Otonamenda yo Far North Volleyball oya enda nawa

0
214

KuMaria Namupala

 

ONDANGWA – Ewiliko lyo Far Northern volleyball olyali lya longekidha  otonamenda ndjono ya ningilwe ehululoshiwike lya ziko, okuza mo 21 sigo o22 Maalitsa ya dhanenwa pokapale ka Northcote Private School.

Otonamenda ndjino oya kwashilipalekwa  komundohotola, Jerry Lwande,  mwene gwosikola yo paumwene ya Northcote yili mondjila onene ngele wu uka koshipangelo shaNandjokwe, eyi kwashilipaleke no N$10 500 noomedalia.

Paulus Mulunga  omunashipundi goFar North Volleyball League okwa tumbula kutya elalakano lyo tonamenda ndjika oku ulika ashike uunyakwa opo ya tameke no liha yawo ndjono tayi tameke kuyele mu Apilili. “Otwa hala oku kala tu shi kutya shoo liha yetu tayi ka tameka otuna oosipana ngapi,” Mulunga ta ti.

Johannes  Martin omupevi-nashipundi okwa  ti yemwene okuna ohokwe yuudhano nokuna ehalo opo ya yambulepo omaudhano monooli yoshilongo. Martin okwa indile ayehe yena ohokwe yuudhano yiitulemo yo ya kwathele okushunitha oompito dhoku kala pomalovu pevi. “Konyala aagundjuka oyendji ohaya kala unene pomahala gomanwino shono shili omukundu omunene oshoka uuna ya longitha iikolitha sha pitilila itaya ka monawe ethimbo lyoku kala pomaudhano yo ya tungathane nooyakwawo, onkene tse onga aagundjuka otuna elalakano oku yambulapo omaudhano noku ga tula pomuthika gopombanda,” Martin ta ti.

Oosipana dha yooloka odha kutha ombinga methigathano lyuudhano mbuka wo volleyball, mono aakiintu  yali yena oosipana 5  naalumentu yena 6 ayehe  oyali taya kondjithathana. Osipana yaalumentu ya Nakapele oyali ya sindanapo sho ya dhengemo oosipana adhihe no yeya po nomola yotango eta ya pewa oodola N$3000 noomedalia 12, puutiyali opwe ya Hifikepunye Pohamba (HP) Campus ya mono ooN$2000 no 12 medalia naamba yeya puutitatu oSix star noshowo Ohangwena Nampol ya topola oodola 500 kehe noomedalia hamano.

Oosipana dhaakiintu  ngu eya dhingi Otjozondjupa Nampol a sindana ooN$2000 noomedalia 12, HP Campus okweya ponomola ontiyali eta sindana ooN$1500 no 12 medalia omanga  Six stars ya etelele okano yo oya pewa nee ooN$1000 noo medalia dhili 12.

Jerry Lwande okwa ti uudhano mbuno owa enda nawa lela oshoka konyala oosipana odhindji odha kutha ombinga nodha ulike eitulemo lyadho. Lwande okwa kwashilipaleke kutya ota tsikile noku yambidhidha omaudhano ngaka yo ya yambulepo iitopolwa ngele tashiya komaudhano.

LEAVE A REPLY

Please enter your comment!
Please enter your name here