Osikola ya Heroes ya dhimbulukwa emanguluko

0
202

KuMaria Namupala

 

ONDANGWA – Momasiku 20 Maalitsa esiku ndyono lya landula oku pendukila evalo lyaNamibia, oskola yopaumwene ya Heroes oya li ya dhimbulukwa oshituthi shemanguluko.

Aanaskola oshowo aalongi poskola ndjoka oya li yeya koskola ya zala omizalo dhopamuthigululwakalo nelalakano okusimaneka omuthigululwakalo noonkuluhedhi dhawo.

Isai Natangwe David ngono eli omuwiliki gwomaudhano posikola mpano okwa holola kutya oya tokola opo ya dhane oshituthi shemanguluko, nelalakano oku ulika omithigululwakalo yo ya ulukile uunona uuwanawa mbono wa etwapo konima yemanguluko. “Omuzalo gwetu gwesiku ota gu ulike ashike omuthigululwakalo shono tu uvite etumba nuugumbo oku kala moshilongo sha manguluka nonando emanguluko lye yapo okupitila metiko lyombinzi ita tu dhimbwa aakondjelimanguluko, oshilongo shino oye shi kondjela,” David ta gwedhako.

Esiku olya li lya mwenyekwa niipopiwa tayi popi emanguluko, iinyandwa ya yoolokathana, oondjimbo oshowo iitewo ya totwa kaanaskola yo yene mbyono tayi tanga Namibia evi lyomapendafule.

Opwa li pwa longekidhwa ompito yomalandithilo ngono gali ga kwatelwa komeho kuunona mbono wuli moshikunino sigo ondondo onti5. Uunona owali tawu landitha iikulya ya yomaludhi gi ili no gi ili ngaashi uuleke , uukuki, uuniknaks nosho tuu. David ta ti iimaliwa mbyono ya landwa otayi ka kwathela okuhumitha komeho noku kandulapo oompumbwe dhoskola.

Aanaskola yomondondo onti8 oya gandja omaiyuvo gawo kombinga yemanguluko. Ingashihula Shilunga  e na oomvula 14 okwa ti okwa nyanyukwa molwa emanguluko lya Namibia na ota indile aaNamibia ayehe ya kale nombili.

“ Ondina enyanyu enene komutima moku tyapula evalo lya Namibia, otandi indile opo ombili nohole yi pangele tse tu kondjithe onkalo yoluhepo ndjono ya taalela oshilongo shi” ndhino odha Wilhelmina Ngalangombe gomondondo onti8 posikola ya Heroes.

Aune Sheepo na ye okwa popi molwemanguluko ta indile opo epangelo li tsikile oku hedhitha uuwanawa koshigwana, yo aakwashigwana ya tyapule nokulya oshikwiila shoshilongo.

LEAVE A REPLY

Please enter your comment!
Please enter your name here