Ongundu ompe ha yi imbi oShambo ya holokele moshitopolwa shomusiki ndjika

0
214

KuClemence Tashaya

EENHANA –Victor Nakapandi Ooshooshili pamwe naNakapandi famili  oya tseyitha taya etapo oalubuma yawo ontiyali nuumvo tayi kala nedhina oSwapo Yetu.

Efamilia lya Nakapandi olya thaneka okupititha oalubuma ndjika okuuka mokati komumvo nguka ngiika mu Juni nenge Juli. 

Ndjika otayi kala natango yomaimbilo gopamuthigululwakalo noshowo goparevolusi molwashoka otayi kala ya shewelwa ongundu yoSwapo.

 “Oalubuma yetu ontiyali otayi kala noshipalanyolo o“SWAPO Yetu” naandjika otayi ka pitithwa nuumvo mu Juni nenge mu Juli. Moalubuma ndjika otatu pandula ongundu yetu tayi lele molwa oku tu mangululula momalyenge guukoloni ,” osho Victor a ti.

Efamilie ndika olya holokele moshitopolwa shokuhika oongalo dholudhi lwoshambo omumvo gwayi sho lya pititha oalbuma yalyo yotango yedhina Ohango.Ndjika oyina iiyimbo yili omulongo niiyimbo ine.

Victor oye omwiimbi gwokomeho moalubuma ndjoka ya etwapo nokukwatwa ku Olloy Marius gwehangano Olloy Production. Victor ota imbi pamwe nomumwayinakadhona noshowo naamwayinamati.Moalubuma ndjika omuna iiyimbo ngaashi “Ohango”, “Ileni” na “Oh Lord” noshowo Meme na Tate.

Victor Nakapandi, ngoka oye a shanga omaimbilo agehe gomoalubuma ndjika okwa tanga omwiimbi omunene gwoshambo shopashinanena  omukiintu, Tunakie ngoka ye li naye methigathano moshitopolwa shomaimbilo goshambo moshiithanene shoku gandja omapapa kaahikingalo shokomumvo shaNamibia sha tseyika nawa Namas. Oshiithanene shika otashi kalako ehuliloshiwike ndika poShiwakopo nenge mOmbundu ya Kiiyala. Nakapandi ota kondjo wo nuudhiginini opo a thigepo aahikingalo yoshambo mboka yakalamo nale mondambo ngaashi Nakale ya Nakale omumati gwokoKongo.

Victor okwa ti okwa nyanyukwa oku kala ta kuthombinga miiyimbo yopashigwana yOshiwambo moshiithanene shaahikingalo moShiwakopo nuumvo. Okwa ti wo ongundu ye otayi ka kala yuuvite etumba sho tayi ka imba pethimbo ndyoka oshiithanene shika shili metifa.

 “Otwa tamekele okuhika oongalo dhoshambo omumvo 2013 nokupititha oalubuma yetu yotango muNovemba omvula ndjoka, naandjika oya li ya taambiwako nawa nonenyanyu kaapulakeni yetu, na otwe ya pandula shono yetu hogololola opo tu mone ompito yokupewa oshishani shaa imbi aawanawa yoshambo pomathigathano goNamas nuumvo.” Osho a pandula aapulakeni naaholi yo musika yawo.

 “Okuhogololwa kwetu opo tu ka kuthombinga momathigathano goNamas ka twa li twe ku tegelela. Oshinima oshinene kutya efamilia lyetu olya hogololwa  oku kuthombinga moNamas 2014. Oshikwawo otuuvite esimano sho tuna wo ompito oku ka imba komeho gaayenda ayehe moshinyanga moka tamu ka ningilwa oshiindingili shoka ehuliloshiwike ndika.,’ osho Nakapandi a ti.

Victor Nakapandi Oshoshili okwa valwa momasiku June 1968 mOikokola moshitopolwa shaHangwena. Oha longo ongo omukuluntusikola gwenongelo lya Five Rand Primary , mOkahandja.Okuna aamwayina yahetatu aalumentu yaheyali nomukiintu gumwe.

Okwa tamekele oku imba manga eli mosikola osigo oosho ya pititha oalubuma ndjoka ya hogololwa opo yi kuthombinga methigathano lyoNamas nuumvo.

LEAVE A REPLY

Please enter your comment!
Please enter your name here