Uudhano womihoko adhihe wetanga lyokoompadhi wa dhimbulukiwa

0
197
Ohashi kutha omulumentu gwoshili oku gandja ombili. Omuhikihiya nale Wolfgang Ekerer gwomimvo 78 okwa zimine kutya okwa li a nyokoma ospana yaaluudhe omumvo ngoka 1975 muudhano wopambili.

KuCarlos Kambaekwa

 

WINDHOEK – Nonando otaya ulike ye na omimvo odhindji noshowo ya gumwa kuu kokele, aadhanitanga yomimvo dhonale mbaka ina ya kanitha eyadhimo lyawo, naashika oshe ya ningi ya fuule ayehe mboka yehole uudhano wetanga lyokoompadhi moshilongo.

Konyala opwa piti omimvo 40 konima sho aatiligane naaluudhe  ya li ya  dhana uudhano wetanga lyokoompadhi wopambili lwotango, mboka wa pala ondjila okweeta po uudhano womihoko adhihe moshilongo sha li hashi ithanwa South West Africa kohi yepangelo lyokatongotongo.

Aadhani mboka ya dhanene uudhano mbuka mesiku 5 lya Kotoba 1975 pokapale ka Suidwes Stadion, (Hage Geingob Stadium ngashingeyi) oya tsakanene ehulilo shiwike  lyayi  metsakaneno lyu udha enyanyu. Metitano konyala ooperesenda 90 dhaamboka ye li momwenyo natango odha li  po Godwana Lodge pondje ya Venduka oku dhimbulukwa omasiku omawanawa gonale.

Onkundana yesiku ndyoka onene oondjoka yeimatulo lyomuhikihiya guudhano mboka womo 1975, Wolfgang Ekerer sho a ti okwa nyokoma ospana yaaluudhe owina  sho a gandja openalti yaashiwike mpoka ya zi, na okwa pitika ndjika yi thangwe iikando itatu, naandjika oya fala mpoka uudhano mboka wu kale wa dhanwa shi thike pamwe ookoola ndatu dhomu ndatu.

“Okupopya oshili yoyene ka sha li tashi kala shi li nawa nenge tashi taambwa ko pankalathano kaatiligane kutya oya dhengwa kospana yaaluudhe. Ishewe okwa li tashi ka sitha epangelo ohoni onene oku uva kutya aatiligane oya dhengwa kaaluudhe, onkene onda dhiladhila kutya uudhano ngele owa dhanwa shithike pamwe otashi kala shili nawa, oshoka oospana adhihe odhi thike pamwe,” osho Ekerer gwomimvo 78 a ti.

Omanga mboka ya li ye mu pulakena taya yolo.

Aadhani oya kala taya popithathana pwaana uupyakadhi washa, moku dhimbulukwa shoka sha ningilwe omimvo dha pita po, na ayehe oya tsa kumwe kutya uudhano wetanga mboka owa dhana onkandangala moku loteka uuhwenge pokati komihoko naashika osha fala sigo opo ku teka po kwo katongo muudhano pokati komihoko.

Etsakaneno ndika lyopandjokonona olya etwa pehulilo nuudhano waadhani yahamano kombinga mboka wa dhanenwa pokapale ko Ramblers komatango gOlyomakaya ga ziko.

Aadhani yomagulu ga kulupa yoo  Doc Naobeb, Gunther Hellinghausen, Ivo de Gouveia, Max Johnson, Steve Stephanus, Hasso Ahrens, Archie Ochurub, Bonnettie Neilenge, Ronny Dagnin, Siggy Hacker, Gawarib Urib, Bobby Ihlein, Mathew Amadhila na Puffy Rahn oya nyanyudha aatali yetanga oyendji yomuyo  ya fuulwa kuunyakwa waadhani mbaka.

Ospana yaaluudhe oyo ya sindana uudhano mbuka nookoola 3-2 ndhoka dha thangelwamo ku  Johnson, nAmadhila, omanga ookoola dhospana yiilumbu odha thangelwamo ku De Gouveia.

LEAVE A REPLY

Please enter your comment!
Please enter your name here