WHERE OTHERS WAVERED – Omalweendo gamwe ishewe ga nika oshiponga

0
326

Ngame wo onda tokola okuya koBechuanaland neshina lyokolutenda okuza koLusaka, okukatsakaneka aantu yetu mboka ya li taya zi kegumbo. Ngashi handi ningi shito ondi ishangitha opo ndi ende moshikoto shongundu yotango moka ngame ndi ipatelemo.

Aanambelewa yopuupitilo wopoongamba ya Rhodesia lyokuumbugantu inaya konkolapo pomweelo gwondunda yandje oshoka oondunda ndhika ohadhi endwa ashike kaatiligane, omanga aaluudhe haya ende moondunda dhili miikoto yongundu ontintatu. 

Onda li nda taalelwa keshongo enene sho nda thiki posasiona yomashina moBulawayo moka ndali ndina oku heluka oshoka eshina lyandje olya Ii lya lundululwa inaashi tegelelwa, na onda li ndina oku tegelela eshina ekwawo ndyoka lyuuka koBechuanaland. 

Opo ndaa hile aatiligane yaapolisi ya pula pule ndje onda yi positola yomambo mpoka nda landa embo  lyafa Ombimbeli onda kuutumba piipundi mpoka hapa kuutumba mboka ya tegelela omashina na onda kala nda fa tandi lesha. 

Onkene aanambelewaya Rhodesia lyuumbugantu inaya pula ndje sha. Oya li ya dhiladhila kutya ngiika ngame omusitgongalo gwongeleka yontumba. Onda kala nda kuutumba mpoka sigo oosho eshina lyandje lya thiki na onda endelele noku londa meshina omanga inaa li thigapo oshitaasi shomashina shoka.

 Sho twa thiki poongamba dha Bechuanaland na Rhodesia poPlumtree, aanambelewa nopolisi yopoongamba oya li ye na oku talamo meshina ndele kaya lipo pehala mpoka okulonga iilonga yawo, ondjila yandje oya tsikile sigo nda thiki mo Francistown moka nda tsakanekwa ku hailwa Maxton Mutongolume omukalelipo gwo SWAPO ngoka pamwe na yakwawo ya adhika opo ashike ya thiki okuza kegumbo koSouth West Africa. Twa tsakanene wo na Hifikepunye Pohamba, Simon Kuhangua na yalwe notwa ningi oshigongi  nayo mpoka. Onda ka pula pulwa kukommishina gwoshitopolwa ngoka a li hala oku uva kutya onde ya mo ngiini inaandi talwa noku monika kaanambelewa yopoongamba. Onde mu lombwele ndati ngame onde ya neshina ihe sho nda piti poongamba kapwali nando omunambelewa gumwe, ye okwa itaale ehokololo lyandje.

Omunambelewa gwa Oxfam a tseyika Cunningham okwa li a zi ko Lusaka noshihauto ye nguka okwa pe Jacob Kaukungua na Emil Appolus olefa. Olundji okwa ende ondjila ndjoka , nomolwashoka ye omutiligane a koka , aanambelewa naapolisi inaya pula kutya aaludhe mboka a humbata oya peni, oya dhiladhila ashike kutya ngiika mboka oyo aaniilonga ye, naambaka inaya pulwa sha.

Otwa li niilyo oyindji yo SWAPO moFrancistown nomukalelipo gwetu moka okwa li Maxton Mutongolume. Oyendji yomaantu mboka ya pitile moshilando shika oya li wo oontauki dha za koSouth Africa.

Pethimbo ndyoka ongundu yopolitika yo Bechuanaland People’s Party oya li tayi longo naandjika oye tu kwatha noonkondo.Mokati kiilyo yo SWAPO mbyoka ye ya moshilando omwa li Peter Katjavivi namukwawo gumwe mboka ya li ya kwatelwa moRhodesia lyokuumbugantu noya shunithwa koBechuanaland, na oya li ashike ya ethiwa konima sho twa gandja enyenyeto lyetu kepangelo lya Britania moLondon.

Onda kala iiwike yontumba mo Francistown, ihe konima otwa ka tidhwamo kaaIngilisa moka noku shunithwa koZambia, ngame onda ka shuna koDar es Salaam hoka kwali kuna oombelewa dhoSwapo dhopakathimbo. 

Omakwatathano noshowo omainyengo gaantu pokati ka South West Africa noombelewa oonene dhoSwapo mo Tanganyika olya li edhigu sigo oosho Zambia a manguluka omumvo 1964 na Botswana a manguluka momumvo 1966.

