Ondjele yomeva efundja ota i shuna pedu

0
196

Komutoolinghundana

 

ONGWEDIVA – Nonande Namibia a mona omuloka muwa neudo, ondjele yomeva efundja oo a li taa hevele moyana ihapu yokomumbangalanhu oya shuna nale pedu.

Paenghundafana noshifo Kundana omunambelewa omukulunhu  woshitukulwa shounongononi womakungulukilo omeva hano oGeologist koWestern Cuvelai Basin, Ronney Hango, odula oya pauka  muFebuluali 16, 2014  ye ya nomidimbi da twikilafana oule woivike  ivali fiyo omokati kaMaalisa.

“Nonande ekufikufi lomeva la pita  moyana yaCuvelai la uka moyana yokombinga yokoutokelo lukadi laNamibia, inali ya ta li endelele.  Mexuliloshivike la dja ko, natango ekufikufi  limwe linini ola dilila vali kombinga yokevale moAngola,  la pita peengaba la fika moshilongo.  Ekufikufi eli, ola finda moyana ya tavakana ombinga yomoushilo okudja Ongenga fiyo Okokatope moshitukulwa shaHangwena. Paife otali pwiinine shaashi ha itukulwa aishe ya lokwa mafiku aa. Ashike nande odula inai diinina vali shi dulife opo, Namibia otaka mona eteyo lihafifa neudo”, Hango osho a weda po.

Hango okwa fatulula kutya, nande odula ya temuna petameko laDesemba wodula ya dja ko, oshiwana osha kala momalimbililo eshi odula yakala ya twala oluteni  Januali aushe.

Konima yoivike ivali ya pita po, eefikola di dule pomulongo moshitukulwa shaMusati, oda li da pata omolwa ondodo yomeva ya lepala nounona inava dula ku tauluka oyana. Ovalongifi voitauwa ihapu moshitukulwa shaMusati noshaHangwena, vahapu omalweendo avo okwa iwa moshipala kondodo yomeva ya nyona oitauwa.

Ovalongifindjila vahapu voshitauwa Omafo-Outapi, ova holola enyeme lavo molwa eenhopa dimwe dixupi da tungwa pomapitilo omeva doo oda tungwa noumbululu vaniingholi. Eshi, osha etifa omeva a finane ponhele imwe noku li fininika opo  taa mono oupitilo.

Onghalo ei luhapu oya eta opo novashingimatuwa vamwe va dame moitauwa ya nyonwa komeva.

Ondodo yomeva paife oya shuna poshi moyana aishe moitukulwa ei ivali.

LEAVE A REPLY

Please enter your comment!
Please enter your name here