A ningile aantu yomukunda gwe oshigongi

0
266

KuMaria Namupala

IIPANDA – Oshiwike sha ziko omukalelipo gomukunda Iipanda  okwali a ningile aanamukunda gwe oshigongi, ye a pulakene shono tashi inyenge momukunda gwe. 

Shika osha landula elombwelo lya mwene gwoshipundi Oshaampula, Eddie Amkongo sho a li a tseyithile oomwene yomikunda ya ningile aakwashigwana yawo iigongi nokuhogolola ooamushanga nookomitie dhomikunda.

Aanamukunda oyendji oyali ya holoka molweithano ndika. Omukalelipo gomukunda nguka Hafeni Kautwima okwali a gandja oompango dhelelo noku tseyithila aakwashigwana nkene yena okwiihumbata unene pethimbo ndi ewinayi.

Tatekulu Kautwima okwa ti okwa uvithwa nayi kaantu yomukunda gwe oshoka otaya hanagulapo iilikolomwa yaantu momapya, yamwe taya yaka omanuwa, noku litha omapya gaantu yo yamwe taya limo oomwenge dhaantu. “Yakwetu iinima mbino ohayi longwa nuudhigu kooyene yawo onkene iilonga ayihe mbino ya nyata nayi mone ehulilo, otandi indile tu kaleni nombili nonelandulathano momukunda gwetweni,” ta ti nga.

Okwa indile aagundjuka ya kale kokule niikolitha yo yi itule mo melongo oshoka olyo oshipatululo shonkalamwenyo. 

“Ondahala ombepo ndjino yomalugodhi yi iteyela momukunda muka yi mone ehulilo, aanona yaagundjuka taya kondjo noku monithathana iiponga pomahala gomanwino oshowo aantu taya lundilathana iipolopolo yowala, yakwetu yandeni oombepo dholuhoko ndhono tadhi teyapo oshigwana,” Kautwima ta tsikileko.

Selma Kambangula okwali a hogololwa a ninge amushanga omanga Thomas Nampala na Jason Iilonga oyo ookomitiye na Ndilimeke  Mulike oye omukalekipo gombili nelandulathano momukunda moka. Ayehe mbano oya li ya hogololwa esiku olyo tuu ndyoka.  Oshoka anuwa omukunda nguno ogwa kala owala guli ku go gwene manga tatekulu Kautwima inaa hogololwa a ninge omukalelipo gomukunda ngu.

Okwa indile kehe ngono te ki iyadha ena uupyakadhi ngele ita vulu ku adha kegumbo lye na kale a lopota ku gumwe gomookomitie nenge kaapolisi yomomukunda, yo ya vule ya kandulepo uupyakadhi mboka meendelelo.

Kautwima okwa kumagidha woo aanamukunda gwe opo ya simaneke uushiinda, ye te ya lombwele ya pangelwe kombili. “Yandeni oku kala niilwitho oshoka otamu monithathana owala iiponga esiku nesiku ne tamu kala hamu lesha oompango dhoshilongo,” ta tsikileko nga. 

Thomas Nampala okwali a pandula aanamukunda sho yali ya gongala nawa nomombepo yuumwainathana na inapu holoka nande omangwandjulathano.

LEAVE A REPLY

Please enter your comment!
Please enter your name here