Ospana yaagundjuka yo Baby Warriors ya dhengwa kaagundjuka yoMambas

0
214

Komutoolinkundana

 

MAPUTO – Ospana yaadhani yetanga lyokoompadhi yokohi yomimvo 20 yopashigwana oya tulamo okoola yimwe pethimbo ya li tayi dhana muudhano wokupita oku ka dhana muudhano waagundjuka wekopi lya 2015 CAF African Youth Championship.

Uudhano mbuka wa dhanenwa moshilandopangelo sha Mozambique Maputo owa sindanwapo kospana yopashigwana ya Mozambique nookoola 2-1 Olyomakya ga  yi.

“Osha li uudhano uuwanawa wetanga lyokoompadhi, unene tuu sho mbuka wa li wa dhanwa koospana ndhoka dhomimvo dhili kohi yoomvula 20. Kutse uudhano mbuka owa li tawu kondjitha aadhani mboka yi gilila okudhana taya gumu ya kwawo komalutu, noshikwawo oyendji yomuyo oha ya dhana muudhano woliha ya Mozambique, shika osha ulikwa komukalo ngoka ya dhana nagwo, ihe nando ongaaka aadhani yetu nayo oya ulike kutya ka ye shi yowala,” osho omuwiliki omunawino metanga gwo NFA, Klaus Staerke a ti.

Ospana ya Mozambique yo Young Mambas oyo ya tulamo tango okoola omanga omudhani gwokomeho gwospana yo Rundu, Uaseuako Katjiukua a yamukula, naasho oospana ndhika dha ka fudhapo odha li dhi thike pamwe okoola yimwe mu yimwe.

Medhingoloko etiyali ospana ya Mozambique oya ka tulamo  okoola ontiyali, ndjoka oyo ya ka ninga okoola yesindano muudhano mbuka.  Nando ospana ya Namibia oya dhengwa ngaaka , ndjika oya li wo yina ompito okutulamo okoola ontiyali.

“Onda kumithwa kuudhano mboka wa dhanwa kospana ndjika, oshoka aamati oya dhana ngaashi taya vulu, na okwa li taya vulu oku tulamo okoola ontiyali ndjoka ando ya fala opo uudhano wu kale wu thike pamwe , ihe shika ina shi ningwa molwashoka Hendry Duwe  gwospana yo Swakopmund FC okwa thangele etanga moshitenda shokoola yaaMozambique pehulilo lyuudhano.” “Momasiku 26 gomwedhi nguka otatu ka dhanena mokapale komegumbo  na kehe shimwe otashi vulu oku adhika nenge oku ningwa, oshoka metanga kehe shimwe  otashi vulika.

Otu shishi aa Mozambique oyo ye wetike taya ka sindana ponkatu ndjika , ndele ospana yetu oya ulike kutya yo otayi vulu okudhana nawa noshowo oku sindana, onkene uudhano mbuka natango inawu pwa naanaa nawa.”

LEAVE A REPLY

Please enter your comment!
Please enter your name here