Rauha Shomongula oye Miss DAPP Outapi Cultural Festival 2014

0
434

KuClemence Tashaya

 

OUTAPI – Konima  ashike yiiwike iishona sho omwiilongi moshilongwa sho Community Development ondondo ontiyali a piti oshilongwa shoka, nguka okwa sindana wo oshishani shoMiss DAPP Outapi Cultural Festival 2014.

Omusindani nguka oye Rauha Shomongula.

Oshituthi shopamuthigululwakalo shika shopenongelo lya DAPP Outapi Vocational Training oshi na elalakano oku kumika aakiintu aagundjuka opo ya ulike iitalendi yawo  moshitopolwa sho ku ulika iizalomwa noshowo nkene mbika ha yi zalwa noku opaleka omuzali gwayo. Unene shika ohashi ningwa omumvo kehe oshoka oshitopolwa shopamahupilo shoka shoku ulika nenge oku modeling otashi humu nawa komeho moNamibia.Omulongekidhi gwoshituthi shika penongelo lya DAPP Outapi VTs, Scholastika Embashu okwa ti shika osha li sha longekidhwa oku dhana omithigululwakalo dhendiki ndyoka lina aalongwa ya za komahala gomithigululwakalo dha yooka.

“Ohatu ningi oshituthi shika shoonkuluhedhi kehe omumvo  na otwa nyanyukwa sho nonuumvo otwe shi ningi noku shi enditha nawa.

Otuna aakiintu aagundjuka pendiki mpaka taya ilongo na otwa hala oku ya egululila oompito omanga yo ye li mpaka menongelo taya ilongo.

Otwa hala oku ya egululila ndhika omanga yo natango ye li aagundjuka omanga inaa ya ya moshigwana noku ka hepekwa pondje mpoka tashi vulu oku ningwa,” Embashu a ti.

Pethimbo lyoshituthi shomithigululwakalo aakadhona omulongo oya li ya kuthombinga methigathano ndika moongundu dhili ne. Helvi Taapopi (20) ti ilongele oshilongwa shoCommunity Development oye eya a landula Miss DAPP ongoprincess gwotango noshowo omuntu gwaantu ta landulwa ku  Hendrina Shikongo (19) ongo oprincessa ontiyali, omanga omwiilongi mondondo ontiyali yEwiliko lyOmbelewa, Martha Mbenzi 21 oye omukadhona ha opala nawa momathano.

Rauha Shomongula okwa uvaneke ta ka thigathanapo naakadhona ooyakwawo aawanawa pethimbo lyomauliko gomukadhona omwaanawa pomauliko giipindi mOngwediva oshowo ngoka gOlufuko gopOutapi.

“Onda hala oondjodhi dhandje dhi ninge dhoshili nenge dhi  tse, na ondina einekelo kutya ongamba opo ndi adhe oondjodhi ndhika oyo ashike egulu. Nandi mane ashike manga eilongo lyandje ngame no tandi ka thigathanapo naakiintu aawanawa ooyakwetu aaNamibia mboka wo taya ka kala methigathano ndika.

Otwa pumbwa omahangano goongeshefa ga dhimbulule wo kutya natse mboka ha tu zi moondoolopa ndhika ooshona  ngaashi Outapi otwa pumbwa woo omathigathano ngaashi ndika taga kala haga ningwa omumvo kehe.’ Osho a ti.

Helvi Taapopi okwa pe aanangeshefa omayele opo ya egululile aagundjuka oompito miitopolwa yomainyanyudho.

“Inatu dhimbwa po wo ongushu yomithugululwakalo dhetu, onkene aakuluntu oya pumbwa  oku longa oyana kombinga yoohedhi oonkulu dhaantu ya Namibia.

Oyena oku longa noku gandja uuthiga womithigululwakalo kaanona yawo nokaatekulu yawo, lyo ndika olyo limwe lyomatompelo DAPP yopOutapi hayi kala aluhe noshituthi shomithigululwakalo omumvo kehe.

Aakuthimbinga oya pewa iitsa kokupopya kwawo nawa momeho goshigwana, uuwanawa wawo wokolutu eholokepo lyawo nosho wo oku katuka kwawo komeho goshigwana. Aagandji yitsa oya longo wo moku ya tutsa ontseyo yawo yina sha nondjokonona yaaKwaludhi,Aangandjela, Aambalantu nAakwambi mboka oyo ye li aantu yomiyalu ominene momudhingoloko moka osikola yo DAPP Outapi  ha yi gandja elongo lyayo.

Miss DAPP Outapi Cultural Festival otaku hokololwa oye omukiintu gwothika onde, a ngungumana ye omwaanawa , ye nguka okwa hala oku ka kuthombinga methigathano lya Miss Olufuko pethimbo lyomauliko golufuko pOutapi mu Auguste nuumvo.

Hendrina Shikongo ngoka uulikwa oprincessa ontiyali ota ilongo oshilongwa shontseyo yongeshefa noshowo uuhamushanga, na okwa ti okwa nyanyukwa oku mona aantu ya yooloka ya za mOmusati taya longele kumwe omolwa uuwanawa wopamuthigululwakalo.

“Aawiliki yetu naakuluntu yetu moshitopolwa shika na ye tu longe okuza, kuyele kombinga  yomithigululwakalo dhetu unene tu sho tse tu li oshigwana shokomongula na otwa pumbwa oku tseya oohedhi dhetu wo.

Oshituthi shomithigululwakalo shoDAPP Outapi cultural festival 2014 osha li sha kwashilipalekwa ku  Ms Enkono, Mr Hamunyela, DAPP VTS, TRCs noshowo oshigwana shomOutapi nomudhingoloko.

LEAVE A REPLY

Please enter your comment!
Please enter your name here