Oshinakugwanithwa shiikundaneki moku shanga omahunganeko nomalaka gaana uushili

0
164

Opwa kala oonkundathana kutya olye ena oku pewa uusama kombinga yoonkundana dhomahunganeko ndhoka dha kundanekwa omalupita miifo ndele nee omahunganeko ngoka inaga tsa nenge ga gwanithwe ngaashi aahunganeki  ya li ya hunganeke. Kundana, ngaashi ashike oshimwayinafo kundaneki New Era, naye okwa li wo a kundaneke kombinga yaasita aakiintu naalumentu mboka ya li ya topola omamoniko gawo noshigwana.Ethimbo kali shi ele unene omuprofeti gumwe okwa li a talelepo oombelewa dha New Era Publications Corporation (NEPC) mOngwediva ena etumwalaka lya nuninwa aaniilonga ya NEPC aatoolinkunda naaniilonga mboka haya longele iifo mbika Kundana na New Era, etumwalaka omuprofeti okwa ti ndika nali dhigininwe naamboka ye li pewa oyena oku li gwanithapo , olya ti aaniilonga naya itedhulule. Ihe oshinenenima metumwalaka ndyoka osha li eindilo kaasitagongalo opo yeethepo okuzala omaguwo omaluudhe ngele taya uvitha oshoka aniwa olwaala ndoka olwodeveli nongele mboka oya zala omaguwo ngoka nena anuwa otaya ithanene odeveli mongeleka nomomagongalo..Oohapu dhomuprofeti nguka inatu dhi shangulula ndele otwe dhi shanga ngaashi edhi popile.

Konima yoshiwike shimwe oshigwana osha kundanekwa ishewe kombinga yemoniko lya pewa omuprofeti ngoka a li a mono emoniko anuwa kutya ota ka sa ndele ye ta yumuka ishewe. Ehunganeko moniko ndika olya li lya kumitha aantu.Omuhunganeki nguka oshiwike shayi okwa li a hunganeke ekakamo lyevi inaali monika mo nale moNamibia lya li li na okuningwa momasiku 15 Apiilili. Esiku ndyoka olye ya etali pitipo inaapa inyenga sha.

Okuza mpoka epulo moshigwana, maawiliki yoshigwana, noshowo mboka yoongelki, oondika kutya omolwashike iikundaneki hayi lopota oonkundana dha tya ngaaka. Olye ena okupewa uusama, kutya omahunganeko gamwe oga etele oshigwana uutile nembandamo, ndyoka konyala li etele aakwashigwana yaana ondjo oshiponga.

Epulo ndika kali shi epu okumonena eyamukulo. Shoka tashi vulu okupopiwa ooshoka kutya uuyuni wonena owa endelela nomauyele otaga endelele ngepathimo lyeho momakwatathano gopashinanena.

Ihe shoka tse tatu zimine ooshoka kutya nando omalunduluko omanene oge ya muuyuni, ngaka oga etelele oshinakugwanithwa sha gwedhwapo komapepe gaatoolinkundana okulonga nuukeka nuuyelele mboka yena momake gawo.

Omutenge gwaatoolinkundana paithano otagu endele pamwe noshinakugwanithwa oku tala kutya uuyelele mboka tawu gandjwa moshigwana owuli mondjila,owu li nawa inawu gama ombinga na owoshili itaawu gandja omalimbililo nenge oku kala tawu konenenwa, unene monkalo moka mbuka wa gandjwa nenge wa nyolwa.

Oshikwawo ontompolwa onti-3 yekotampango lya Namibia okatokolwa 21 oke na sha nemanguluko lyoku popya shoka omuntu uuvite noshowo okugandja omaiyuvo ge, shika otashi ti emanguluko lyiikundaneki. Montompolwa oyo tuu ndjika omuna woo emanguluko lyopaitaalo nolyomaiyuvo gomunona gwokomwneyo noshowo uuthemba womuntu kehe oku hempulula shoka itaala. Ekotampango olyo lya pe aantu kehe uuthemba oku kala aaneitaalo lyontumba nenge lyongandi oku kala taya hempulula ndyoka pwaana ethiminiko nando olya sha nenge etilitho lyontumba.

Kashishi uuthemba wetu okupula aaneitaalo lyontumba opo kaaya uvithe “omamoniko gopaKalunga’ ngoka ya pewa.

 Ihe tse aatoolinkundana otatu wilikwa komikanka hoka kwa tungilwa eihumbato lyiikundaneki moNamibia nenge Namibian Media’ Code of Conducts, ndhoka tadhi kumike aatoolinkundana opo ya fule muule noku konakona nawa omolwa uuwanawa woshigwana oonkundana ndhoka taya uvu, noshowo oku longitha kehe onzo ndjoka yena oku tala kutya omanga onkundana ndjoka inaayi nyanyangidhwa , ndjika otayi vulu oku inekelwa ongo yi na oshili nenge kutya ndjika itayi etele oshigwana uuwinayi wontumba ngele oya nyanyangidhwa.
Ayihe mbika otayi pula aatoolinkundana ya dhiladhile nawa kombinga yomatumwalaka ngoka taya taandeleke moshigwana okupula ngele ngoka otaga tuminwamo omolwa uuwanawa washo omanga ngoka inaa ga nyanyangidhwa.

Omupopyo gwomusitagongalo eli moshipundi shevululuko  nomuwiliki ngeleka ,Reverend Ngeno Nakamhela, moshifo oshimwayina naashika oguli mondjila, sho agandja uusama noombedhi kiikundaneki shono yo ya nyanyangidha omahunganeko ngoka konyala ga ete evundakano nuutile waana omakankameno mokati koshigwana kombinga yehunganeko lyekakamo lyevi momasiku 15 Apilili ndyoka inaali gwanithwa ngaashi naku li hunganeka a li a ti okwe shi pewa memoniko.Omusitagongalo otandi indile iikundaneki opo yi kwate komeho okutokola shoka  yo yina okunyanyangidha naashoka yo tayi thigipo inaashi nyanyangidhwa. 

Iikundaneki nayi lungame opo yaa ninge oshitopolwa shomahunganeko giifundja ngoka taga etele oshigwana uumbanda uutile nepiyagano inaali pumbiwa . Iikundaneki inayi kala oyo omweelo gwokupitila omatumwalaka ngoka ganuninwa okupukitha aakwashigwana mboka aankundi opo ya ka ninge iilongithwa, momalalakano gaamboka taya iyithana oyo aaprofeti. Unene tuu aakwashigwana mboka shili taya kongo ekwatho lyopaKalunga omolwa omashongo ngoka ge ya taalela moonkalamwenyo dhawo esiku kehe

LEAVE A REPLY

Please enter your comment!
Please enter your name here