Natu yelutheni po omuthikwa gwetanga lyo koompadhi- Tjihero

0
191

KuCarlos Kambaekwa

 

WINDHOEK – Omuthika gwuudhano wetanga lyokoompadhi ogwa gwa pevi noonkondo, nongushu yuudhano ndjoka yu uka pevi oyetu etele omaipulo ongo aadhani yetanga lyokoompadhi omimvo dha pita.

Ngaka omaiyuvo gomudhanitanga nale Albert Tjihero e ga popi poshiithanene shaa dhani tanga yomimvo dhapiti omanga oshilongo sha li inaa shi manguluka. Oshi ithanene shika osha li she eta pamwe aadhani aakulu mboka ya li ya tungu po oospana mbali yimwe oyaatiligane nonkwawo oyaaluudhe, ndhoka dha li dha dhana lwotango uudhano wopambili pokati komihoko pethimbo okatongotongo kali ka yaga kegonga moshilongo shika.

Albert Tjihero oye ali kapitiya gwospana yaaluudhe mepipi lyomimvo 19. Okwa li wo omudhani gwokonima mospana African Stars pethimbo a taamba oshinakugwanithwa shoku kwatela komeho ospana yaadhani 11 yaaluudhe, oku ka dhana naandjoka yaatiligane omumvo 1975. Tjihero ngoka eli omunafaalama gwiimuna hamunu noludhi lwo Brahman okwa lundile ewiliko lyetanga kutya itali longo sha oku yeluthapo omuthika guudhano wetanga lyokoompadhi moshilongo.

“Otashi uvitha nayi oku tala uudhano mboka tawu dhanwa kaadhani yopethimbo ndika itaa wu nyanyudha nonando mbaka oye na iipumbiwa ya gwana yoku idheula okuyeleka naadhani yopethimbo lyetu,” osho Tjihero a ti.

“Andola emanguluko olya thikile kuyele ando aantu ngaashi ooGunter Hellinghausen na ngame itatu ihepeke noku faalama, oshoka ando tse oomilionaire oku pitila muudhano wetanga lyokoompadhi. Otandi ti ngaaka oshoka tse otwa li niitalendi oku dhana pomuthika gwopombanda gwopaigwana,” osho Tjihero a gwedha po.

Omudhani gwokonima nguka okwa li iilongele edhina kuye mwene sho a enditha ospana yo African Stars oku yi fala momasindano muudhano wetanga lyokoompadhi pethimbo uudhano mbuka wa li wa dhanwa komihoko adhihe pwaana ondjoolola. Okwa li wo a kalelepo oshilongo she nawa muudhano wooprovince mekopi lyo Currie Cup moSouth Africa.

Tjihero, omumwayinamati omukuluntu gwakapitiya nale gwo Brave Warrior, Bimbo Tjihero .

Omunawino muudhano wetanga lyokoompadhi moNamibia, Willem Hans, ngoka oye ta pewa epapa moku enditha nawa ospana yoBlack Africa oku yi fala komasindano ogendji, oku pitila momadheulo gopashinanena omanga ali ta longo posikola ya St Josephs Secondary School (Dobra), okwa li a yolitha mboka ya li poshiindingili shoka sho eya hokololele onakuziwa eshi ningi moShindowishi.

“Otandi indile aawiliki yuudhano wetanga lyokoompadhi opo ya longekidhe oshigongi naayehe mboka ye hole etanga opo tu kundathaneni nkene tatu moneni ondjila ombwanawa oku kutha mo uudhano wetanga lyokoompadhi mesilu moka wa fa wa tindila noku wu fala mondjila yuukilila,” osho a indile.

Hans okwa ulike okwaa na mbili kwe nomuthika guudhano wetanga lyokoompadhi unene tuu moosekundosikola, a ti onkalo ndjika oyi na oshilanduli oshiwinayi ke yo komeho muudhano wetanga moshilongo.

LEAVE A REPLY

Please enter your comment!
Please enter your name here