Ngoloneya gwaShikoto a lundilwa a pewa ehala enene anuwa

0
279

KuKAKUNAWE SHINANA

 

 

ONGWEDIVA – Yamwe yomaakalimo nooyene yomagumbo momukunda Onashiye moshitopolwa shaShikoto, oya tokola oku ikuthila oveta momake gawo yene, pakutamununa mo omankolo gawo, sha landula sho aniwa ngoloneya gwoshitopolwa shoka, Ngoloneya Penda ya Ndakolo, a pewa oshitopolowa shevi oshinene, shi vulithe sho sha uthwa koveta.

Aakalimo oya ti wo mwene gwomukunda  Joseph Imbili ngono woo oye  kansela gwoshikandjohogololo sha-Kankolo oye a pe Ya Ndakolo evi, ye aniwa ta gwedha ko wo kehala lye mwene noku li tula molugumbo.

Shika aniwa osha nayipike uulithilo wayo oshoka mpoka pwali hapa napa oongombe dhawo ngashingeyi opwa tulwa molugumbo. Ta ya nyenyeta kutya pokuma mpoka pwa tulwa oondhalate kaaleli mbaka yaali opwa li pwa indikwa kelelo opo kaaputulwe we oondhalate opo pakale uulithilo.

Ngoloneya yaNdakolo okwa ekelehi omalundilo kutya okwa pewa ehala mevi lyaayehe lina uunene wu vule poohektara omilongo mbali, ndhoka dha uthwa paveta.

Okwa koleke kutya okwa pewa ehala kumwene gwomukunda Onashiye,  Joseph Imbili ngono eli woo Kansela woshikandjohogololo Okankolo.

Ya Ndakolo okwa ti kashishi oshili kutya ye okwa pewa ehala lyuunene nenge lyuule wookilometa hetatu, ta ti, ehala ndyoka apewa eshona, nomuntu oto vulu oku enda mulyo nenge oku li taakana uule ashike wokathimbo okafupi. Okwa gwedhako ati  ehala ndyoka apewa olyo oshipambu shehala lyali lya mwene gwomukunda Onashiye. Omukunda nguka ogu li moshikandjo shelenga enene Eino Johannes Shondili Amutenya .

Konyala aakwashigwana yevule lwopomilongo ndatu mboka yena omahala omashona, ngoka  gamwe gaa he thike nando opokilometa yimwe, na oya li haya longitha ngaka okulitha iimuna yawo, otaya ti oshinima shegandjo lyevi kuGavena gwaShikoto inashi ningwa pamautho nopalundalathano ndyoka lilipo.

Oya ti omulandu nomautho gompango yokugandja evi momahala gaayehe oya fa inaayi landulwa sho evi ndyoka lya pewa Ya Ndakolo. Oshoka oveta otayi utha kutya hamuntu ta pewa evi lyuunene wu thike mpoka shila ongele ndika eli pewa kewiliko lyopombanda , ngaashi ando kelenga enene lyoshikandjo, omusamane Eino Johannes Shondili Amutenya.

Sho Amutenya a pulwa a tye sha kehokololo ndika okwa ti oshinima shoka ine shi uva, ishewe kena ontseyo yomuntu a pewa evi lyuunene wohektara ndhoka omilongo mbali unene tuu sho oye awike ena uuthemba oku gandja epitikilo opo omuntu a pewe evi lyuunene wu thike mpoka.

“Kandina ontseyo yasha dhoshili moshinima shoka na ondu uvite kutya ngoka eshishi okwa li ena oku ya kombelewa yandje tango omanga inaa tondokela kiikundaneki. Ngele oye ya kombelewa yandje eta ya mono kutya oshikumungu shawo inashi potokonoka nena opo ihe taya vulu okuya kiikundaneki,”  Amutenya a ti.

“Otwa hala oku tseya kutya aantu mbaka, oyo yeli mewiliko lyoveta nelandulathano, oyo  taya ikuthile omahala shaali palandulathano, pehala lyoku  landula omautho gopaveta, otwa hala oku uva kutya oya longitha ompango yini.

“Otatu pula kutya otatu uka peni moku ka litha iimuna yetu, sho ngashingeyi omahala omanene ga tulwa momalugumbo. Ehala ndika olya li nale lyuulithilo ndele sho omahala ga pumba ngashingeyi aantu oyendji oye ya mulyo nonkene ndika olya lundulukila momukunda guna omagumbo,” gumwe gwomaanamukunda a ti ngaaka.

“Eeno aakalimo yomOnashiye inatu panda, ngame ondina ohambo yandje momudhingoloko ngoka na onda mono nkene Gavena a pewa ehala enene, naashika osha eta okwaa na ombili mokati kaanamukunda. Ndele nee ngame itandi shi koleke naanaa kutya  ngele omilandu odha landulwa nenge ahawe, nenge ngiika okwa pewa epitikilo okuza pombanda, nenge ine li pewa. Ihe shoka ndishi osho owala kutya aantu otaya hakana omahala ngoka geli po shaampoka taya vulu oku ga mona,’ omukalimo gumwe a ti.  “Ndakolo okwa ekelehi omapopyo ngoka a ti evi ndyoka a pewa eshona  ati olina ashike oometa omathele gahetatu na okwa hiya omutoolinkunda nguka opo a ye eki italeleko yemwene. Mwene gwomukunda Imbili sho a pulwa okwa ti ngoka a popi oohapu ndhoka ota vulu okuya a ka mete ehala ndyoka. Oshoka ndyoka olya gandjwa palandulathano nopautho lyoveta. Okwa pula kutya mboka taya hokolola oohapu ndhono oya zi peni oshoka ye ina mona po omuntu ta mete ehala ndyoka opo a etepo ehokololo ndyoka. Okwe ya pe omayele kutya ngele nani oya mono kutya ehala lya gandjwa enene oya li taya vulu oku lopota shoka kelelo lyopamuthigululwakalo.

LEAVE A REPLY

Please enter your comment!
Please enter your name here