WHERE OTHERS WAVERED – Omutumba gwa simana gwIigwana Hangano

0
208

Omumvo 1960 ogwa li omumvo gwa simana molwa Oshigongi shAayehe shIigwana Hangano, moka ngame naakondjelimanguluko ooyakwetu twali twa pewa ompito okuholoka komeho gokomittee ontine yOshigongi Shaayehe. Pethimbo lyomutumba gwAayehe omumvo ngoka omo moka Fidel Castro ngoka aadhika opo a kwatele komeho orevolusie moCuba omumvo 1959 a ningi oshipopiwa shootundi ntano itaa lesha no inaa endulula nando oshimwe shomomatumbulo ngoka aadhika a tumbula nale. Moshigongi shika omo wo Omuprima Minista gwa Britania, Harold Macmillan a endulula oshipopiwa she kombinga yelunduluko lyombepo shoka a li a popi lwotango moKapa petameko lyomumvo ngoka. Ye amushangandjayi gwongundu yUukomunisi ya Soviet Uniona, Nikita Khrushchev okwa dhenge koshitaafula nongaku ye a geela uuimperiale nuukoloni. Osha li oshigongi shAayehe shopandjokonona shoka wo sha yalula nokukoleka uuthemba  waantu niilongo oku kala yamanguluka noshowo oku kala yiithikamena yoyene okuza muukoloni. Oshigongi shika osha koleke okatokolitho kOshigongi shAayehe okati 1514 hoka kali ka simana moku yambidhidha aantu mboka taya thindilwa kongudhi muuyuni auhe.

Okugandja omaiyuvo getu nomahalo getu kIigwana Hangano  unene kOshigongi Shaayehe okwa li taku yambidhidhwa kOmukwaniilwa Hosea Kutako okuza meni lya South West Africa. Ye okwa li nale a lopota oonkatu ndhoka dha katukwa koombulu kombinga yandje noshowo koohailwa yalwe edhi lopota kuAmushangandjayi gwIigwana Hangano.Okwa li wo a tumu ombilive yeeguluka eyi nyolele momasiku 10 Maalitsa 1960 eyi shangele Omukwaniilwa Baudouin gwa Belgia, Omuprima Minista gwa Britania, Harold Macmillan noshowo Omuperesidende gwa France, Charles de Gaulle. Mundjoka okwa li a dhimbulutha mbaka kutya yo oya mangulula iilongo mbyoka yo ya li ya kolonyeka onkene naya pulakene onkugo yaantu ya South West Africa.

“ Konima yomimvo 41 oshilongo tashi lelwa ongo omandaata nenge oshilongo kohi yewiliko lyeinekelo, katuna nando osikola yimwe yoseko ya tungilwa aakwashigwana yomwaalu ogundji. Uuna aaEuropa ya haluka evi lyetu ohatu lombwelwa tu zepo pulyo. Katuna egameno lyasha, katuna etegameno na katuna onakuyiwa. Nenge ndika olyo elalakano ndyoka iilongo iinene opamwe naambyoka tayi longele kumwe nayo ya li ya dhila dhila mokweetapo oshinakugwanithwa sheinekelo, moka aavalelwamo yena oku kwathelwa opo ya vule oku ithikamena yoyene. Otatu indile komapangelo giilongo yeni opo ga thikame moshili yomadhiladhilo ngoka, ga thiminike iilongo yeni opo yi etepo omalunduluko miilongo iikolonyekwa muAfrica. Tse natse otuli wo oshinakugwanithwa sheni,”.

Mu Maalitsa 1960 ewilikongundu lya OPO olya tumine wo omushangwahokololo guudhapo kuAmushangandjayi gwoUN tagu hokolola oonkatu dhethindilo kongudhi ndhoka  dha ningwa kepangelo lyokatongotongo lya South Africa moshitopolwa shUukwaluudhi moka Blignaut a ulike Elenga nenge Omukwaniilwa ngoka a gama koombulu , pehala lyOmukwaniilwa Mwaala ngoka a li ihaatsu kumwe nomulandu gwoombulu gwokatongotongo.Momushangwa moka oya li wo ya hokolola nkene aantu ya monithwa iihuna konima yomakuyunguto gomomasiku 10 Desemba 1959 moVenduka, unene tuu shoka sha ningilwa Nathaniel Mbaeva, Jacob Kuhangua nangame atuhe mboka twali twa pewa oombapila dhoku tidhwa mOvenduka okushunwa komavigumbo hoka twa za. Konima aantu yethike pethele limwe oya li yatidhwa moshitopolwa sha Venduka. Ndjika oya li oveta yethindilo kongudhi ndjoka ya longithwa oku tidha aantu moVenduka nuuna mboka ya tidhwamo otaya kala yaana we uuthemba wo ku galukilamo unene tuu aaludhe. Oya hokolola wo kutya aagandji yiilonga aatiligane oya tidha aaniilonga yawo noku ya tidhila komavigumbo hoka yaza.

