Uupika womalovu takamitha okuyoga mekende oshoka oto silemo

0
334

KuClemence Tashaya

EENHANA –Kuume kandje gumwe gwopothingo okwa li onkolwe onene nongashingeyi opo ta godhipukwa okuza muunkolwevu. Okwa li nale iikando iyali momahala gezulonkalo opo a thigepo uupika wiikolitha. 

Okwa li a thigipo ehala lyezulonkalo ku ye mwene konima sho a mono kutya aahungimwenyo pehala ndyoka kaya li ye na ontseyo kutya naya ninge ngiini naye.

Okwa tamekele okunwa omalovu okathimbo okafupi kowala nokwa ningine muupika wago meendelelo. Okwa gwile muupika wiikolitha konima sho a tidhea moUnited Kingdom hoka a li ti ilongo. Okwa tidhwamo moshilongo shoka omolwa eyono ndyoka ye a ti ineli  ninga. Okwa li pehala lyapuka nonaantu yapuka. Oku gwila muupika womalovu okwe mu yakele okaendanampadhi sha fa ashike omuntu ta thenunukile menono. 

Onakuyiwa ye kaya li yomupika gwomalovu andola. Ihe okwa gwile muupika mbuka konima sho a tameke oku idhengamo mombiila okukuthapo uuza noshowo okutidhapo ezaza, konima yokathimbo okwa mono kutya iha vulu we oku yalula kutya okwa nwine omakende gangapi.

Okwa ka tameka ta nu omakende ngoka omalulu nohaluka okwa ninga omupika gwiikolitha. 

Okwa li nokuli omunongontu sigo omutenya ngu, omuntu ngoka ha lesha, he shi ningi ha molwashoka taka nyola ekonakono, naashika osha kumitha nokutya omolwashike iiyethele muupika womalovu.

Okwa ti oku manguluka muupika wiikolitha kashishi oshipu ngaashi omambo gokwiikwatha gamwe taga ulike.

Pethimbo a li eethapo iikolitha lwotango noku ya kendiki lyezulonkalo lyoonkolwevu, okwa li a monika nemwamwelo lyeetwa koluhodhi ndoka lwa zi ngiika moku tidhwa koUnited Kingdom hoka a li ti ilongele.

Konima ashike yemanguluko muupika nomoonkandja dhomalovu, okwa gwile ishewe menono lyekende.   

Darikayi Burutsa, omuhungimwenyo mOhangwena ngoka a longele nale nehangano lyoonkolwevu okwa ti uupika womalovu ohawu adha mboka ya thiminikwa koonkalo oondhigu moka yo yi iyadha.

 “Oyendji yomwaamboka nda tsakaneke oya li aantu itoo dhiladhila kutya ona ya ka pikwa kiikolitha, ndele omathimbo omadhigu oge ya kuthamo mondjila ombwanawa noku ya undulila menono lyiikolitha.

Oya ehamekwa konkalo onkene iikolitha nenge iingangamithi oyo ondjila ompu oku yanda onkalo yawo,” osho a fatulula.

 “Oshigwana ohashi talako aapika yomalovu ongo mboka ya puguma mondjila naamboka oya hogolola ondjila ndjoka kuyo yene, ihe uuna wa kala nayo ethimbo opo to uvuko onkalo yawo nomolwashike yo taya nyengwa oku yandukamo montompo yiikolitha ndjoka tayi thenunuka kashona nakashona ye yuukitha muule wayo. 

Opo ihe oto ndhindhilike kutya nayo oya li owala ye ku fa ya pama pevi kutya ka ye na siku naatulwa pevi kekende lyomalovu. 

A ti ngele omafamilia gawo nokuume oye ya uvuko nawa nena ngiika ando otashi kala oshipu kuyo okumanguluka momalyenge giikolitha,” Burutsa a ti.

Manga nda li tandi popi nomuniilonga omukwetu ngoka a li omupika gwiikolitha, Michael Johannes, omulongisikola moshikandjohogololo Epembe mOhangwena okwa ti  ha oonkolwevu adhihe dha pikwa kiikolitha molwashoka odha li aantu yaana elandulathano.

“Omulongwa omukwetu nale nguka okwa gwile menono lyokunwa konima sho a kuthwa mosikola nokwa dhiladhila kutya shika osheeta oondjodhi dhe pehulilo. 

Olundji aalongi naakuluntu otaye ku lombwele kutya  ino etha okulandula oondjodhi dhoye, ihe oonkondo dhetu dhokomwenyo ohashi vulika dhi tu ethele eshololo. 

Kuume kandje nguka okwa gwile momwigo gwokunwa elovu nokuhila epangwe oshoka efamilia lye inali mu pa eyambidhidho lyasha. 

Aalongwa ooyakwawo nale nayo ina ye mu kwatha sha.

Francis Kambata otati ita ya ka tseya  kutya ngele andola oye mu kwathele ngiika andola onkalo oya kala ya yooloka kwaandjika yo ngashingeyi.  

“Itandi no kandi shiwo kutya ombedhi oyina oku pewa lye, onkene tse katuna okupewa uusama kwaashoka shaningwapo,’.

Ihe Helena Hamutumbungela, omulandithi pombaa ya  Friends Bar and Restaurant mEenhana okwa itaala kutya onkalamwnenyo yomuntu kehe oyi li miikaha yomuntu mwene, na osha nika uunkundi oku pa ookuume oombedhi sho inaa ye ku yambidhidha opo wu ethepo iikolitha..

“Ngele otwa tegeleIa ookuume nooamilia dhi tu kwathele opo tu yande okulongitha iikolitha nena ando uuyuni otawu kala wu udha oonkolwevu.

Oshoka oyendji mboka ya gwile muupikwa wiikolitha oye shi ningi molwashoka oyena uumbaanda okutaalela oshili yonkalamwenyo moka yeli mo ethimbo ndyoka. Atuheni ohatu adhika komaudhigu nomashongo ihe ihatu longitha iikolitha nenge iingangamithi okufadhukapo ngoka,’ osho Hamutumbangela a ulike.

Olundji oonkolwevu ohadhi iipopile kutya odha pikililwa kiikolitha kutya ngaaka oshidhigu oku fadhukapo nenge okusinda uupika mboka. 

Olundji oha ya ti ngele oyeethapo iikolitha nena itaya ka vula oku ya komeho noonkalamwenyo dhawo.

Omundohotola George Kapa moshipangelo mEenhana okwa ti shoka kashishi sho shili nando nando.  “Kehe omuntu ota vulu oku ethapo elongitho lyomalovu ngele oya tokola oku landula oonkatu ndhoka dhilipo.

LEAVE A REPLY

Please enter your comment!
Please enter your name here