Endhindhiliko lyoshigongi shuudhano shopashigwana

0
189

KuOtniel Hembapu

 

WINDHOEK – Olutu lwomaudhano moNamibia, nenge the Namibia Sports Commission (NSC) olwa katuka onkatu yuuka komeho nawa sho lwa tseyitha oshigongi shopashigwana shomaudhano shoka tashi ka kalako omwedhi taguya moVenduka.

Moku gandja etseyitho ndika omunashipundi gwongundulongekidhi yoshigongi shika, na okuli wo Komufala gwomaudhano, Ndeulipula Hamutumwa okwa ti etseyitho ndika olyo onkatu yotango melongekidho lyoshigongi shoka. Okommissi yomaudhano ya Namibia[NSC] oya ningile omalongekidho omimvo 2004 no 2009 oku kundathana kombinga yoshigongi shomaudhano ndele ndhika kadha li dha etapo sha oshiwanawa. Iizemo yoonkundathana monakuziwa oya li iinkundi molwashoka kapwali aatseyi nawa mboka ya li taya vulu oku kwathela moku tula miilonga  omatokolo ngoka ga li ga ningwa piigongi ngaashi shika.

Oshigongi shomasiku ga3 otashi ka tameka mo 24 gomwedhi tuuka, na Hamutumwa okwa ti otashi ka kundathana iiyetwapo ya yooloka mbyoka, kwa talika tayi nkundipike eyokomeho muudhano womoshilongo. Iikundathanwa ongaashi elundululo moveta yOmaudhano yomumvo 2003 ndjoka ku wetike ya kulupa na ita yi endele pamwe nethimbo muudhano womoshilongo.

Oshigongi otashi ka kumika ekwatathano noonkundathana  naayehe yena ombinga muudhano opo ya tale nkene omilandu tadhi tulwa miilonga, ndhoka kwa talika tadhi vulu okweeta eyokomeho noshowo okulundulula uudhano okuza tuu pevi moshigwana.

Pahapu dha Hamutumwa, iimaliwa inaa yi gwana, noshowo, okwaa kalapo kwomukalo omwaanawa gwokugandja oondjambi  oyo yimwe yomiikundathanwa ta yi kala komutse gwomusholondondo gwiikundathanwa yoshigongi shoka.

Okwa ti omuthindo otagu ka tulwa wo kombinga yoshinima shoku tula omilandu miilonga ndhoka tadhi ka hila omahangano gopaumwene opo ga joine oshitopolwa shomaudhano moku kwathela eyokomeho neyambulepo lyuudhano mbuka pomithika adhihe moshigwana.

Poshigongi opwa tegelelwa aapopi yomegumbo naamboka yaza pondje yoshilongo ya hiwa opo yee, ya kundathane iiyetwapo yomaludhi.

Aatseyinawa muudhano nayo oya ithanwa opo ya gandje omathaneko gawo nkene omashongo ga taalela oshitopolwa shuudhano taga taagulukwa noku kandulwapo.

“Konima yoshigongi, ongundulongekidhi otayi ka shanga omushangwahokololo, ngoka tagu ka pewa aatotimpango moParliamende opo ya tseye shoka shi li  moshitopolwa shuudhano moshilongo.,” Hamutumwa a ti .

LEAVE A REPLY

Please enter your comment!
Please enter your name here