Omaiyuvo kesiku lyaaniilonga

0
186

Eyuvo lyolukeno kombinga yesiku lyAaniilonga otali tu pula opo twi ikonakone tseyene kombinga yaashoka shaningwa moshinima shonkalo yaaniilonga. Iiyimati yemanguluko yimwe oyo ethikamekepo lyuuthemba waaniilonga , na unene tuu sho emanguluko lya teyapo omalyenge giilonga ya nika uupika moka aaniilonga ya kala noku longa omanga oshilongo inaashi manguluka. Otatu tumbula wo kutya aaniilonga oyo ya enditha oonkambadhala oonene okuteya oonkandja dhepangelo lyokatongotongo moNamibia.

Onkene otashi uvitha nayi nena oku uva aaniilonga taya yeleke onkalo yawo yiilonga naandjoka ya li po pethimbo lyokatongotongo. Unene tuu sho mbaka yu uvite ya yugwa uuthemba wawo komalutu ngoka ga thikama po okugamena aaniilonga oyo tuu mbaka.

Onkene otashi tatula omutima no  tashi gandja eiyuvo ewinayi oku uva kutya opena aaniilonga yamwe mboka yaa shishi kutya kuuyuni oku na esiku lye ya nuninwa, moka yo ya tegelelwa oku tsakanena , opo ya kundathane iinima ya guma oonkalo dhawo pomahala giilonga yo ya kuthe etokolo lyuukumwe miinima mbyoka ye ya guma.

Onkene osha pumbiwa opo Esiku lyaaniilonga li tu thiminike opo  tu konakone kutya oshike twa longo sha puka nenge openi ngiika twa yi pombambo moshinima shaaniilonga. Otwa pumbwa tu ipule ngaaka opo tu vule okumona ondjila moka tatu ende opo tu ulukile aaniilonga kutya Esiku lyaaniilonga olyawo.Oshoka oshi li mondjila kutya aaniilonga oyena iiyetwapo mbyoka yo ya hala oku kundathana, onkene itaku vulu oku popiwa kutya esiku ndika olya kanitha ongushu nomwiityo gwalyo.

Omahangano gaaniilonga nago oga pumbwa oku shi koneka wo

Aaniilonga aaNamibia oya talako esiku lyAaniilonga ongo esiku lyoku vululukwa, esiku lyokwaaya kiilonga, omanga yamwe oya li ya nyengwa okufatulula kutya esiku ndika esimano lyalyo otali ti shike, sho mbaka ya li ya pulwa kutya esiku ndika otali ti naanaa shike kuyo paumwene wawo.

“Esiku lya Mai oshike? Oshike shono? Oto popi Etine…..efudho nenge esiku lyefudho,’ ndika olyo eyamukulo lyomutungi,Natangue Hauwanga sho a li a  pulwa oshiwike shika omanga a li pokafudho komwiha piilonga yomatungo moVenduka. Ye ogumwe ashike gwaaniilonga oyendji mboka Kundana a pula pula momapandaanda oshiwike shika mboka ya ulike yaana ontseyo nenge yaa nako nasha kombinga yEsiku lyOpaigwana lyaaniilonga.

Ohela omahangano gaaniilonga noshowo aanawino miinima yaaniilonga kaya li ya kuminwa omayamukulo ngoka tse sho tweya pula ya tye sha.Ihe oya li ya ningi oonkambadhala okufatulula kutya nando aaniilonga osho yu uvite ngaaka shoka inashi fatululwa ongo tashi ti Esiku lyaaniilonga olya kanitha ongushu yalyo mokati kaaniilonga yaNamibia.

“Esiku lyAaniilonga olya kanitha omwiityo gwalyo? Aawe kandiwete shi li ngaaka. Otandi dhiladhila kutya otwa kanitha ashike ongushu yokutya omolwashike twe li pumbilwa. Otuli monkalo ndjoka ya fa tayi tindi kutya oku ehama kwa gumwe oko okweehama kwaayehe. Otwa pumbwa oku mona po omikalo omipe notadhi hili ndhoka tatu longitha opo Esiku ndika tuli kaleke natango lina omwiityo gwalyo komuniilonga kehe ishewe,” pahapu dhomuwiliki gwehangano lyomapekaapeko miinima yaaniilonga hali ithanwa, Labour Resource and Research Institute (LaRRI), Hilma Shindondola-Mote.

Shindondola-Mote okwa gwedhako a ti edhimbuluko lyesiku ndika ohali tala konkalo yaaniilonga noshowo yomahangano gaaniilonga, moshilongo. Okwa ti omuthindo ogwa pumbwa okutulwa koku galula einekelo lyaaniilonga noku itaalitha aaniilonga aagundjuka kombinga yesimano lyomahangano gaaniilonga.

Amushanga Ndjayi gwoNational Union of Namibian Workers (NUNW) ngoka ta kwathele , Job Munjaro na ye ka li a haluka okuuva kutya aaniilonga oyendji kaye wete esimano nongushu yesiku ndika. “Itashi kumitha ndje ngele owa lombwele ndje kutya ooperesenda 80 dhaaniilonga kadhina ontseyo kombinga yesiku ndika nenge inadhi tseya kutya, okwa kala esiku ngaashi ndika lyAaniilonga,’ Okwa ti omolwashika tse otwa kala noku lundulula omahala mpoka esiku ndika hali dhimbulukiwa omumvo kehe nelalakano opo tu tseyithile aaniilonga ekalepo lyesiku ngaa ndika.”

LEAVE A REPLY

Please enter your comment!
Please enter your name here