 Opwa li oshiningwanima shimwe oshidhigu shoka sha ningilwe omumvo 1963 sho Andreas Shipanga, ndohotola Kenneth Abrahams noshowo omumwamememati Noah Nujoma nayakwawo ya li ita ya vulu oku za mo moBechuanaland. Naashika osha thiminike  ndje opo ndi konge ondhila hayi ende ashike aantu yatatu opo ndjika yi ya tute mo moshilongo shoka oku ya fala ko Lubumbashi moDRC nena. Oya li yena oku falwa hoka oshoka kaya li ya pitikwa oku endela miilongo yofederation ya Rhodesia na Nyasaland pethimbo ndyoka.Ondhila oya tuka iikando omulongo niikando ine okututa aantu mbaka na ka ya li ya pitikwa opo yi lambele nando olumwe moRhodesia lyokuumbangalantu. Omatuko ngaka oga li gafutilwa iiponda omayovi geli gane. 

Yo iimaliwa mbika otwe ke yi galulilwa okuza kehangano lyUukumwe waAfrica oku pitila mokomittee yokumangulula Africa.

Oku konga oondjembo niilwitho oku kondjela emanguluko.

Omailongekidh getu goku tameka iita yoku kondjela emanguluko oga li taga tsikile. Otwa li tuna  aalumentu  yi ilongekidha no ya dheulilwa uukwiita ihe eshongo ndyoka twali tuna , ka twa li tuna oondjembo nomatati goku kondjitha aakolonyeki. Oondjembo dhotango otwa li twe dhi mono okuza ko Algeria ngoka a li a manguluka omumvo 1962. 

Pethimbo aantu yAlgeria ya li taya kondjele emanguluko okuza mo Tunisia noMorocco , tse poompito odhindji  miigongi otwa li twa tsakanene. Momatsakaneno ngaka otwa popi nkene tuna okulonga oku teya ondjoko yuupika. 

Yakwetu oye shipondola oku teya uukoloni waFrance nomo-1962 oya manguluka. 

Oya li yetu hiya tu ka talelepo oshilongo shoka omumvo  1963 oku ka egulula ombelewa yuukalelipo moAlgiers, ehiyo ndika otwe li taambako na Solomon Miifima oye a ulikwa a kale omukalelipo gwetu moAlgeria.

Onda ka popya na Ahmed Ben Bella Omuprima minister gwa Algeria oku indila ye tu pe oondjembo ye okwa zimine opo tu pewe oondjembo dhili ne, naandhika odho twa tamekithile iita yekondjelomanguluko momasiku 26 Auguste 1966 pOmugulu-gOmbashe moshitopolwa shOmusati.

Otwa pewa oondjembo dho pepesha dhomashina dhili mbali noshowo oombistoli dho TT mbali nomangandjina ga gwedhwapo goondjembo ndhika. 

Onda landa oondjato oonene oompe dhili mbali moka nda tula oondjembo ndhoka opo tu dhi faalele koTanganyika. Uupyakadhi owali nkene tatu dhi pititha pokapale koondhila moDar es Salaam. 

Onda li nda kambadhala okupula Peter Nanyemba ngoka a li mo Tanganyika opo a longekidhe oshigongi shiikundaneki pokapale unene mondunda moka hamu endele aasimanekwa, ndele elongekidho ndika kalya lya piti. Onkene sho twa thiki pokapale ka Dar es Salaam otwa li ashike tuna okupitila mpoka hapa ende aantu ayehe mboka taya zi mondhila. 

Omunambelewa gumwe gwopoongamba okwa li a pula ndje kutya moondjato ndhoka omwa li muna shike, ngame onde mu yamukula kutya omuna iikutu iikulu, ye ina talamo okwa shanga ko ashike kombanda yoondjato nopena ye tati  natu pite tu ye moshilando. 

Etokolo lyomunambelewa nguka olya pendje efudho oshoka ngashingeyi oondjembo ndhika odha pita nawa oku ya moTanganyika. Ihe eshongo ndyoka lya li lya landulako oondyoka lyoku kutha oondjembo ndhoka oku dhi enditha mo Rhodesia lyokuumbangalantu oku dhi fala koNamibia. Molwashoka Zambia okwa adhika opo amanguluka osha li oshipu opo tu pitithe oondjembo ndhoka pwaana uudhigu washa. 

Otwa longitha omakwatathano getu ngoka twa adhika twa dhikapo naanambelewa moparty ya UNIP mboka yetu kwatha nawa opo aaIngilisa kaya kale noku tu konenena unene sho oyo natango ya li mewiliko lyegameno nopolisi moshilongo shoka.

Oonakulwa yetu yotango mboka ya shuna moshilongo okuza  muundjendi oya pitile moCaprivi ngashingeyi Zambezi ya humbata oondjembo ndhika taya piti mo Kavango, sigo ya thiki pegumbo lya Kaxumba  Kandola Eliaser Tuhadeleni mEndola mOukwanyama. 

Oya taambwa nawa nopwa ningwa omalongekidho opo  pu monike ehala ewanawa mpoka tapa ka yungwa oontanda dhaakwiita moshitopolwa shOmusati nena.   

LEAVE A REPLY

Please enter your comment!
Please enter your name here