Shihepo okwa nyekwa efidano la ye komushikishiva no kovayandji voitwa

0
238

Komutoolinghundana

 

WINDHOEK – Konima youdano waWilberforce “Black Mamba” Shihepo omo eyadjo loitwa inali twa kumwe eshi ovayadji voitwa va vali polwoodi eli va yadja olwoodi ku Johnny Muller, omudeuli wa Shihepo, Nestor Tobias okwa holola eudonai laye, a handukila neenghono omushiki woWorld Boxing Council (WBC) International, Thabo Spampool.

Moshinyolwa sha holoka moshifo shefiku shomoJohannesburg shothe Sowetan, Tobias okwa yandja eudo nya laye kombinga yomukalo oo Spampool a longa nao, ta ti okwa li ta ulike olwama mbinga pefimbo alishe lolwoodi na okwa pitika Muller a ninge omapuko ndele ye inemu handukila.

“Okwa pitika Muller a denge Shihepo kombunda ofimbo ye a li keengolo, naashi osha tula  Shihepo modjuu osheshi okwa kala ena oumbada wokukunghililwa noshoyo oku kufwa oitwa ngeenge ina lwa ngaashi omushikishiva ta ufa olwoodi,” Tobias ta ti. Omushikishiva vati okwa efa  Muller a tauluke omhango youdano , eshi a kala ta ningi omhindi na Shihepo  oule wolwoodi alishe. Tobias ta ti omushikishiva vati ina hanyena Muller ile a kufe koitwa yaye, noshinima eshi otashi kumwifa.

“Ame onda kumwa vali shaashi efimbo keshe omudengingonyo Omunamibia ta kondjo moSouth Africa, omushikishiva Spampool oye alushe ena oku kala ta shiki oshiva molwoodi olo,” Tobias ta popi, ye a fufaeka. Spampool okwa li yo omushiki molwoodi lwaOscar Chauke na Gotlieb Ndokosho mo2010 noshoyo molwoodi lwa Isaac Chilemba na Vikapita Meroro mo 2011.

Tobias okwa ulika yoo okuhena mbili kwaye novayadji voitwa voo Chaane na Pappoe, nokulipula kutya omutalelo wavo mokuyadja oitwa owo shili tuu, a pula ngeenge ava vavali ovali tuu polwoodi olo ile  pamwe ova li va tala olwoodi lili, osheshi paku tala kwaye, Shihepo okwa longa shihapu na oye ali ena oku kala a findana po olwoodi olo.

Joe Chaane (SA), Eddie Pappoe (Ghana) na  Daniel Can de Wiele (Belgium) ovo vali ovayadji voitwa polwoodi olo. Chaane na Pappoe ova yandje oitwa molwoodi eli 116-113 mouwa wa Muller fimbo Wiele a yandje oitwa 114-113 mouwa waShihepo.

Spampool okwa yola ashike omupopyo netanguno laTobias a ti. “Ame onda londwela ovadengingonyo ava oikando ihapu, opo va kaleke olwoodi eli tali dulu okuwilikwa nawa. Onda kufako oshitwa ku Shihepo osheshi okwa li ta ningile omapuko owina, ta kwata mukwawo ye te mu denge fimbo emu kwata. Ame ohandi longo oilonga yange paufo leemhango dobokisha. Ame onda li koNamibia na onda didilika nokutya ovadengingonyo oko ohava longo eshi va hala, ngaashi oku undula, okukwata nokudenga oshanima nongonyo, ndele nee ihava handukilwa. Oshinima eshi itashi tu kumwe nomaufo oudano oo.

“Ame nghina ondumbo ile okatili nando onomudengingonyo umwe, ame ohandi wilikwa shike keemhango nokomaufomhango oudano, nomaufo aa oo kwali hadi shikula fimbo naame ndali hadi denge eengonyo yoo,” Spampool ta ti.

Omutaleli wolwoodi eli oufiku oo, Peter Ngatane oku udite kutya Tobias ota popi unene noitya idjuu kombinga ya Spampool. “Omolwashike ena okumu tofamo oye aeke sha fa oye a li omuyadji woitwa? Shihepo okwa longa nawa okuyeleka na Muller. Ame ngeno olwoodi olo okwa tilwe kutya olufike pamwe ngeno ame inandi popya shihapu, onghee olo etomeno lange nda yadje kutya ava nava ka lwe vali osheshi ovalwile shilyaafane pepi.”

“Ngatane okwa dimina nokutya Shihepo okwa li talu shixwepo oku yeleka na Muller oufiku oo na oku li mondjila osheshi ame onda teelela omutaleli omunawino ngaashi ye, opo a ulike kutya omudengingonyo oo a denga shixwepo oye lyee.

LEAVE A REPLY

Please enter your comment!
Please enter your name here