A tsuwa konyati pOnangama

0
433

KuLoide Jason 

ONGENGA – Omulumentu gwomimvo 46, gwomomukunda  Onangama moshikandjohogololo Ongenga moshitopolwa Ohangwena okwa tambelwa moombete moshipangelo Engela a ningwa iilalo konyati ndjoka ye mu ponokele oshiwike sha yi.

Fritz Iyambo okwa hupu nonando okwa ehamekwa komagulu noshowo okuna ombati yimwe yokolumoho ya teka  na ota pewa epango monaasalesa yaNgela moka aapangi noondohotola yati onkalo ye oyili hwepo.

Iyambo okwa ti okwa ponokelwa noku ehamekwa unene, konima sho aalumentu yaali ye ya  pokandingosho ke noku mu lombwela kutya  oshinamwenyo kaaye shishi sha fa ongombe yonkani.

 “Otwa tokola tu ke shi tale nawa ngele pamwe ongombe nenge pamwe oshiyamakuti. 

Omanga ashike tatu thiki popepi niihwa mpoka aantu yalwe ya li ye shi mono mbala. Ihe ngame shi ndeke yi mona, oya ponokela ndje nale,” Iyambo a ti.

Okwa ti oku na uuwehame molwashoka oshinamwenyo shika oshe mu thanga unene iikando oyindji montulo.

 “Onyati oya yeluthile ndje mombanda, ya kwata pokati komagulu gandje, ngame sho nda gwile pevi yo  otayi lyata ndje iikando oyindji montulo, onda li tandi ehama noonkondo unene tuu ya tsu ndje,’ Iyambo a ti.

Iyambo okwa hokolola ndhika omanga a li moombete moshipangelo Engela oshiwike shayi.

Onyati oya li wo ya ponokele  Nikanor Nghinaundafako ngoka wo a hupu  inaa ehamekwa nando osha, okwa ti ndjika oya ponokele wo omukiintu gumwe omukulupe ngoka na ye inaa ehamekwa, ndele oye mu pumu ashike ye ti ihatapo.

Nghinaundafako okwa ti okuza mokuponokelwa konyati ndjoka okwa kala ihaa kotha nawa, okwa kala ashike ta yaguma onyati oshoka okwa uva omahokololo kutya aniwa ihayi ende oyo awike.

 “Otwa tila oshoka katu shiwo ngele oya li tayi ende oyo ayike nenge pamwe oya puka moonkwawo tashi vulika dhili popepi nomukunda gwetu, oshinamwenyo oshi tilithi na osha nika oshiponga,” osho a ulike.

Iyambo oku na aanona yane na okwa kala momukunda ngoka konyala omimvo omulongo ndele ina mona nando onale onyati monkalamwenyo ye.

Omutakamithi gwiinamwenyo nomakuti mOhangwena, Martin Herman okwa ti yo oya li ya tseyithilwa kopolisi kombinga yaashika ihe sho ya ka thika hoka oya adha nale oshikwakuti shoka sha dhipagwa kopolisi.

Okwa ti oshinamwenyo shoka oshikadhi shopokati shoka taya dhiladhila kutya osha zi ngiika koAngola.

 “Otwa tokola okugandja onyama ndjoka kumwene gwomukunda eyi topolele aantu ye oshoka sho twa konakona oshinamwenyo shoka inatu mona sha tashi ulike kutya onyati yasho itayi vulu oku liwa,” osho Herman a ti.

 “Itatu ti oshinamwenyo shoka otashi ehama, oshoka otwa kuthako uupambu wonyama noku yi konakona, ishewe itatu ti oshili nawa shina uundjolowele wiigwanapo,” osho a tsikileko.

Okwa ti otaya dhiladhila kutya  onyati ndjika oya zi moAngola oshoka momahala guushitwe ga Namibia kombinga ndjika ka kuna oonyati.

 “Oya li onyati yonzinzi ndjoka tatu fekele ya kana oonkwawo, onkene osho she yi monikitha yili oyo ayike oshoka pakukala iinamwenyo mbika iha yi iyendele, osha pumba oku adha onyati tayi ende oyo ayike,’ osho a fatulula

Omupopiliko gwopolisi mOhangwena, Sergeant Abner Kaume Iitumba, okwa ti oshikwakuti shika osha holokele puundingosho Etiyali oshiwike shayi  noku ponokela mboka ya li pondje yuundingosho.

Onyati oya fadhukapo naakalimo oye yi tidha noku yi kondeka sigo oosho opolisi ya thiki noku yi dhipaga.

LEAVE A REPLY

Please enter your comment!
Please enter your name here