Omushangwahokololo gwa Hosea Kutako gwomu Maalitsa 1960 ngoka a tumine kIigwana Hangano nagwo ogwa li gwa popi kombinga yonkalo ombwinayi yuukolokoshi ndjoka ya longelwa  aaniilonga yokondalaka yAawambo, oshowo ogwa nyola kombinga yetidho lyaantu moVenduka nokutidhilwa ko Rehoboth omanga omupangi Putuse Ntshona ngoka  konima a ka tseyika Putuse Appolus okwa shunithwa koSouth Africa. Nguka okwa li omupangi moshipangelo mOvenduka . Konima okwa ka joina Swapo muundjendi na okwa li oshilyo oshikokoli shewawa lyaakiintu moSwapo na okwa li woo gumwe gwaatotipo yehangano lya Pan African Women’s Organisation.

Uuyelele mboka OPO a tumine kIigwana Hangano owa li tawu popi konkalo yoshili moSouth West Africa na owa li woo tawu hokolola kombinga yiifundja mbyoka epangelo lyokatongo lya kala ta li hokolola, unene tuu ya gandja oshiholelwa shomupangeli gwedhina J G van der Wath ngoka ali aniwa afutu aaniilonga ye oorand omulongo adhike ongo ondjambi yawo konima yoku mu longela oomwedhi 18, na okwa li he ya pe aniwa orata yimwe yuusila wepungu kehe oshiwike.

Sho ongundu yoSWAPO ya dhikwapo momasiku 19 Apilili 1960 ngame onda hogolololwa ongo omuperesidende gwayo ndaapo, yo o Swapo tayi tsikile oku tumina omanyenyeto gayo koUN tayi indile opo epangelo lyomukolonyeki South Africa molupe lwo Uniona li gandje South West Africa miikaha yoUN. Ongundu oya li woo ya indile opo oUN yi tumine ongundu yokukonakona koSouth West Africa oku ka konakona oshinima shomadhipago gaantu yaana ondjo momasiku 10 Desemba 1959, noshowo oku ka konakona oku kuthwa kwaantu pomahala gawo koonkondo , noshowo onkalamwenyo yaantu mbaka kutya oyili ngiini. Ngame onda li nda gandja uumbangi komehi gokomitee ontine yoUN ishewe pehulilo lya Novemba 1960 na onda tula puuyelele onkalo ombwinayi yaaniilonga moshilongo, nehokololo ndika olya li lya holoka moshifo shoshiingilisa sha Contact. Ngame mehokololo lyandje komeho gIigwana Hangano onda popi nokutothamo ehepeko ha li ningilwa aaniilonga yokondalaka kehangano lya SWANLA, ndyoka olyo alike lya li lina uuthemba woku kuta aaniilonga okuza kuumbangalantu woshilongo.

Momasiku ga 6 Desemba 1960 okomitee ontine yoUN oya pititha etokolo nomawi 67 komawi 11 inaaga hogololola opo Iigwana Hangano yi tume osheendo koSouth West Africa  pwaana euvathano na South Africa opo shika konakone onkalo yaantu noku etapo ombili negameno lyaavalelwamo ya South West Africa. Osheendo shoka osha li shina oku gandja omushangwahokololo kOshigongi Shaayehe shIigwana Hangano ishewe kombinga yoonkatu ndhoka dhina oku tulwapo okulongekidha aavalelwamo opo ya pewe eipangelo mwene ndyoka tali ya fala moku tokola ku yo yene okumanguluka  noshowo oku ithikamena kuyo yene ngele otashi vulika.

Oshigongi shAayehe shIigwana Hangano osha koleke ontokolwa ndjika nomawi 78 , oku yeleka nomawi 15 ngoka inaaga kuthombinga mehogololo. Konima yetokolo ndika otwa li tu uvite otwa inyenge okuza momukalo gwokugandja omaiyuvo getu paku nyenyeta , na ngashingeyi otwa li tatu longo  shuukilila oku pula emanguluko lyoshilongo shetu.Ontokolwa yo UN ndjika oye tu tsu omukumo opo tu tsikile nekondjo lyetu papolitika nopaudiplomate pomithika adhihe dhopaigwana.

Pehulilo lyomumvo ngoka Oshigongi shAayehe osha koleke ontokolwa yonomola 1514 momasiku 14 Desemba 1960 ndjoka ya koleke kutya oku tokola mwene kwaantu ayehe olyo ekankameno  lyopaveta. Ontokolwa ndjika oya yambidhidhwa  kiilongo 89 , ina yi kondjithwa nando okoshilongo shimwe omanga iilongo omugoyi oya li inaa yi kuthombinga mokuhogololola kutya oya gama peni. Mbika oyo Australia, Belgium, Dominican Republic, France, Portugal, Spain Union of South Africa, United Kingdom noshowo nee United States of America.

