Olye e na ku kufa ovaMululani modima

0
166

Komutoolinghundana

 

ONGWEDIVA – Ovakali momaumbo aDBC naNHE koshitukulwa shaMululani modoolopa yaNdangwa, okudja nghee omaumbo avo a tungwa po fiyo onena omapandaanda kolukanda oko okwa dima.

Nande oovene vomaumbo kombinga yaMululani va lopota oudjuu wavo kombelewa yaMuni waNdangwa, kombinga yomulaulu momudingonoko nande momapandaanda mwa dikwa eepaala dolusheno, oule weedula dihapu eepala inadi kwatakanifwa neengodi dolusheno. Omukwashiwana ou ina hala ku tumbulwa kedina, okwa lombwela oshifo shaKundana kutya, eembudi odi hole oku kupaula omamanya kombada yomaumbo aapo pokati kotundi onhi-00h00 no-01h00 youfiku. Omukwashiwana ou ta ti, omaumbo ashike amwe po e na eelamba dopondje, eshi oshidjuu kovashiinda vaapo oku pukulula opolifi ngee ya lopotelwa eembudi hadi fikamene omaumbo oufiku, noha di hondama moixwa nomomwiidi  wa fufuma opo.

Omukwashiwana ota ti, oudjuu wavo nande ve u lopota luhapu kelelo lodoolopa yaNdangwa oule weedula dihapu nghee sha  nyika oshiponga.

“Ovanambelewa vaMuni waNdangwa ova nyamukula nge lwoikando ihapu ndi twale ekemo lange koNORED. NORED ta shuna nge kumuni ta ti muni na landule omukalo u li mondjila, shaani NORED ota dulu ashike oku tula po omalamba ngee va pulwa oku pitila mombelewa yelelo lodoolopa,” omukwashiwana ta tumbula.

Omukali modoolopa ta nyeyeta yoo kombinga yoimbodi ya ndubalala hai ilwa po ashike mOmatitatu  sha totifa po omatoto oimbodi mape mokati komaumbo. Ta ti, ovanambelewa vamwe ova lombwela oshiwana shi dike opo oma londwela ovakalimo vakwao vaha tule po oimbodi.

Meenghundafana noshifo Kundana, omunambelewa omukwateli komesho modoolopa yaNdangwa Martin Elago, okwa pandula omukwashiwana ou, ta pula aveshe ve na omaudjuu oludi eli modoolopa vaa ete nemanguluko kombelewa ngee pamushangwa ilo ve uye voovene kombelewa.

“Ombelewa oi lile po oku yakula oshiwana, ngee ke na oumbada ne uye nombili, otwa hala oku  shikula ehokololo olo. Onda lombwela umwe omunambelewa a ninge elongekido okudja momutengenekwafaneko woneudo ku temwe  eelamba momapandaanda a dima.

“Kombinga yekako, ovanambelewa ova tukulilwa oinakuwanifwa yokupatorola eembinga adishe dodoolopa nokweeta ouyelele kombelewa,” Elago ta ti.

Okwa weda po kutya, oovene vomaumbo otava dulu ku tonga eenomola domaumbo aapo pe na oudjuu shi pupalele ovayakuli.

Kombinga yeyandjo lomandoloma oimbodi taa tongwa, nale okwa li haa yandjwa oshali, ndee oshiwana ihashi a kwata nawa amwe a dilwa omite amwe a ningwa oikwatelwa yomalodu. Paife ohaa landwa N$203.15 nelelo otali faneke a kale haa futwa komwedi shi pupalele ovalandi.

Mekwatafano neyandjo leyakulo kovakali aveshe modoolopa, Elago ota ti, kashi pu oku wapaleka omutungilo wodoolopa ya tamekwa nale komufaneki e li li, i yadi omalukanda eenhulilwa. Oshi na ombilixa okulongekida edu, shi dulife okuwapeka omalukanda makulu. Onghee oshiwana nashi li didimike, ewiliko lodoolopa otali kendabala ku yakula aveshe naasho li kwete po ndee hamefiku limwe.

LEAVE A REPLY

Please enter your comment!
Please enter your name here