Ohauto ya yakwa ya monika pooha dhetoto lyiiyagaya mOndangwa

0
243

KuLoide Jason 

ONGWEDIVA-Opolisi yoshitopolwa shaShana oya li natango mokashoko okulandula oombudhi ndhoka dha li dha teya egumbo lyomunangeshefa gumwe mOshakati ongula yEtitano lyayi noku mu yuga iimaliwa oyindji noshowo ohauto yondilo.

Komufala gwopolisi commanda gwomiya dha shinana mOshana, Komishina Ndahangwapo Kashihakumwa okwa ti oombudhi ndhoka dhi shiwike nawa kopolisi kadhina mpoka tadhi kala dha holama omanga opolisi inaa yi dhi kwata meendelelo.

Opolisi oya hokolola kutya omunangeshefa gwokOshikango okwa yugwa iimaliwa  omayovi 70 noshowo osheenditho sholudhi lwo Audi Q7. 

Ihe osheenditho shoka oombudhi odhe shi hingi ashike noku keshi thiga pelambo lyokuumbilwa iiyagaya kumuni gwaNdangwa kuumbugantu wondoolopa ndjoka.

Komishina Kashihakumwa okwa lombwele Kundana kutya sigo opethimbo ndyoka a li a popi noshifo shika ookalyamupombo mboka oya li natango taya yi ontuku oku kwatwa kopolisi.

 “Osheenditho osha itsuwa ongula yOsoondaha kaakwashigwana mboka ya tseyithile opolisi. 

Osheenditho osha yakwa kOshakati oshinano shookilometa 30 na osha ka thigwa konima yiiyale petoto lyiiyagaya kuumbugantu wOndangwa.”Kashihakumwa a ti.

Ota ku hokololwa kutya aafekelwa mboka oya tete omiyelo dhegumbo lyomunangeshefa ngoka na oya ende yu ukilila kondunda ye noku mu pula iipatululo yo Audi.

Komufala okwa ti mbaka aniwa oya pula wo opo ya pewe iipatululo yosafe moka ya kutha omwaalu gwoshipandi shoodola omayovi 70 koomuma.

Omunangeshefa anuwa kali ena iimaliwa megumbo ihe mbyoka ya li moka oyo mu mwayinakadhona ngoka aadhikile opo a landithapo oshihauto she omasiku gaziko.

Kashihakumwa okwa ti omukiintu ngoka okwa agandja iimaliwa mbyoka opo a hupithe oomwenyo dhawo.

Okwa ti aafekelwa oya yi megumbo sho ya tete iitenda mbyoka ya li pomweelo gwegumbo.

 “Omulumentu nguka okwa li ta kugu, nekudhilo ndyoka olyo lya pendutha omumwayinakadhona ngoka a matukile kondunda ye , ye ta tsakanena ashike oshipala nomulungu gwondjembo noku lombwelwa kutya na gandje iimaliwa ngele hasho otaye mu dhipaga.,” Komishina Kashihakumwa a ti.

Okwa ti oshihauto osha li sha monika pamwe nongodhi yimwe yopeke. Aafekelwa oya li natango mondapo ihe opolisi oyi li popepi noku ya kwata mbala.

LEAVE A REPLY

Please enter your comment!
Please enter your name here