WHERE OTHERS WAVERED – Ekondjo mokommittee yIigwana Hangano

0
322

Ekwatathano pokati ka Britania na South Africa lyokatongotongo olya li tali nkundipala.

Omumvo 1961 South Africa okwa thigipo oCommonwealth omolwa okuthiminikwa eshi ninge kOmuprima Minista Nehru gwa India, Omuperesidende Nkrumah gwa Ghana, kOmuprima Minista Diefenbaker gwa Canada noshowo kOmuprima Minista gwa Malaysia, Tung Rahman. Kakele komishangwa dho manyenyeto ndhoka twa tumine kOmutumba gwAayehe gwIigwana Hangano noshowo omushangwahokololo gwIigwana Hangano moHofa yUuyuki yOpaigwana mo Hague, iilongo iinankondo yokUuninginino unene tuu Britania oya tsikile noku yambidhidha South Africa lyokatongotongo opo a tsikile oku kala ta kondjele South West Africa.

South Africa okwa ndhindhilike kutya opena oshiponga unene tuu oku shi talela moonkambadhala adhihe ndhoka dha li ta dhi ningwa oku mu tidha mo South West Africa.

Ndhika ongashi iihokolola kOmpangu Yuuyuki yuuyuni moHague, etindo lya South Africa oku pitika okommittee yOshigongi shAayehe shIigwana Hangano opo yi ka talele po South West Africa noku tala onkalo yaavalelwamo.

Onkene omumvo 1961 South Africa mwene okwa hiya osheendo shIigwana Hangano opo shi talelepo South West Africa oku konakona omalundilo ngoka ga ningilwa epangelo lyokakombo noludhi.

Omumvo 1962 osheendo sho UN mewiliko lyomuprofesori Febregate gwa Uruguay osha ndopa oku ya moSouth West Africa, molwashoka South Africa kali a zimine etalelopo ndyoka.

Oshikwawo epangelo lya Britania olya kuthapo uuthemba woovisa  dhosheendo shika, okuya mo Bechuanaland nelalakano oku ka kundathana naaHerero mboka, ya li muundjendi moshilongo shoka momikunda dha Maun na Ghanzi.

AaBritania oya kuthapo uuthemba woovisa dhosheendo shika, molwashoka shika osha li sha tindi oku uvaneka kutya ngele osha pewa uuthemba oku ya mo Bechuanaland itashi ka iyakela moSouth West Africa.

Oshinima shika osha yi moshipala omathaneko getu. Omukwaniilwa Hosea Kutako na Witbooi pamwe noSwapo oya nyolele Amushanga Ndjayi gwIigwana Hangano ontumwafo, taya nyenyeta noku ulika oku uva nayi kwawo sho okomitee yo UN ya ndopa oku ya mo South West Africa.

Mu Mai 1962 etalelopo lyomunashipundi  gwokomitee yoUN moSouth West Africa olya li oshinima, shi sitha ohoni, shoka sha ulike kutya Iigwana Hangano oya li ya gama ku South Africa ngele tashiya moku mu thiminika, opo a longekidhile South West Africa naantu ye emanguluko.

Omunashipundi gwokomitee ndjoka okwa li, Victor Carpio omuPhilipino omanga omupevi gwe omuBrazil, Salvador Martinez de Alva.

Mboka ya gandja omakemo gaantu ya South West Africa kokomitee yoUN oya kwatelamo, Emil na Putuse Appolus, Solomon Mifima, Peter Mueshihange na yalwe ya li ya kalelapo SWAPO opamwe na Ngavirue noshowo Kozonguizi taya popileko oSwanu.

Pethimbo ndyoka Daniel Munamava ngoka a pitithile ndje okuza moBechuanaland okwa li mo Dar es Salaam oku holoka komeho gokomitee yoUN opo aakwashigwana aapopi yelaka lyoshiHerero mboka ya li muundjendi moBechuanaland ya pitikwe oku shuna ko South West Africa mbala shampa ashike South Africa a etha oku pangela oshitopolwa shika.

Pahokololo lyo UN Munamava okwa li ta vulu oku shuna ko Bechuanaland molwashoka okwa li e na oppassporta ya Britania. Oohailwa Ismail Fortune  na Louis Nelengani oya gandja uumbangi mo Cairo, ngaashika wo shaningwa ku Moses Katjiuongua nooyakwawo yaali  iilyo yo SWANU.

Mu Desemba 1962 Ompangu Yuuyuni oya tokola kutya oyina oonkondo oku ninga omatokolo moontamana pashitokolitho oshitheyali shomandaata.

Shika osha pe Ethiopia na Liberia ongo iilyo yo League of Nations  uuthemba oku tala kutya oshilongo shoka sha pewa oshinakugwanithwa pamautho gomandaata osha gwanitha ngoka ngaashi shina oku kala. Edhiladhilo ndika olya tokolwa nomawi  gahetatu taga kondjithwa komawi gaheyali.

