Oumbudi woimuna wa teywa ombuda moshitukulwa shaMusati

0
197

Komutoolinghundana 

 

ONGWEDIVA – Ovakwashiwana moshikandjohoololo shaTamanzi nOkahao moshitukuklwa shaMusati, ova kanifa omaufita eengobe da shingwa po kovalunga voimuna.

Omukwashiwania moshikandjohoolo shaTamanzi ina hala ku tumbulwa kedina, okwa ti “oulunga woimuna owa li wa duka okudja petameko lodula ya dja ko, tau mwena po okafimbo eshi ovalunga voimuna va li modolongo, paife owa duka shi dulife.

Onghee ovanaimuna vakwetu  kotokeni,  shaashi eembudi doimuna paife itadi kofa vali”.

Ovalunga voimuna ova tameka vali, ku kongolola oimuna okudja kombuwa fiyo omomikunda da dingilila Otamanzi, Onamatanga nOndjungulume.

Eembudi ode ya nondunge  yoku ovolola omadidiliko eengobe komatwi  da xwikululwa opo pa dengwa oihako koovene veengobe.

Eengangala doimuna oda kufa oupapa komakumba a fya pokwenye, nokwooyolola eembululu komatwi eengobe.

Oda ndjeneka oupapa da kufa keengobe da fya nokuva tula meembululu dipe odo da taka momatwi  eengobe.

Eembudi edi inadi didilika kutya, pamukalo ou ode li kengelela doovene shaashi, okapapa keshe ke na onomola ka tulwa mokutwi kwongobe, oluvala  longobe ondume ilo onghadi noshihako sha mwene wongobe, aishe ei oi li moCompiuta meembelewa dounamapya moitukulwa.  Moshitukulwa shaMusati eembelewa imwe oi li mOkahao ikwao okOutapi.

Ovalunga voimuna ove li kengelela voovene eshi va tula oupapa  kongobe keshe va vaka, veke  li haluka, okapapa komhedi ka tulwa kokutwi konana onghadi yoluvala lihefi olo li li moCompiuta noshihako itashi tu kumwe naasho va tula ko.

Edengo loihako, etule ko loupapa , neovololo lomatwi eengobe , osha eta etumhakano  keenghani dihapu  moshitukulwa shaMusati, omo eenghani dimwe fiyo onena oda idililwa moluumbo lopolifi yaKahao moshitukulwa shaMusati.

Eshi osha djuupika oilonga yopolifi novakongi veengobe okutongolola eengobe davo da kana.

Konima yoivike ivali eshi opolifi ya ninga oshoongalele pOndjungulume moshitukulwa shaMusati,  oya londwela ovo hava londeke eengobe momatuwa oufiku nokuka landifa keedoolopa unene ovanamake,va xulife po omukalo ou.

Dihapu domeengobe da dipawa oda landifwa momudingililo waTamanzi.

Opolifi oya kunghilila oovene voimuna va fye oshisho okudenga oihako koimuna yavo, shaashi ongobe yoye ngee o oya kana inai tulwa ko oshihako, nombudi tai tula ko shayo, ngee omwa i komangu nena mwene wongobe  oto kana shaashi ku na oumbangi.

Onghee opolifi oya kumaida ovo va kanifa eengobe va ka vandamene keenghani da idililwa moluumbo lopolifi yaKahao moshitukulwa shaMusati.

Ovalunga voimuna vahetatu lwaapo va idililwa modolongo yaKahao.

Opolifi oya tameka ku ninga omainda moutauwa omo hamu endele ovalunga hava tulike oimuna oufiku no itai ka fila nande omulunga woimuna onghenda.

Dimwe oda kwatwa paife lwoikando ine hadi kongolola oimuna kOmakange, Okakango, Uukwaluudhi, Otamanzi nIiyekeya

LEAVE A REPLY

Please enter your comment!
Please enter your name here