Omagumbo ga halakana otaga tidhile aanona miikaha yOndeeveli

0
225

KuJemima Beukes 

KEETMANSHOOP – Aagundjuka otaya iyadha moonyala dhokulongela Satan nenge muusatanisme, unene tuu ongo taya fadhukapo ehepeko noshowo oku ekelwahi hoka taku ningwa momagumbo moka ya za.

Ngaka omadhiladhilo gomusitagongalo Johnny Kitching ega eta poshigongi shaalongisikola shoka sha li sha ningwa poKaiti oshiwike shayi. 

Kitching okwa lombwele aalongi konyala yevule 200 mboka ya li moshigongi shoka , kutya pantseyo ye okwa ndhindhilika kutya aalongi noshowo oondohotola dhuunamiti odhi na mo oshitopolwa okuhilila nokuhekela aagundjuka mbaka mongundu yokulongela satana.

 “Ehepeko otali dhana onkandangala onene uuna omunona a tokola oku ya mongundu yaalongeli yaSatana. Omagumbo ngoka gena omakwatathano ga teka, omafamili itaaga longo mondjila, onda ndhindhilike wo kutya momagumbo ogendji he yaanona ngele ita gwanithapo oshinakugwanithwa she ngaashi eshi pewa paMbibeli, shika ohashi egulula omweelo opo aanona ya ka konge ohole palwe noshowo ondhilo nokuyalulwa palwe,” osho a ti a gwedhapo kutya opena omafekelo kutya esimaneko lya Satana nenge uusatanisme olya fa tali koko momanongelo moNamibia.

Kitching okwa dhimbulutha aawiliki yoongeleki kutya omagongalo na ga kale natango ge na oshilonga nomwiityo monkalammwenyo yoshigwana , moku shi gwanithila po oompumbwe dhasho dhopambepo.

 “Otatu vulu ashike oku kondjitha eshongo ndika , ngele otwa tameke nofamili. Poompito odhindji aalongi ihaya ndhindhilike mbala omandhindhiliko kutya aalongwa yawo oya fa ya tameka okulongela satana, ishewe aavali oye na oku tseya kutya osikola hayo eyamukulo oku kuthapo onkalo tashi vulika yaanona yaninga aalanduli yondeveli.Aavali oyena okutameka okupa oyana ohole opo ya tungepo ekwatathano lyakola nayo. Aanona oya pumbwa oku taambiwako noku yalulwa kuyaandjawo, onkene ngele inaya mona etaambekwo ndika nenge eyalulo ndika megumbo lyaandjawo nena mbaka ota ye ke li konga palwe,”Kitching ta londodha.

Kitching okwa indile wo opo Uukriste wu galulilwe momanongelo opo aanona ya vule okuvulikithwa pandjila yoohapu dhaKalunga.

Omuwiliki gwElongo moshitopolwa sha //Karas , //Awebahe //Hoeseb, okwa zimine kutya uuSatana owo eshongo enene momanongelo moshitopolwa she. 

“Tse katuna oonkondo na otatu kondjitha eshongo ndika, oshinima shika ohashi holoka olundji pethimbo lyomakonakono. Katuna aawiliki yOpambepo nenge aanawino yopamadhiladhilo opo yetu pe omayele nkene tatu longo niiningwanima mbika yuusatanisme menongelo,”//Hoeseb a ti .

Omahokololo gaana ehulilo kombinga yaalongwa aniwa ye niwe koodemoni noshowo iilonga yuulodhi pomanongelo moshitopolwa sha //Karas ogo ga thiminike opo aalongi naanambelewa yElongo ya tule oshipopiwa tashi kundathana oshinima shuusatanisme melandulathano lyiikundathanwa yoshigongi shaalongisikola shoka sha gongalele oshiwike shayi poKaiti.

LEAVE A REPLY

Please enter your comment!
Please enter your name here