Egalikano molwa Riruako

0
253

KuMathias Haufiku

WINDHOEK – Egalikano lyeegulukila omukwashigwana kehe olya ningilwe komatango gEtitatu oshiwike shika okugalikanena Omuwiliki omunene gwaHerero, Kuaima Riruako ngoka a kala mosaala yetonatelo enene monaasalesa yopaumwene ya Katoolika ka Roma moVenduka. 

Riruako ngoka oye omunani gwongundu yoNUDO okwa li a taambelwa moshipangelo shoka omolwelondo lyombinzi.

Okwa li tatipo hwepo omolwepango, pahapu dhomupopiliko gwezimo lye, omundohotola Hoze Riruako.

“Kehe gumwe ngoka e na ehalo oku kutha ombinga megalikano ndyoka okwa hiwa opo a ye pongeleka yOruuano moKatutura pethimbo lyohamano yokomatango omolwegalikano okugalikanena Omunani Riruako. 

Pethimbo lyegalikano aakwashigwana oya pewa wo uuyelele owundji kombinga yonkalo ye osho Riruako gwomushona a kwashilipaleke aagalikani,” Riruako ta ti. 

Pahapu dha Riruako egalikano olya monika lya pumbiwa unene tuu sho oshigwana sha ulike eitulemo lyasho oku uva kutya omuwiliki nguka noshilyo shegumbo etoti lyoompango kutya oshilipo ngiini.

Oshikwawo aauvithi oyendji oya li ya hala oku ka ninga omagalikano koshipangelo ihe shika osha li oshidhigu oku shi pitika omolwonkalo ye, unene tuu sho shi shiwike kutya okwa pumbwa ompito kehe opo a vululukwepo, onkene egalikano lyaakwashigwana olya tokolwa nokulongekidhwa opo kehe ngoka a hala okumugalikanena eshininge muukumwe, osho Riruako gwomushona a tile. Okwa indile wo oshilongo ashihe shi tule hekulu momagalikano. Okwa ti oondohotola odhe shipondola okushunitha pevi elondo lyombinzi ye ndele okwa kumagidha ayehe kutya omimvo dhe ndhoka dha ya pombanda odho tadhi ka dhana onkandangala kombinga yethimbo ndyoka ta ka kutha opo a kale aaluka nawa.

Okwa ti petameko okwa li a pewa omasiku omulongo oku kala mosaala yetonatelo lyethimbo alihe, ndele atuhe out shishi kutya omolwa oomvula dhe ita ka aluka ashike mbala ngaashi andola ngele okwa li natango momimvo dhuugundjuka.

Riruako gumwe gwaanapolitika mboka ya kala moparliamende ethimbo ele okwa li a taambelwa moshipangelo omasiku gaali konima yokudhimbulwa evalo lye omimvo 79 kombanda yevi.  

LEAVE A REPLY

Please enter your comment!
Please enter your name here