African Stars natango ota shi vulika yi ninge enyakwa moliha yaNamibia

0
192

KuOtniel Hembapu

 

WINDHOEK – Pethimbo sha pupyala kombinga yuudhano woliha yaMTC, unene tuu sha pupyalela omudheuli gwospana yo African Stars, Woody Jacobs molwashoka ospana ye otayi longo nuudhigu ngele tashiya po ku tulamo ookoola. Ihe Jacobs oku na etegameno kutya ospana ye natango oyina ompito okusindana ekopi lyoliha, nonando yo ya dhana shi thike pamwe Osoondaha ya ziko sho ya thigathana onola monola nospana yokomunkulofuta yo LHU Blue Waters.

Jacobs okwa ti omaehamo gaadhani ye yolela ogo ga etitha opo ospana ye yi kale itayi tulamo ookoola olundji uuna ta yi dhana uudhano woliha, ihe oku na etegameno kutya aadhani ye otaya ka tsikila noku dhana nawa unene tuu sho uudhano wu uka moshikako sha hugunina sholiha ndjika.

Jacobs okwa ti ye oye omudheuli gwospana onkene okuna uuthemba oku utha kutya, ope hala lini pwa  pumbwa elundululo pethimbo lyuudhano.

Shika okwe shi popi unene sha landula sho aayambidhidhi yamwe ya ti okwa pumbwa oku tidhwa oshoka okuhogolola kwe aadhani mboka yena oku dhana kaku shi oku wanawa.

Omanga aayambidhidhi yalwe oye wete ospana ya kanitha omulilo gwayo guudhano ngoka yi shiwikile nagwo.

“Tse otuna ospana onene yi na aadhani oyendji onkene ngele yamwe oye ehama, ngame ondina oku etamo yalwe pomahala gawo.

Nenge oya hala ndi dhanithe omudhani ngoka eehama, ngoka itaa vulu nando oku thanga etanga, nenge oya hala naanaa okutya ngiini?

Ondi shi shi aayambidhidhi oyu uvite nayi na oya hala oku mona iizemo yili nawa mbala ngaashi tashi vulika, ihe oya pumbwa woo oku kala yi idhidhimika, noku pa aadhani ethimbo opo yi iyunganeke nawa, osho a ti.

“Ngashingeyi otuli konima niitsa iheyali oku landula ospana yo Tigers ndjoka yili pombanda yoliha, na ka shi shi oshipu oku lalakana nomuthigathanipo omukweni ngoka wo na ye a hala esindano ndyoka, ndele pamiyalu otuna natango ompito tashi vulika okusindana oliha ndjika, onkene otuna oku kondja noku tameka tatu mono iitsa ayihe ya gwana po muudhano kehe, osho Jacobs a popi nonyati.

LEAVE A REPLY

Please enter your comment!
Please enter your name here