Ontokolwa ndjika oyi na sha noku koneka kutya aantu ayehe muuyuni oyena uuthemba wopantu nongushu yuuntu, na oyena uuthemba wuthike pamwe kutya mbaka aakiintu nenge aalumentu, oshowo kutya iigwana ayihe iinene niishona oyithike pamwe moku kala ya manguluka oku ya komeho pankalathano noshowo pamuthika gwonkalamwenyo memanguluko.

Ontokolwa oya yalula uuthemba nondjala yaantu ayehe oku kala ya manguluka, yena ombili, uukuume nesimaneko lyuuthemba womuntu noshowo emanguluko lyomuntu kehe pwaana eyooloko lyoludhi, uukashike kookantu, elaka nenge eitaalo.Ontokolwa ndjika oya li wo ya igidha kutya osha pumbiwa opo pu hulithwepo mbala nopwaana omaongaongo onkalo yuukoloni momukalo kehe ngoka mbuka tawu adhika shaampoka tau holoka.

Onkene opwa igidhwa kutya okuthindila aantu kohi yelelo lyontumba, okuya thipa ombinzi osha talika ongo okuyuga aantu mboka uuthemba wawo wopantu naashika otashi kondjitha omakankameno gIigwana Hangano na otashi yono ombili yuuyuni nelongelokumwe muuyuni. Okwa tokolwa noku igidhwa kutya aantu ayehe  oyena uuthemba okutokola yoyene oku utha onakuyiwa yawo yopapolitika noshowo okulonga nokulandula omulandu gwawo ngoka ya hala gwomahupilo, gwonkalathano noshowo eputuko lyopamuthigululwakalo.

Okwa tokolwa wo kutya okwaa longekidhwa kwa, gwana kwopapolitika, pamahupilo, pankalathano nenge palongo hako ku gandjwa ongo etompelo molwashike iilongo yaana oku pewa emanguluko.

Okwa tokolwa kutya omikalo kehe, dhelongitho lyekuni dhuukithwa maantu aayambidhidhwa odhina oku hulithwapo, opo mbaka ya pewe ompito oku ninga omatokolo gawo yene mombili nomemanguluko kutya oya hala oku ithikamena noshowo oshitopolwa noongamba dhoshilongo shawo dhi simanekwe.

Ishewe oonkatu dhomeendelelo odhina oku katukwa opo iitopolwa mbyoka yiinekelelwa iilongo yilwe yi pewe ondiimpangela , nenge oonkondo dhepangelo dhi pewe aantu yomiilongo mbyoka pwaana oku ongaonga kwasha, pwaana okutala koludhi , kuukashikakookantu, kolwaala lwawo opo mbaka ya vule okutyapula emanguluko neithikameno lyawo yene.

Onkambadhala kehe oku topola  nenge  oku piyaganeka uukumwe wopashigwana noshowo esimano lyoshilongo ita yi tsu kumwe nomalalakano nomautho gIigwana Hangano.

Onkene iilongo ayihe oyina okusimaneka noshowo okugwanithapo omautho ngaka gIigwana Hangano, noshowo eigidho lyakwaalukehe lyuuthemba womuntu , noshowo elombwelo ndika tashi ningwa momukanka guuthike pamwe ,noshowo ngoka gokwaa idhopa miikwameni  yiilongo , noshowo esimaneko lyuuthemba wiilongo oku ipangela yoyene noshowo uuthemba waantu okwiilela yoyene meni lyoongamba dhiilongo yawo ndhoka dhaana oku yonagulwa.

Etokolo ndika lyOshigongi Shaayehe olye tu kumike na olya tula Swapo mondondo yokomeho oku ya komeho nekondjelomanguluko momikalo adhihe ngaashi tashi vulika. Ethimbo olya thikana opo ndi shune ko Africa okuza ko New York. Ethimbo alihe nda kala mo New York otwa kala mekwatathano newiliko lyoSwapo moVenduka mokupitila moondelekelama nomoombapila, aawiliki ooyakwetu oya li wo ya tumine ndje oshimaliwa. Onda galukile ko Africa mekwathelo lyepangelo lya Liberia noshowo oSwapo onda shuna ko Dar es Salaam hoka nda tameke ihe okudhiladhila oku egulula oombelewa dhuukalelipo  opo tu humithe komeho iilonga yokumangulula South West Africa.

LEAVE A REPLY

Please enter your comment!
Please enter your name here