayi shaSPYL, mpoka a ti.

“Katuna esiku twa uvile omadhipago guusatana  momukunda gwetu omanga twa li aanona.Aakuluntu yetu kayena esiku ya longele iilonga yatya ngaaka,omolwashike wa hala okushi longa nena? Aakokoli yomukunda nguka oya kondjo nuupenda mokulwitha epangelo lyokatongo opo omukiintu kehe nomulumentu kehe eende memanguluko muka noshowo palwe moNamibia ya manguluka. Oya gandjapo omimvo dhuugundjuka wawo omolwetu, opo tse tu longithe omake getu niikaha yetu oku tunga Namibia noku humitha komeho uuthiga wokulonga nuudhiginini, ndele ha ku longitha omake getu okulonga iilonga iiwinayi.”

“Namibia olyetweni aakadhona naamati. Okudhipaga okwa indikwa pambepo nopakotampango.

Oomwele niimbele oyo ku teta onyama, omakatana ogo ku teta iiti.Oshoshili iilongitho mbika inayi nuninwa okulongithwa mokuteta nenge okutsa nayo aantu. Yalumentu inatu ehamekeni aamwamemekadhona noomeme. Ishewe kuume koye mohole omukadhona oye ashike omumwanyokokadhona. Keshi oshikombo nenge ongombe ndjoka nenge shoka hatu dhipaga opo tu lye. Ngele ku mu hole we, mu etha nombili, oshoka opena gumwe emu pumbwa noshikwawo oshigwana oshe mu pumbwa.

Utya oyana naatekulu oye mu pumbwa. Ndhindhilika kapena onakuyiwa pwaana omukiintu.Opena aakadhona oyendji moshilongo ngele nguno wuna ito mu idhidhimikile we, talamo ishewe.”

Ngele otwa dhipaga aakiintu olye te tu longekidhile iikulya nuulalelo uuna tweya kegumbo kwa toka konima yesiku elel lyiilonga.

Olye te tu sile oshimpwiyu? Olye taka vala nokweetapo oshigwana oshipe nenge okutaneka oshigwana? Otashi vulika etompelo sho oshigwana shetu itaashi koko omolwashoka otatu dhipagathana. Ngele itatu tindi okulongitha oonkondo unene tuu twe dhi ukitha maakiintu , opena ompito opo oshilongo shetu shikale shaana aakiintu, oshoka mbaka otaya ka hokanwapo kaalumentu yoshili mboka ihaa ya dhipaga aakiintu palwe muuyuni.

Tu thikameni nokupopya newi limwe tat u tindi ehepeko lyaakiintu, tat u tindi okulongitha iinima ya honga oku yi tsitha aantu ooyakwetu, tatu tindi okulongitha sha pitilila omalovu ngoka uuna twega pitililitha ogo hage tu pangele. Ndhindhilika okudhipaga hako ekandulepo lyomukundu shila ohaku eta ashike uupyakadhi owindji. Gandja uupyakadhi nonkalo yoye ku Kalunga.Omushiti gwetu oye etu shita nokushishi shoka hashi tu adha esiku kehe. Omasiku ngaka aagundjuka iha ya yi kOngeleka komalongelo Kalunga.

Onawa mu kale hamu yi komambo kegongalo lya Shitowa ndyoka lili ashike popepi oshinano shookilometa mbali okuza mpa. Ihe ngele owa yi kegongalo ndyoka Osoondaha mboka to adha mongeleka oyo ashike  aanoona, aakadhona naakuluntu . Aagundjuka aalumentu omuli peni.

Oyendji oya lala, aashona ngiika oye li kiilonga naamboka ya hupako otaya longitha nayi omalovu. Otandi mu indile alikana mu kale noku ya komambo konyala lwaali momwedhi ngele nani ha Soondaha kehe,’ osho a indile.

Mu Juli 2012  Okau Kamasheshe oka kundana onkundana yinyanyalitha sho omukiintu gwomimvo 23 Basilia Shikongo a dhipagwa ku Adolf Martin ngoka a ti aniwa okwa li omuholike gwe. Nguka ota pangulwa sho taku tiwa oye emudhupaga.

Aawiliki yaSPYL  otaya kumagidha woo aakadhona opo ya kale nakuume komumati gumwe yo ayehe ya yande okweendululathana mekwatathano lyawo lyopahole.

Okwa kumike aagundjuka ya konge ekwatho lyehungomwenyo kaawiliki yomagongalo, kaakuluntu mezimo nenge kookuume aainekelwa, uuna yena omashongo ta geya gwililepo.

LEAVE A REPLY

Please enter your comment!
Please enter your name here