Ondi muna komutima aakulupe yandje

0
355
Kansela gwoshikandjohogololo Okatyali mOshana, Joseph Mupetami ta topolele aakokele yamwe moshikandjo she omatalashe pendiki lya Matias Egodhi.

KuMaria Namupala

OKATYALI –  Kansela gwoshikandjohogololo Okatyali, Joseph Mupetami ngono a tseyika nawa koyendji onga omupiya goshigwana okuli ta gandja omakwatho kaakalimo yomoshikandjohogololo she.

Momasiku 28 gaApiilili Kansela pamwe nosheendo she oya li ya  gandja omatalashe kaakulupe yamwe yomoKatyali ayehe mbono haya kwata openzela.  Egandjo lyomatalashe ndino olyali lya ningilwa  posenda ya Matias Egodhi.

Konyala aakulupe omilongo ntano (50), oyali ya pewa omatalashe ngaka oshali  nenge omagano, yo ina ye ga landa nande osha.  Aakalimo yomomikunda dhimwepo dhomo Katyali oya li yeya ya tale yo ya ninge oombangi oku kwashilipaleka shoka sha ningwapo.Omikunda ndhono dha pewa omatalashe odho Ondiiyala,  Matias Egodhi nEnkavu, oku tumbulapo owala dhimwe.

Mupetami okwa ti okuna oshigwana she komutima na ota kambadhala a kwathele mpa ta vulu. “ Yakwetu omatalashe ngano oga nuninwa aakulupe, naga silwe oshimpwiyu. 

Onda mono nkene yamwe yomaakulupe yandje taya mono iihuna nonande haya kwata openzela iimaliwa ohayi liwapo ashike kaatekulu” T a ti nga.

Okwa tumbula kutya omatalashe ngano oye ga kwathelwa komusamalia omunamutimahenda na ina ga za nande okepangelo.  Denis Maxwell gwongeshefa yo Denchi Consulting Engineers oye a gandja omatalashe ngaka. Maxwell okwa uvaneke kutya aakulupe yomOkatyali okuna oku ya kwathela oshoka oya panga uukume na Mupetami ngono ta kwathele oshikandjohogololo she.

Maxwell okwa tanga Mupetami onga gumwe gwaamba taya longo no taya kwatha oshigwana moshili, te mu tsu omukumo a longe nuudhiginini ngaashi he shi ningi.

Sakaria Kalonga gumwe gwomaakulupe mboka ya pewa omatalashe okwa ti ota pandula Mupetami sho hu uvu omakemo gawo, “ Kansela gwetu ohe tu pe omakwatho ogendji onkee ota tu mu indile a tsikile niilonga ye mbika yokuyakula oshigwana she, sho a ningi neshi ningile woo yakwetu yamwe mboka ya pumbwa omakwatho”, Kuku Kalonga ta ti nga.

Aakulupe mbaka oya gandja olupandu lwawo ku Mupetami, oondigolo odhali dha yaka oshowo oonkuwilili, taya pandula Kansela gwawo sho teya kwatha. Mupetami okwa uvaneke kutya ayehe mboka ya hupako komatalashe inaya kanitha omukumo nayo otaya ka kala ya pewa omatalashe muule wethimbo efupi lela. 

LEAVE A REPLY

Please enter your comment!
Please enter your name here