NTTA a tameke oku humitha komeho uudhano wotenisa maagundjuka

0
235

Komutoolinkundana

 

WINDHOEK – Ehangano lyuudhano wa  Namibian Table Tennis Association (NTTA) olya tameke nelongekidho lyalyo lyokudheula nokuhumitha komeho uudhano mbuka mokati kaagundjuka sho lya tameke nomadheulo gakwata miitii guule wiiwike itatu kohi yekwatelo komeho lyomudheuli guudhano mbuka Chiang Lin, ngoka oye mwene gwehangano lyomoKapa lyedhina Tony’s Table Tennis Academy.

Elalakano lyomadhewo ngaka olyo oku hwepopeka okudhana kwaadhani yomoNamibia noshowo okutothamo mboka yena iitalendi yoku dhana uudhano mbuka opo ya dheulwe nawa oku ka kalelapo Namibia momathigathano ngaashi ndyoka lya Zone 6 tali ka edhililwa ku Namibia omumvo tu uka.

Omudhani gwotenisa ndjika nale Shane Obermeyer okwa li moNamibia oku longekidha ospana yaakuluntu omolwa uudhano wekopi lyuuyuni mboka tawu dhanenwa moJapan. Okwa li wo akwathele  momadheulo  gospana yaagundjuka.

Elongelokumwe olya tameke noonkundathana newilkongundu lyo Table Tennis Board omumvogu ndyoka lya indile Chiang Lin opo a kwathele mehumithokomeho noshowo mokudheula.

Olupandu otalu pewa aayambidhidhi yuudhano mbuka ngaashi HRS Consultants CC, Saunderson & Company na Sunflower Travel & Tours mboka ya kwathele opo elongelokumwe ndika li ninge lyoshili. “Onda li nda kumwithwa keitulemo lyaamboka ya kuthombinga muudhano nomomadhewo ngaka unene tuu sho aakuthimbinga yamwe ya ende ondjila oonde opo yee ya kale pomadhewo ngaka.

Kehe gumwe okwa li ena eitulemo na ngame onda li nda uvu nawa kombinga yaashika,’osho Chiang Lin,a ti ngoka wo eli omudheuli gwospana yoWestern Province .

Nando okwa li ena oku tameka nomadhewo gopevi manga omolwa aadhani yamwe mokati kaamboka omilongo 20, , Chiang Lin okwa nyanyukilwa shoka sha longwa po kaanona mboka moku idheula.

Okwa popi einekelo lye kutya Namibia ota ka ninga shimwe shomiilongo iinene muudhano wotenisa yokoshitaafula.Ngele aagundjuka mbaka oya kala noku idheula neitulemo enene nawa noshowo ethimbo olindji.

“Oshipatulo mwaashika osho oku idheula  esiku kehe noshowo oku gandja iilongitho kaagundjuka mbaka. Uuna shoka sha ningwa kandi wete nando etompelo kutya omolwashike Namibia itaa ningi shimwe shomiilongo mbyoka tayi longo nawa moku dhana uudhano mbuka menenevi ndika. Iitalendi omo yili muka shoka sha pumbiwa osho owala oku yi humitha komeho nawa,’ Chiang Lin,a ti. Okwa ulike wo kutya okuna ehalo oku itulamo moku humitha komeho aagundjuka mbaka ngele oya uvathana nawa na NTTA.

LEAVE A REPLY

Please enter your comment!
Please enter your name here