Ethimbo epe lyuudhano wetanga lyokoompadhi waadhani kohi yomimvo 17 waSkorpion Zinc.

0
181

Komutoolinkundana

WINDHOEK – Uudhano uutiyali waSkorpion Zinc waadhani mboka yeli kohi yomimvo 17 mboka wa li wu na okudhanwa ehuliloshiwike ndika kokutya 2-5 Mai owa undulilwa komasiku 22-26 Auguste 2014. Uudhano mbuka otawu ka dhanenwa natango pokapale ka Sam Nujoma moKatutura sha Venduka.

Oshitopolwa sha Khomas osho enyakwa lyuudhano mbuka nenge osho shina ekopi lyuudhano mbuka konima sho sha li sha sindana uudhano woSkorpion Zinc waadhani yokohi yomimvo 17, sho mbuka opo wa tamekelwe. 

Khomas okwa li a dhengemo oshitopolwa shErongo nokoola 2-1 poKaiti omumvo gwayi.

Oshitopolwa Oshikoto osho sha li sheya pehala etitatu sho sha dhengele oshitopolwa shopuushiinda Oshana nookoola 2-1.Omanga oshitopolwa Otjozondjupa osho sha li sha pewa epapa lyospana ya dhana nawa nonombepo yuudhano muudhano mboka, ye omudhani ngoka a pewa epapa lyokudhana nuunyakwa oye Pandeni Kandjabanga gwospana yOshana.

Omudhani gwokomeho gwospana yOshikoto, Josef Utoni okwa li a tulamo okoola 11 momaudhano geli gahamano na okwa pelwe olukaku lwoshingoli, omanga omudhani dhingi muudhano auhe okwa ulikwa oye Jandjamuje Maharero gwospana ya Khomas nguka opamwe na Hezeeko Katjiukua oya li ya tulamo okoola hetatu kehe gumwe.

Omukwati gwomokoola gwospana yaKhomas, Benni Ochurub oye a li a hogololwa omukwati dhingi gwotonamende ndjika. Uudhano wotango waadhani kohi yomimvo 17 wa Skorpion Zinc owo wa li wa longitha omukalo gwokulandula omudhani mpoka a za noshowo kutya okuna omimvo ngapi oku keelela okufukila sho oospana dhimwe  hadhi vulu okudhanitha aadhani yeli kombanda yomimvo ndhoka dhuuthwa dhi dhane muudhano mbuka.

Omukalo ngoka gwa longithwa ohagu ithanwa El-Tracking moka omaukwatya agehe gopashigwana gomudhani ga gandjwa kokomitee yokulongekidha uudhano opo ndjika yi ga konakone nawa.

Mu Maalitsa olutu lwokuwilika uudhano wetanga lyokoompadhi moNamibia NFA opamwe nomina ya Skorpion Zinc oya li ya tseyitha euvathano lyekwashilipaleko lyuudhano mboka lyongushu yoodola omiliona yimwe oshinkwanu ndatu uule womimvo ndatu. 

LEAVE A REPLY

Please enter your comment!
Please enter your name here