Meekulu Kaupovali Ebba Maria Ndevahoma Nditja e tu fiya po

0
224

Komutoolinghundana

 

Omukalimo womEkoka moshikandjohoololo shaKongo moshitukulwa shaHangwena a xulifa mepipi lomodo 74. Meekulu Kaupovali Maria  yaNdevahoma- Nditja odalele yaNgela moshitukulwa shaHangwena,  okwa dalwa  1940.04.

Ofikola younona okwe i tameka mEngela, nokonima eshi xee Sakaria shaNdevahoma a tumwa a ka hakule kOmundaungilo, okwa ya pamwe novaneumbo.

Meekulu Kaupovali Ebba Maria okwa fikola mOmundaungilo fiyo omokaumbo koukadona, omo a kolekelwa oukriste 1957-08-11. Okwa hombola nomuholike waye Fillemon Nditja 1968-08-17 meongalo laMundaungilo, nova ka tungila kEkoka. Opa pita ashike eedula nhatu eshi omushamane waye a xulifa oweenda, meekulu Kaupovali Ebba Maria okwa nangekwa moshipangelo shaNandjokwe 2014-03-12 nokonima yetando ouyahame owa divilika fiyo a xulifa 2014-03-30.

Poshivilopako sha ningwa 2014-04-05 okudilila mongerki yaElcin yaKoka moshitukulwa shaHangwena omo a kala omwiimbifi fiyo opefyo laye, ovapopi voipopiwa ove mu ndjokonona nghee a shiivika okudja peedula  dounyasha,a  shiivika nawa kovanyasha vakwao molwa oupenda waye meyakulo, omunandjungu, omudiinini moilonga yokomake, e na ohole ihe na nhondo, omutekuli nomufilishisho.

Okwa kwatela komesho etendo leengaba deongalo laKoka, eshi oye a li hamushanga weongalo petoto lalo okwa kwafela omufita nakufya Frans David  okutembula oilyo yeongalo koKongo, okwe liyamba okuwapeka nokudjaleka ongeleka , a longa moimhungulonga ya yooloka meongalo laKoka.

Pefimbo lekondjelomanguluko laNamibia okwa yakula ovakondjelimanguluko  oku va nangeka, oku va pa oikulya .

Okwa kuna ombuto youkriste meumbo, momukunda nomeongalo.

Meekulu Kaupovali Ebba Maria, mu ina ova dalwa 11, mu xe ova dalwa vaheyali. Okwa fiya po ovamwaina vahamano, ovana vahetatu, ovatekulu 25 nokatekulululwa kamwe.

Kakele kongudu inene yovahekeli vadja keembinga neembinga ovaleli veendodo da yooloka nongudu yovafitaongalo oya li poshivilopako.

LEAVE A REPLY

Please enter your comment!
Please enter your name here