Aagundjuka yomOshikoto ya tyapula esiku lyawo

0
211

KuMaria Namupala

ONIIPA –Aagundjuka ya hangana mbono ya hogololwa okuza kiikandjohogololo yomoshitopolwa Oshikoto oya tyapula esiku lyawo ndyono hali dhimbulukwa aluhe omumvo kehe.

Konyala kehe oshikandjohogololo mOshikoto osha li sha tuma aagundjuka ya adha pomulongo. Nonuumvo esiku ndika olya tyapulilwa mOniipa Osoondaha ya ziko. Aagundjuka oyendji oyali ya holoka opo ya itunge noku tula uukuni kumwe.

Pethimbo ta popitha aagundjuka mesiku lyawo Omupevi Minista Guuyuki, Tommy Nambahu okwe ya indile ya longe nuudhiginini noku yambulapo oonkalamwenyo dhawo. “Ina mu kala ashike mwa tega epangelo li mu etele iilonga kongeni oompito noku totapo oongeshefa dheni yene ne tamu kala aagundjuka muna ongushu nota mu eta sha momikunda nomomidhingoloko dheni,” Nambahu ta ti.

Okwa indile woo aagundjuka yi ikaleke kokule nomalovu oshoka otaga teyapo oshigwana. “Yandeni iikolitha ka yina sho tayi tungu otayi teyapo owala omitima dheni, kaleni noku simaneka aakuluntu yeni oshoka okwa tiwa Simaneka ho na nyoko opo wu kale nelago nomwenyo omule kombanda yevi ne ta mu kala aagundjuka muna etiloKalunga,” Nambahu ta gwedha ko.

Esiku ndyoka aagundjuka oyali taya kundathana noku nyanyukilwa pamwe. 

Oyendji ohaya ningi iigongi kiikandjohogololo yawo opo ya paathane omayele nkene yena oku eta noku humithakomeho iitopolwa yawo.

Aagundjuka mbaka oyena edhiladhilo opo ya totepo oproyeka yoshikunino , taya kala taye yi longo opo ya monemo sha shokuyambulapo oonkalamwenyo dhawo. Elalakano oku kwathela ngaa unene mba ihaya longo noku totapo oompito dhiilonga momikunda nomomidhingoloko. 

Martinus Kainda Elias aza ko Quinas okwa tsu aagundjuka omukumo ya longe nuudhiginini, yo ya kondjithe onkalo yoluhepo ndjono ya taalela epipi egundjuka . 

“Yandeni oku kala momapandaanda noku yakula aantu uundjato, ilongeleni kune yene oshoka one oongudhi dhoshilongo shika no tamu kala noku simaneka oonkuluhedhi nomithigululwakalo dhookuku,” Nainda ta ti nga .

LEAVE A REPLY

Please enter your comment!
Please enter your name here