Taya nyenyeta omikweyo omile pekondeina lyoohi

0
328

KuMaria Namupala

ONDANGWA – Aakwashigwana ya za koombinga noombinga oha ya kala noku enda taya mbomboloka opo ya ka konge omweelelo mpono hapu landithwa oohi mondoolopa ya Ndangwa. Nonande ehangano lyoohi lya egulula omakondeina ngono haga landitha oohi monooli , aakwashigwana oyendji oye wete ya patelwa kondje oshoka omahala nga haga landitha oohi ogeli omashona lela no poompito dhimwe oge li kokule nayo.

Aakwashigwana unene mbono yeli popepi nondoolopa ya Ndangwa oya thikitha omakemo gawo ku Kundana, taya nyenyeta nkene haya kala momikweyo omile pekondeina lyoohi mOndangwa. 

Meme Ndahambelela Jonas okwa yambukile komukunda hagu ithanwa Ondeihaluka, naye okwa holola euvonayi lye. 

“ Ohatu kongo oshivelelwa ashike ohapu kala peyadi neenghono, pekondeina apa ito uyapo nando wu shune koilonga yoye oto monenepo ashike oixuna, eyakulo lavo ola nghundipala neenghono”, Meme Jonas ta ti nga.

Gift Simataa ngono eli omukalimo gwomOndangwa okwa holola kutya uuna ya pumbwa osheelelwa ohaya mono iihuna oshoka pekondeina mpoka ohapu kala pu udha nayi. 

Simataa okwa holola kutya aantu ohaya ende oondjila oonde oku konga osheelelwa nethimbo limwe yamwe ohaya shuna owala anuwa komagumbo inaa ya kwathelwa uuna ethimbo lya toka. 

“ Otatu indile opo omukuluntu gwehangano ndika lyoohi a indjipaleke omahala mpono tatu vulu oku landa oohi dhetu twa manguluka oshoka odho dhina ondando yili hwepo,” aakwashigwana ta ya ti ngaa.

Aakwashigwana mbaka oya indile woo opo ando mekondeina muka mu kale omashina geli nande gatatu oshoka paife ohaya kala ashike taya si omutenya pondje uuna yeli momikweyo ya tegelela oku yakulwa, oya nyenyeta woo kutya aayakuli yomekondeina ohaya ende unene kashona ngele taya yakula aayakulwa yawo.

Gift Simataa okwa indile opo omuntu kehe a pumbwa oohi ando a kale a pitikwa okulanda uupakete woohi wu vulithe pukamwe oshoka anuwa mongashingeyi omuntu kehe okwa pitikwa owala a lande kamwe.

Meningela gwekondeina lyoohi mOndangwa Jason Anghuwo okwa ti ita vulu manga a tye sha  koshinima shika ashike ota kambadhala a ka kundathane manga nomitse ominene dhehangano ndika , ye a galukile nawa aakwashigwana.

LEAVE A REPLY

Please enter your comment!
Please enter your name here