Okanona ka mono oshiponga

0
204

KuMaria Namupala

 

ONDANGWA – Okanona koomvula 8, okeli ta ka mono epango moshipangelo sha Medi Park mOngwediva sho ka li ka mono oshiponga sho ka lyatwa kohauto pehala mpono hapu taagulukilwa kaayendi kolupadhi mondjila onene mondoolopa yaNdangwa.

Simon Ihuhwa ngono eli mondondo onti 3 , okwali eli mondjila ye yokuya kosikola ethimbo lyongula onene, ashike ando moku taaguluka opate, nani komeho ge okwali ta kuzi ohauto ndjono ye mu pitula po noku mu lyata.

Omusilishimpwiyu gwokanona hano Monika Veinela ngono oye a kalela Simon moshipangelo okwati nonande okatekulu ke keli ko ICU oku wete kutya onkalo yako otayi ende tayi lunduluka.

“Oshali oshidhigu kungame opo ndi shi taambeko sho ndu uvu kutya omutekulu gwandje okwa lyatwa kohauto sho a adhika tayi kosikola, onda endelele ndika kwashilipaleke uushili koshipangelo kOnandjokwe hono nda adha eli komupepo, no konima yomasiku Simon okwa lundululiwa koshipangelo sha Medi park hono ndemu kalela,” Kuku Monika ta ti ngaa.

Kuku Monika okwa ti Simon okwa teka ombinga yimwe yoombati, okugulu kokolulyo nomasipa gamwe ogali gaza pehala ashike oondohotola ota ya kambadhala noku ga shunitha pomahala, ye a vule a mone uukolele we nokushuna koskola.

“Iiponga ihayi pelwa omuntu ondjo onkee ota tu gandja ayihe momake ga Kalunga tse tatu tala nkene okanona ketu ta ka kala, otandi pandula Kalunga oshoka oshiponga shino oshinene shali sha gwana oku kutha omuntu omwenyo nando a teka otandi pandula Kalunga,” Monika ta gwedhako.

LEAVE A REPLY

Please enter your comment!
Please enter your name here