NBA a tseyitha ospana ndjoka tayi yi kuudhano woCommonwealth

0
178

Komutoolinkundana

WINDHOEK –Olutu halu wilike uudhano wobowling nenge uudhano woku undula omatanga mongwena  Namibia Bowling Association (NBA) olwa tseyitha pambelewa iilyo yospana ndjoka tayi ka kalelapo Namibia moludhi luudhano mbuka pomaudhano goCommonwealth taga ka kalako okuza omasiku 23 Juli sigo omasiku 3 ga Aguste nuumvo moGlasgow sha Scotland.

Ospana yaakiintu muudhano mbuka oya li ya hogololwa pethimbo lyuudhano womalolelo wa NBA wa ningilwe mu Novemba omumvo gwayi, omanga ospana yaalumentu oya li ya ningilwa omadhewo omadhigu momwedhi Febuluali nuumvo. 

Oospana ndhika mbali otadhi ka kuthombinga momaudhano gayooloka pomithika ngaashi aadhani oohandimwe, aadhani yaali, aadhani yatatu noshowo molweetho lwaadhani yane.

Oospana ndhika odha tameka nale oku ilongekidhila uudhano mbuka, unene tuu sho iilyo yospana ndhika ya li oshitopolwa nenge ya kuthombinga momadhewo ngoka ga kala noku ningwa oomwedhi dha ziko.

Kohi yewiliko lya Sandy Joubert, ospana otayi ka nenepeka oku idheula kwayo muunongo wokudhana wa yooloka noshowo moku kala ya ndjanga nawa nomeilongekidho lyopalutu nolyomadhiladhilo wo.

Omaudhano goliha yopashigwana muudhano mbuka noshowo uudhano womanyakwa gopashigwana mboka tawu dhanwa ehuliloshiwike ndika otawu kala omukalo gumwe ngoka tagu longekidha nawa aadhani mbaka. NBA okwa hogolola wo aadhani aashona yaali mboka taya yi ko Australia oku ka kuthombinga muudhano womanyakwa gUuyuni omashona mboka tawu ka kalako mo 10-16 gaNovemba nuumvo.

 Aagundjuka mboka taya ka ya koAustralia oyo: Waylon Wentzel na Mandie Steenkamp.

Mbaka otaya ka kuthombinga muudhano woohandimwe waalumentu no waakiintu.

Aadhani mboka taya ka dhana obowling komaudhano goCommonwealth ongashi taya landula : Bea Lamprecht, Will Esterhuizen, Sheena du Toit, Douw Calitz, Diana Viljoen, Ewald Vermeulen, Lesley Vermeulen, Steven Peake, Anjuleen Viljoen and Piet Appollis. Sandy Joubert ota kala ongo omudheuli noshowo omuwiliki gwospana ndjika ta kwathelwa ku Avril Kotze na Jean Joubert.

LEAVE A REPLY

Please enter your comment!
Please enter your name here