WHERE OTHERS WAVERED – Oku ilongekidhila iita yoku kondjela emanguluko

0
205

Omasiku 9 Desemba 1961 Tanganyika okwa manguluka. Kuyele omumvo 1962 Julius Nyerere ngoka pethimbo ndyoka a li Omuprima Minista gwotango gwa Tanganyika lya manguluka okwa tsikile oku tu kwatha ngaashi a kala noku tu kwatha momikalo dha yooloka.

Omumvo 1962 Tanganyika okwa ningi orepublika na Nyerere okwa li oye Omuperesidende gwotango , na okwa kala wo Omuperesidende nokonima sho Tanganyika ya hangana Zanzibar noku tungapo orepublika ya Tanzania omumvo 1964. Aakolonyeki ya Britania oya li ya tameka nomulandu oku hanganitha Kenya, Uganda na Tanganyika mokati komimvo 1940. Nyerere okwa nenepeke edhiladhilo ndika mombepo yoPan Africanism moku etamo ilongo iikwawo yokuuzilo wa Africa noshowo Nyasaland, Northern  na Southern Rhodesia[iilongo mbika oya ka manguluka na oha yi ithanwa Malawi, Zambia na Zimbabwe nena] Ayihe mbika oya tungupo ehangano nomadhiladhilo goPan African.

Sho nda galukile ko Dar es Salaam okuza ko New York mu January 1961, otwa gongala naakalelipo yomahangano omakondjelimanguluko taga kondjele emanguluko  muuzilo, mokati noshowo muumbugantu wAfrica, ngaashi UNIP, KANU[ pethimbo ndyoka Jomo Kenyatta okwa li natango mondholongo], ANC, PAC,ZAPU, SWAPO, na SWANU, pethimbo ndyoka TANU okwa li nale a dhikapo epangelo moTanganyika.

Moku ya pamwe huka otwa tula kumwe omadhiladhilo ga Julius Nyerere goku dhikapo ehangano lyedhina Pan African Freedom Movement of Eastern,Central and Southern Africa, lya li lya fupipikwa PAFMECSA. Ongo ehangano PAFMECSA okwa dhana onkandangala onene noya simana moku hanganitha omahangano omakondjelimanguluko noku landula omadhiladhilo ga Julius Nyerere.

Tse otwa kala aluhe mekwatathano naantu yetu kegumbo ko South West Africa. Oshoka opo tu tameke iita yoku kondjela emanguluko otuna oku kala tuna olweendo itaalu hulu lwaantu oku za kegumbo oku ya ya dheulilwe uukwiita. Ndika olya li eshongo enene kutse onkene ndika olye tu thiminike opo tu kale mekwatathano naantu yetu koshilongo ethimbo alihe.

Inandi kanitha nando ompito nda mono oku kala mekwatathano niilyo yoSWAPO moshilongo. Ongo oshiholelwa mondjila yandje okushuna ko Dar es Salaam okuza moCairo Egipiti onda ndhindhilike kutya otwa li molweendo nomukulukadhi omukokele gwomuNdowishi, Ursula Schultz, nde mu dhimbulula sho nda mono ondjato ye ya shangwa Windhoek. Sho twa londo mondhila onde mu popitha, no ndi ifatulula kutya ongame lye. Otwa kuutumba pamwe mondhila na otwa kala tatu popi ondjila ayihe oku yak o Khartoum mo Sudan sigo oko Dar es Salaam mo Tanganyika. Okwa hokolele ndje kutya aakuluntu ye oya li ya tembukile koTanganyika moka omo a valelwa, omanga iita yotango yUuyuni ina yi tameka. He okwa li a shunithwa koNdowishi kaaIngilisa, ndele konima oya ka galukila ko Tanganyika na oya kala popepi nondundu Kilimanjaro, ndele oya ka shunithwa ishewe koNdowishi petameko lyIita iitiyali yUuyuni. Pomimvo dhomilongo 1950 oya tembukile ko South West Africa na oya li yena oshikunino shiinamwenyo nenge shoka haku tiwa ozoo, mOkahandja. Okwa li a yi ko Egipiti a ka konge oku kalanda iinamwenyo yomoshikunino shawo unene tuu oludhi luulimba uuwanawa hawu adhika muEgipiti, na okwa li nee ta endelele okushuna kOkahandja oku ka dhana Okilisimesa nefamilia lye. Osha li omasiku 22 Desemba 1961. Onde mu pe iimaliwa oku yi faalela koVenduka nde mu lombwele eyi pe hailwa David Meroro na John ya Otto, nde mu pe oonomola dhomagumbo gawo mOld Location.

Okwe shi pondola oku ya mona nokwe ya tsakaneke mondoolopa ete ya pe iimaliwa mbyoka. Omukulukadhi Schultz okwa li ena olukeno nekondjo lyetu unene tuu sho efamilia lye wo lya li lya hepekwa pethimbo lyiita iyali yuuyuni.

Okwa li eshi shi kutya otwa li ta tu kondjele emanguluko lyoshilongo shetu na okwa li a hala oku tu kwatha.

LEAVE A REPLY

Please enter your comment!
Please enter your name here