Iiponga yomoondjila iishona ya holoka pethimbo lyoPaasa monooli

0
200

KuLoide Jason

ONDANGWA-Ehuliloshiwike lyopaasa ndyoka lya hulu Omaandaha oshiwike shika okwa ndhindhilikwa iiningwanima iishona yiiponga yomoondjila monooli ethimbo ndyoka. Iiningwanima iishona yiiponga yiiyenditho oya ningwa miitopolwa yokuumbangalantu nonando muka omwa li aatalelipo oyendji noonkondo mboka ya za komahala gamwe okutalelapo muumbangalantu.

Moshitopolwa Oshana omwalopotwa iiningwanima iyali yiiponga yomoondjila shimwe shomwaambika osha kwatelamo oambulansa, ndele miiponga ayihe mbika inamu kanena omwenyo gwomuntu nando ogumwe.

Iiningwanima mbika iyali oya ningilwa mondoolopa yaNdangwa moka osheenditho shekangwa sholudhi lwo Ford sha hwama omulilo omanga mwene gwasho a li te shi hingi mondjila onene pokati kOndangwa nOnethindi. 

Omuhingi gwosheenditho shoka oshowo omufaalelwa gwe kapena ngoka a mono oshiponga oshoka mbaka oye shi pondola oku zamo mosheenditho mbala mbala. 

Aantu mboka ya mono oshiponga sho sha ningwa oye shi pondola wo okudhima osheenditho shoka ya longitha omeya nomavi.

Moshiningwanima oshitiyali oambulansa yopaumwene yehangano lyo  Namibia Private Ambulances Services, oya ngwandjula noku ehameka unene omweendi gwokolupadhi gumwe ngoka a li ta kambadhala oku taaguluka ondjila mOndangwa. 

Naku ngwandjulwa nguka a teka okwaako, okwa taambelwa monaasalesa yaLutheri mOnandjokwe moka taku hokololwa onkalo ye tayi hwepopala. 

Moonkundathana ndhoka twa ningi pangodhi nomugandjimalombwelo gwopolisi mOshana, Kommishina Ndahangwapo Kashihakumwa okwa kumagidha aahingi yiiyenditho opo ya soshimpwiyu kutya iitukutuku yawo oyi li nawa okulongitha oondjila dhoshigwana.

Okwa dhimbulutha wo aayendi yokolupadhi opo ya longithe omahala mpoka yo ye na okutaagulukila oondjila, opo ya yande iiningwanima ngaashi shoka shaningilwe mOndangwa pethimbo lyoPaasa.

LEAVE A REPLY

Please enter your comment!
Please enter your name here