Epiyagano posikola ya Mvula natango olya tsikila

1
1038

KuKakunawe Shinana

 

ONGWEDIVA – Oshinima tashi kumitha nomaihumbato itaaga vulu ku fatululwa mokati kaalongwa posikola yaMvula Combined School pOmaaala, mOshana oga tsikila okupiyaganeka osikola ndjoka, sha fala sigo oompoka iilonga yosikola yi mwenekwe pakathimbo metiyali oshiwike shika, nonando aalongwa yamwe oya li yena oku tameka ekonakono.

Ihe omuwiliki gwopevi gwElongo moshitopolwa shaShana, Immanuel Aipanda okwa ti oshikondo she inashi gandja elombwelo ando opo iilonga yosikola penongelo mpoka yi kalekwe manga. Aipanda okwa ti shoka sha tokolwapo kombinga yomainyengo ngoka taga limbilike mokati kaanasikola ooshoka kutya aakuluntu yaanona mboka ya gumwa koshinima shika naya kuthepo uunona wawo wu kale manga komagumbo yo iilonga yosikola ta yi tsikile ngaashi shito.

Onkalo yomaihumbato ngoka oya kala tayi holoka posikola ndjika yaalongwa 300 uule woomwedhi mbali ngashingeyi, naashoka tashi halutha ooshoka kutya kapena shoka tashi vulu oku popiwa kutya osho osheeti shoshinima shika.

Aalongwa mboka ya gumwa kusho oyendji yomuyo aakadhona mboka ha ya tameke taya inana nando ina ya hala, taya kambuka.

Aantu oyendji mwakwatelwa aakuluntu, aasita yomagongalo naanambelewa yelongo oya kumwa koshinima shika tashi eta uumbanda unene.

Kuyele omwedhi gwayi aalongwa yamwe oya tamekele taya kugu yo taya ihatapo meendelelo sha landulathana, naashika osha li sheeta epiyagano posikola.

Aalongwa mboka oya li ya falwa koshipangelo kOshakati ndele hoka ina ya pewa uuyelele washa wepango kutya ando oye na omukithi gunipo konima ashike yaashika aanasikola oyendji oya tameke ishewe taya ulike omandhindhiliko ga fa gaa yakwawo mboka naambaka oya li ya kuthwapo posikola.

Omukuluntusikola , Werner Muzanima ina vula okutya, kutya osheeti shonkalo ndjoka oshikwashike naanaa pethimbo a popiwa naye kombinga yoshiningwanima shoka.

Omuwiliki gwopevi gwElongo mOshana, Immanuel Aipanda okwa koleke kutya onkalo ndjoka oya guma aalongwa oyendji mooklasa posikola mpoka, ihe ombelewa ye ina yi gandja elombwelo opo ootundi dhi ethiwe andola okathimbo.

“Tse otwa lombwele aakuluntu yaanona mboka ya gumwa koshinima shokwiihatapo , opo ya kuthemo oyana menongelo ,omanga osikola tayi kongo ekandulopo lyomukundu nguka.Otwe shi uvu kutya yamwe otaya ti aniwa oshinima shoka otashi etwa kuulodhi nomulongwa gumwe aniwa oye ta lundilwa kutya omulodhi. Ihe tse poombelewa dhElongo otuna omulandu kutya omahokololo guulodhi moosikola kagena mo ehala nando olimwe. Ishewe aakuluntu yamwe oya thaneke kutya napa ningwe iigongi yomagalikano ndele nee iinima yopangeleki ina yi pitikwa we oku ningwa poosikola,’ Aipanda a ti. Okwa tsikile a thaneke kutya ngele aalongwa oya hala oonkundathana naawiliki yongeleka nena otaya vulu oku ninga shika konima yootundi.

“Oshinima shika oshidhigu na tse itatu vulu okupulakena aakuluntu noshowo aanona taya lundilathana omaulodhi, oshoka shika otashi vulu oku etela mboka taya lundilwa oshiponga, onkene otatu kumike aalongwa naalongi ya tsikile niilonga yawo ngaashi shito. Otwa li wo tuna onkalo ya fa ndjika komanongelo gamwe yo ndjika oya  ka mwena noshowo ya ka hulapo thilu,” Aipanda tati.

Aipanda okwa ti oshikondo shElongo osha kundathana nomundohotola guunamiti opo a  konakone onkalo na ota ka kundathana naanona mbaka opo a vule okumona kutya otaya ehama shike naanaa.

1 COMMENT

  1. oshinima shino ohashaadha aanona unene pethimbo lyomakonaakono kandiwete shinasha nuulodhi ondiwete omakwatathano gopaunamiti otagakalonga ….

LEAVE A REPLY

Please enter your comment!
Please enter your name here