Ihe shika osha ulike kutya Ompangu Yuuyuni  oya gandja eiyuvo lyawo kutya oUN oya thigululapo oshinakugwanithwa shoku tala kutya omandaata ngoka ga pewa iilongo yontumba oga gwanithwapo ngaashi shi na oku kala.

Omolwa shika Oshigongi shAayehe osha ningi etokolo opo pu totwe okomitee yowina ndjoka tayi kala no shinakugwanithwa okulongekidha oshigongi shoka tashi ka nyola ekotampango lyaSouth West Africa lya manguluka, noshowo yi na oshinakugwanithwa okudheula aathiminikwa yomo South West Africa miimpungulonga ya yooloka, no ku dhika po ombelewa yoUN mo South West Africa.

Mu September 1961 onda yile ko Belgrade oshikando oshitiyali twa ende pamwe nomunambelewa gwa UNIP, Kamalondo ngoka a li omukalelipo omukuluntu ko Britania oshowo pamwe nomukalelipo gwa FLN ya Algeria.

Osheendo shetu otwa yile oku ka kala moshigongi shedhikopo lyehangano lyo Non-Aligned Movement, shoka sha longekidhwa noku edhililwa kOmuperesidende Josip Broz Tito gwa Yugoslavia.

Mboka ye etapo edhiladhilo okudhika po ehangano ndika inaali gama ombinga oyo Tito gwa Yugoslavia, Kwame Nkrumah gwa Ghana, Modibo Keita gwa Mali, Jawaharlal Nehru gwa India, Sukarno gwa Indonesia, Nasser gwa Egipiti, Sekou Toure gua Guinea-Conakry, Banderanaike gwa Ceylon na Archbishop Makarios gwa Cyprus.

Piigongi niithanene ayihe yopaigwana ehangano lyo Non-Aligned Movement olya kwatele komeho ekondjo lyaantu yeli muukoloni naathiminikwa moAsia, Africa na Latin America.

Mu Desemba 1961, iilyo yo Swapo na Swanu muukumwe oya holola omanyenyeto gawo kokomitee ontine yOshigongi shAayehe shIigwana Hangano, ya nyenyeta kombinga yehepeko  nethipo mbinzi lyaaniilonga tali ningwa komahangano gaza pondje mo South West Africa.

Kozonguizi opamwe nOmusitagongalo Michael Scott na Markus Kooper oya li woo pegandjo lyomanyenyeto ndyoka.

Ngame onda galukile kuAfrica nda pitile moLondon moka twa dhanene Okilisimesa na Ngavirue.

Naandika olya li etalelopo lyandje lyotango koshilongo shomukwaniilwa George V ngoka epangelo lye lyali lya pewa omandaata koLeague of Nations pehala lyoUniona ya South Africa.

Meni lyoshilongo SWAPO okwa li a mena omidhi mokati kaakwashigwana, nepangelo lyokatongo lya South Africa olya mono kutya osha li oshidhigu oku dhipaga ongundu ndjoka, nonando olya li lya kambadhala ngaashi tali vulu oku yi mweneka, noshowo oku yi indika andola.

Omikalo odhindji odha li dha longithwa, ngaashi oku mbandameka iilyo , oku yi kwata  noku yi hepeka ndele mbika ina yi ethapo ekondjo ndyoka.

Omahokololo oge tu adha kombinga yoonkambadhala dha ningwa kiilumbu oku shundula SWAPO na ngame.

Onkambadhala yimwe yaandjoka oondjoka yoshigongi shaningwa pOndangwa sha popithwa komuwiliki gwelelo lyuukoloni, Daan Viljoen noku Komufala gwaavalelwamo Blignaut, mboka ya indile aawiliki mboka ya li ye ya gama opo ya longele kumwe nayo ngaashi ya longelele kumwe nOmukwaniilwa Kambonde gwOndonga pethimbo ndyoka.

Oya ti” Opena yamwe ha ya popi omanyami taya lombwele aantu ngaashi, Sam Nujoma, ngoka a kutha po iimaliwa yaaWambo iiponda 10 000 noku fadhukapo nayo eta ka kutha omukulukadhi koBechuanaland.

Nguka oye omufuthi omunene, ngoka a li mokati keni, tse otwa hala okulongela kumwe nane,’.

Oya uvaneke oku gwedhela oondjambi dhaaniilonga moomina nomalutenda noshowo dhaamboka haya longo momagumbo opo mbaka kaa ya dhiladhile oku thigapo oshilongo ya ye kombanda  oku ka joina SWAPO muundjendi.

Viljoen okwa ti ye ota lombwele uuyuni auhe kutya ka shi na mbudhi kutya Ovamboland Peoples Organization ina yi hala oku longela kumwe naye.

Mpaka opena aantu mboka ya hala oku longela kumwe naye.

Nando oonalunanga odha popi ngaaka ina dhi tseya kutya aantu omathele oya li taya thigipo oshilongo oku ya pondje okujoina ndje muundjendi moDar es Salaam.

LEAVE A REPLY

Please enter your comment!
Please enter your name here