Wilika monkalo tayi nyengathana

0
258

KuMaria Namupala

 

ONAYENA – Wilika Aukus okanona koomvula 14, komondondo onti- 4 posikola yaNyuulaye moshikandjohogololo Okankolo, okeli monkalo ta yi nyengathana.

Wilika ye mwene gumwe gomuunona mbono wa valwa kaa wuna oondunge nawa, ye oha popi owala ethimbo limwe. Nonande eli mondondo ontine ngeyi okwa yamo ashike u undulwa.

Okanona hano oka yambukile momukunda hagu ithanwa Onamukuku. Meme Hilalia Lumbu omulongi gwa Wilika okwa lombwele oshifo shika kutya Wilika okuna uunkundi wopamadhiladhilo nolundji ngele ta pulwa sha komulongi iha yamukula, ye oha popi owala ethimbo a hala ashike oshitya owala shimwe nenge iyali ye ota mwena.

“Okanona hano ka keshi okulesha, nedhina lyako okanyengwa owala okuli shanga, ngele owe ka pe oshilongadhalwa nooyakwawo ohaka shanga owala iipolopolo, oka pumbwa esiloshimpwiyu lya gwana,” Lumbu ta ti nga.

Okwa gwedhako woo tati Wilika sho eya posikola mpono okwa li eli monkalo ta yi limbilike ashike sho a kuthwako komusamalia omunamutimahenda a kale te mu tekula onkalo ye otayi ende tayi, ya hwepo ngaa nonande ta nyengwa okwiitulamo miilongwa ye yosikola.

Omutekuli gwa Wilika ngono a tseyika owala nedhina Simsolia okwa ti okwa kala nokanona hano ethimbo ele ngaashingeyi, eka kutha ku yina yako sho ka kala noku monithwa iihuna ko itaa ka silwa nande oshimpwiyu.

“Kandishi kutya yina ya Wilika okuli peni oha dhumwa ngaa anuwa eli momikunda dhopopepi ashike ihe ya nande a talelepo okanona ke, Wilika okwa kala noku hepekwa sho, osho ndi wete sha eta uunkundi mbuka muye” Meme Simsolia ta ti nga.

Meme Simsolia okuna ehalo nedhiladhilo opo a fale Wilika kosikola yEluwa ye a ka longwe pamwe nooyakwawo  mba yena uunkundi wopamadhiladhilo pamwe onkalo ye tayi galukile kuuwanawa.

Okanona hano oka pumbwa omuzalo gosikola oshoka ndjoka kali kena oke yi kanitha, niinima olundji nenge oku landelwe ota kanitha owala.

LEAVE A REPLY

Please enter your comment!
Please enter your name here