Ya pewa omakwatho okuza ko Micro Finance

0
207

KuMaria Namupala

 

ONAYENA – Oproyeka yo Micro finance natango otayi gandja omakwatho kaanangeshefa aashona, opo ya vule okuyambulapo oongeshefa dhawo, yo ya gandje uuwanawa momikunda nelalakano lyoku kondjitha onkalo yoluhepo nookwaahena iilonga.

Kansela gOshikandjo-hogololo Onyaanya, Henock Kankoshi okwa koleke kutya opoloyeka ndjika oyali ya gandja elombwelo opo kehe omunangeshefa eli moshikandjohogololo shawo a udhithe ofooloma yo ya vule okuyambidhidhwa tashi pitile moproyeka ndjika yo micro finance yili mekwatelokomeho lyuuministeli wOmavi nOmayambulepo gomomikunda.

Kankoshi okwati ombelewa ye oyali ya taamba omaindilo geli 12 mono mwa hogololwa geli gatatu ngono ogo ga gwanithapo  uukwatya awuhe wa pumbiwa. Ombelewa ye oyali ya unganeke esiku opo yiye yi gandje iilongitho mbika aanangeshefa ya pewa.

Shekesheke Tyres workshop & battery recharge oya pewa iilongitho yongushu yoshimaliwa shi vulithe pooN$ 28 600, mono mwa kwatelwa eshina lyokufikila,eshina lyokuchachela oopatiri, okashina uuna olusheno lwagwako niilongitho woo oyindji.

Onyeka yEpumba Tailoring ya meme Kristofina Petrus, gomomukunda Omutse nayo oya pewa iilongitho yongushu yooN$19 190 mwa kwatelwa omashina gokuhondja geli gahamano, iipundi,iitaafula oonane dhokuhondja nosho tuu.

Naandjono yali ya mono omakwatho ngaka oyo OK 4 Welding Brock Kasting ya Andreas Kalenga gokOnankali oya pewa iilongitho yooN$12 120.

Mwene goShekesheke tyres workshop, Tomas Ndjago okwa ti yemwene okuna aaniilonga yeli yatatu na ye omutine, haya longo  oku pangela iihauto nokulapa omagulu giihauto Ndjago okwa ti okuli a nyanyukwa noonkondo oshoka okwa pewa iilongitho yongushu mbyono tayi mu kwathele ye a yambidhidhe noku totapo oompito dhiilonga moshitopolwa.

Okwa indile mbono yena uunongo kehe yewu longithe ngaashi tashi vulika.

Moses Matatias okuza kombelewa yelelo lyaShikoto okwa ti elalakano lyo micro finance oku kwathela aanangeshefa mboka aashona yo ya vule oku yambulapo oongeshefa dhawo, noku gandja iilonga kaagundjuka yomomudhingoloko, ta indile woo mboka inaa ya pewa iilongitho kaa yase uunye , opo natango ya udhithe omvula ta yiya yo ya vule ku yambidhidhwa.

LEAVE A REPLY

Please enter your comment!
Please enter your name here