Eitaalo muuSatan tali kundathanwa poshigongi shaalongi

0
229

KuJemima Beukes

 

KEETMANSHOOP – Shimwe shomiikundathanwa melandulathano lyiiyetwapo poshigongi shaalongi moshitopolwa sha //Karas sha li ko oshiwike shika osho eitaalo lyokulongela Satan ndyoka kwa fofotolwa lili mokati kaanona yamwe momanongelo gomoshitopolwa shoka. Oshigongi shika osha kundathana wo onkalo yaalongwa omathimbo gamwe aniwa haya kwatwa koombepo dha nyata.

Oshikundathanwa shika osha tulwa melandulathano lyiiyetwapo moshigongi shika sha landula omahokololo gaana ehulilo ngoka taga hokolola aalongwa aniwa ya kala taya ponokelwa koombepo dhomilema noshowo dhuulodhi moshitopolwa sha//Karas.

Onkene oshinima shika osha tulwa melandulathano noku kundathanwa kaalongisikola.

Ihe shoka tashi kumitha ooshoka kutya sho Minista gwElongo, omundohotola David Namwandi  noshowo aanambelewa ye aakuluntu ya pulwa kombinga yaashika, oya ti omapopyo ngoka kutya aanona ohaya ponokelwa koodemoni ogo ashike oshizemo , tashi ulike uunkundi waalongi mboka yaana ontseyo ya gwana nkene yena okulonga naanona mboka yewetike taya hepekwa koompwidhuli. Namwandi okwa ti sigo oompaka kapena omukuluntusikola nenge omuwiliki gwelongo moshitopolwa a tseyithila  ombelewa  ye kombinga yoshinima shoka.

“Onda hala aawiliki yelongo ya tseyithile ndje okupitila mombelewa yaamushanga omukuluntu gwelongo, kutya oya gwililwapo koombepo dha nyata na oya pumbwa ekwatho okuza kombelewa yetu,”osho a ti.

Kombinga yaalongi yaana owino nkene taya longo naanona mboka taku tiwa oya kwatwa koodemoni , Namwandi okwa ti mboka oya pumbwa oku shunithwa kosikola yuulongi.

Omuwiliki gwelongo gwokulipo moshitopolwa sha//Karas, Jacqueline Rukamba okwa popi ndhika ongo oshiholelwa konima sho oshitopolwa she sha li sha ningi ekonakono kombinga yomahokololo gaanona ye ni we koodemoni noshowo aniwa ya joina eitaalo lyoku longela satana. Ndele oshizemo shekonakona osha ulike kutya aanasikola itaya longele ompwidhuli ndele oya li ashike taya konakona ekalepo lyaKalunga mekwatathano lyawo nomulongi gwawo. Ishewe moku konakona hoka aalongwa kaya li ya ningi aasimaneki yondeveli nenge andola aalanduli yayo.Ekonakono ndyoka olya li lya ningwa sha landula sho kwa kundanwa kutya pomanongelo gamwe moshitopolwa shoka omuna aanona taya longele satana nongundu ye, naashika osha li sha kwatelamo omulongi gumwe aniwa.

“Onda mono kutya aanona oya tala mo internet momahala ngoka taga popi kombinga yasatana, shaashi ashike ya li ya hala oku tseya oshindji kombinga yoshinima shoka na oya li taya konakona noku tala ngele oku na Kalunga.

Otwa mono ishewe kutya mbaka okwa li ya hala oku toetsa aasita yawo,’Rukamba a ti a gwedha ko kutya aanona oya longitha ongulumambo yoshigwana poKarasburg oku ninga omakonakono kombinga yasatana nongundu ye.” Omumvo gwayi omulongwa gumwe mograde 10 poseko ya Theresa poTses moshitopolwa sha //Karas okwa li a ti okwa kungu uuti konima sho a ponokelwa koodemoni aniwa.

Omwaalu gulwe gwaalongwa nago ogwa li gwa igidhagula , gwa kungu, gwa lili nogwa yayagana mevundakano aniwa pethimbo gwa ponokelwa koombepo dhomilema.

Posikola yoprima omulongwa gumwe okwa li a ti aniwa okwa tetwa komuntu itaa monika.

Ye omuntu ngoka omulongwa nguka, okwa ti aniwa  okwe mu luku omadhina  ye aniwa ta itaalitha ooya kwawo kutya nguka ota ehama momutse.

Iiponokela yoodemoni mbyoka itayi adhika ashike momanongelo ngoka gomoshitopolwa sha//Karas osho ashike ndele mbika oya hokololwa wo ya uvikwa okuza kiitopolwa ngaashi sha Hardap, moka omulongwa gumwe a li aniwa a gandja yina kondeveli pethimbo lyokugalikana ndjoka.

Ko ta ku tiwa aniwa yina yomunona nguka okwa ka mana oondjenda moshiponga shoshihauto konima yomasiku gaali sho omwana a galikana noku gandjapo yina miikaha yondeveli.Yina aniwa okwa li asi mondjila oku ya koVenduka okuza ko Rehoboth.

Kuyele nuumvo opwa li omahokolo gaanasikola penongelo lya Mvula aniwa ye niwe koodemoni, naashika osha thiminike aakuluntu ya indile opo aanona ya ningilwe egalikano omolwashoka oya kwatwa koompwidhuli.

LEAVE A REPLY

Please enter your comment!
Please enter your name here