Gwashilongo a fumvikwa pOnayena

0
520

KuMaria Namupala

 

ONAYENA- Omukalimo gwomomukunda Onayena mOndonga kuku Hilma Nandago Amukugo a tseyika nawa nedhina Gwashilongo, ngono a manene oondjenda dhe momasiku ga heyali (7) ga Apiilili omvula ndjino moshipangelo shaNandjokwe konima yuuwehame mepipi lyomimvo omilongo omugoyi (90), okwa fumvikwa ehuliloshiwike lyayi pegongalo lyawo Onayena.

Gwashilongo ngono eli omukulukadhi gomusita omukulu gwegongalo Onayena nakusa tatekulu Armas Amukugo ngono naye e tu tetekela nale muukwaaluhe. Oye woo yina ya Joshua Amukugo  na Ndohotola Elizabeth Amukugo oku tumbulapo ashike oyana yamwepo.

Okwa fumvikwa Olyomakaya ya ziko kengathithi enene okuziilila mongeleka yawo Onayena. Pefumviko lye opwali pwa  kalwa kaakwanepangelo oyendji ngaashi Peya Mushelenga Ominista yOpevi yIikwapondje, Omundohotola Nicky Iyambo Ominista yAakondjelimanguluko.

Fillemon Malima,yimwe yomoominista dhotango mepangelo lyOmukokoliperesidende, ookansela yiikandjohogololo ya yoolokathana, aasita yaza komagongalo ga ELCIN, naatondokinkugo yaza koombinga noombinga dhoshilongo. Omusita Frans Imene okwali a mono ompito opo a popithe aalilasa ayehe noku hokolola paufupi nkene  aaholike mbaka ya kala yena ombili nohole megumbo lyawo, ta tumbula kutya oya putudhile aanona yawo uukriste.

Ayehe yali ya mono ompito oku tya sha oya hokolola Gwashilongo onga ali omuntu omunambili, ehole kwiimemeha ethimbo alihe, ena etiloKalunga, omumweni oshowo omwiifupipiki.

Ondjokonona ye oya leshwa ku  Eliphas Imene, Omukuluntusikola gwoseko ya Nehale, ewi lyoyana tali gandjwa ku Elizabeth Amukugo ngono a ti nonando aakuluntu yawo ayehe ya hulapo itaya kanitha omukumo oshoka Kalunga oye mwene ha gandja na oye ha kutha.

Meme Elizabeth okwa ti ita ya dhimbwa omatumbulo niitya yetsomukumo mbyono Gwashilongo eya thigila, na oyena oku landula ondjila yuukriste mono ya putukila.

Kuku Gwashilongo okwa thigiko oyana yane (4), aatekulu omulongo na yatatu (13), uutekulululwa utano (5). Omuholike gwe noyana yane oye mu tetekele nale muukwaaluhe.

LEAVE A REPLY

Please enter your comment!
Please enter your name here