Euvathano lya Unam noshipangelo shaMedipark mOngwediva

0
322

KuNuusita Ashipala

ONGWEDIVA –Ounivesiti ya Namibia (UNAM) noshipangelo shopaumwene sha Medipark mOngwediva oya shaina euvathano lyelongelokumwe mehumitho komeho lyuunamiti nuukalinawa moshilongo. Euvathano ndika olyo lyotango tali kolekwa pokati ka Unam noshipangelo shopaumwene opo shika, shikale tashi longithwa kaanasikola yuunamiti, yontseyo yomiti opo ya vule oku ilonga pailonga iilongwa niilonga yawo.

Euvathano olya kolekelwa pocampusa yo Ingineelingi  ya Unam pOngwediva oshiwike shayi.

Omukuluntu gwoshitopolwa shOntseyo yUundjolowele moUnam, Omuprofessori , Peter Nyarongo okwa ti euvathano ndika ota li dhimbulutha oshigwana kutya elongelokumwe ndika olyo ashike okamuma okashona momulonga gwondjokonona, ndyoka tali ka kwashilipaleka kutya omaipulo kombinga yomavu itaga ka kala po we moNamibia.

Omanga omuwiliki gwoshipangelo sha Medipark, Omundohotola Tshali Iithete okwa ti eyakulo lyopaunamiti olyo oshinakugwanithwa sha kehe gumwe, kutya nee oomboka yeli moshikondo shopaumwene nenge mboka yeli miikondo yoshigwana, onkene oshasimana okugamenenapo uukolele woshigwana moku longela kumwe.

Iithete okwa itaala kutya eshaino lyeuvathano ndika otali ka etapo ehwepopalo muundjolowele nomuukolele woshigwana, noshowo otali ka kwathela oonkambadhala dhepangelo dhokuhumitha komeho uundjolowele woshigwana oku wu tula pomuthika gwopombanda okuya komumvo 2030 noshowo ngaashi ndhika dha tothwamo momathaneko gehumokomeho gopashigwana  omatine. Ishewe elongelokumwe ndika ota li yambulapo elongo lyuunamiti moshilongo noku kwashilipaleka kutya Namibia ota longo noku etapo aaneithano lyuunamiti yongushu no yena ontseyo yambwalangandja noshowo ye shi illonga yawo.

Omukanseliili gwopevi gwa Unam, Omuprofessori Lazarus Hangula sho a popi wo poshiithanene shika okwa ti euvathano ndika olyo lyotango pokati kehangano moshikondo shopaumwene noshiputudhilo shelongo lyopombanda, ndyoka tali ti oshipangelo shika otashi gandja ehala lyasho opo li longithwe kaalongwa yuunamiti mboka taya dheulwa ku Unam.

Oshipangelo shOngwediva Medipark otashi ka egululila omiyelo dha sho aalongwa ya Unam mboka taya iilongo uundohotola, ontseyo yokudhunga omiti[pharmacy] naamboka taya iilongo uupangi, opo yi ilonge iilonga yokupanga omunuuvu ngaashi hashi ningwa esiku kehe miipangelo.Omadheulo ngaka gaalongwa mbaka pethimbo ndika oha ga ningilwa ashike miipangelo yepangelo sha Windhoek Central na Katutura moka aalongwa mbaka ya kala noku idheulila okuza tuu nkene enongelo lyuunamiti lya tamekele omumvo 2010.

Iipangelo yepangelo poRundu nopoKeetmanshoop nayo oya tegelelwa opo yi kale wo tayi pe aalongwa yuundohotola, ontseyo yokudhunga omiti noshowo aapangi ompito opo mbaka yi idheulile mwaambyoka.

Hangula okwa popi einekelo lye kutya euvathano ndika otali ka hulithapo omapopyo negandjo lyuusama kosikola yuunamiti kutya otayi longo aalongwa oyendji mboka itaa ya gwanenwa oku idheulila miipangelo mbyoka iyali omo ya li haya idheulile petameko.  

Hangula okuna omukumo kutya iipangelo yilwe yopaumwene otayi ka landula oshiholelwa shOngwediva Medipark mokugandja oompito opo aalongwa yuundohotola naamboka yontseyo yomiti noshowo yuupangi ya vule oku idheulila iilonga momahala giipangelo mbyoka monakuyiwa.

LEAVE A REPLY

Please enter your comment!
Please enter your name here