Omushangwa kombinga yaMISA

0
163

Oshifonkundana oshimwameme shaNew Era osha li sha nyola omadhiladhilo gopakudhinda Etiyali oshiwike shika, naampaka otapa landula oshitothwamo shimwe shomoshinyolwa shoka. Otatu ga nyola omolwuuwanawa waaleshi ya Kundana. Na ishewe otatu ga nyola moshifo shika molwashoka oshinyolwa shoka tashi yamukulwa osha li sha shongo noku ula nayi Kundana kutya anuwa ye oshifo shoku taandeleka omitoto kaantu yokuumbangalantu, yokolundume nenge yokonooli yoshilongo molwashoka nuumvo omumvo gwomahogololo goshigongi shopashigwana nomuperesidende. Omushangelo ngoka otagu pukitha na ogwo eponokelo li na sha kohi okuluudhika nokushundula ondhilo nomutalelo gwa Kundana. Oshinyolwa  sha New Era etiyali osha nyolwa okupopila Kundana keponokelo ndika lyaana omakankameno nando oga sha.

Omushangelo ngoka inaa gu kankamekelwa nando okuumbangi wopamapekaapeko gomuule ogwa li gwa nyanyangidhwa moshifo sho The Namibian no gu  ne kwatathano nehangano ndyoka andola li na omutumbo nondhilo yaana okapethili kasha  ngaashi ndika lyo Media Institute of Southern Africa (MISA). Omushango ngoka ogwa nyanyangidhilwe komeho gedhimbuluko lyesiku lyEmanguluko lyiikundaneki mUuyuni ha li dhimbulukiwa aluhe mesiku etitatu lya Mai omumvo kehe.

Ookomenda ndhoka odha koleke omutalelo neitaalo kutya nani MISA ina toya natango ongo ehangano lyiikundaneki lyoshili na otali vulu oku inekelwa moku kalela po uuwanawa womahangano agehe omakundaneki ngoka geli kohi yalyo ngaashi ndika lya kala noku shi itangela.Ihe osha fa omutalelo neitango ndika lya tameke oku hanagukapo unene tuu oku shi talela moshishangomwa shoka shaana uumbangi hoka sha thikamekelwa na osha fa ashike omaiyuvo gomushangi mwene, ga nyolwa ongo ontalelo yaanawino.

Ehangano lyaNew Era Publication Corporation (NEPC) niifonkunda yalyo ohali na otali tsikile noku itala ongo oshilyo shezimo lyiikundaneki ngaashi lya kala noku pandula iilonga mbyoka MISA a longa moku ulikila aatoolinkundana nkene ye na okulonga paithano. Omolwashika kapena esiku NEPC a yamukulile omagandjo goombedhi nokusimononwa okundji hoka kwa kala noku holoka kwa ukithwa kuye nokiinyanyangidhwa ye, olundji okwa tala okusimononwa huka noku gunwa huka ongo okugunwa kopaukuume noko pa ithano, kwa ningwa mombepo ombwanawa okuza kehangano lyiikundaneki lyaanokapethili.

Ihe ngele omuntu owa tala kwaashoka sha nyolwa ku MISA oshiwike shika , nena oto kumwa ngele oshi li tuu nawa oku kala neinekelo muMISA, nenge ngele ehangano ndyoka otali vulu tuu okugandja omwiityo gwopaithano mokati kaatoolinkundana moshilongo muka?

Nenge MISA okwa hala oku tameka oompata kombinga yekalepo lya NEPC niinynyangidhwa ye konima yomimvo, 20 nenge konima sho pwa holoka Kundana ngoka avalwa moshinakugwanithwa sha NEPC. Shika shoku gandja noku andjaganeka uuyelele womondjila na inaawu gama ombinga, moku nyola noku nyanyangidha oshifonkunda sho Shiingilisa noshowo momalaka gaavalelwamo moshilongo. 

Kapena esiku MISA a li e na eitulemo okupula kutya NEPC okwa ya sigo openi moku gwanithapo oshipewa she shoka unene tuu kombinga yomalaka gaavalelwamo.

Tse po NEPC otatu zimine kutya inatu longa nawa oku yambulapo omalaka gaavalelwamo. Naashika oshinima shoka twa ndhindhilike konima yethimbo naashika osha eta pevalo lya Kundana. Epulo oondika oshike tashi landulako?

Oshikwawo aaleshi ya Kundana’ oya kala noku lesha oshifo shika okuza tuu kesiku lyotango shika sha pitile osigo onena ndjika , nomwaalu gwaaleshi ye otagu indjipala kehe esiku, hamolwashoka shika hashi shanga omahokololo nenge shili oshi taandeleki shomutoto gwopapolitika ihe shika otaye shi ningi molwashoka  oya pandula oshinyolwa shoka sha holoka melaka ndyoka yo yu uvite oshipu okulesha.Lyo enyanyangidho lyasho olili oshitopolwa shoshinakugwanithwa shoveta ndjoka ya thikamekapo New Era Publication Corporation: oku kundaneka kiiningwanima yi na sha noshigwana yo ishewe oya simana kaakalimo yokomikunda.Oshowo otashi kundaneke kiiningwanima yopashigwana, naambyoka ya pamba iilonga nomayakulo gepangelo.

LEAVE A REPLY

Please enter your comment!
Please enter your name here