Iilyo yoRDP inayi dhengwa kOswapo Erriki Endjala

0
290

KuLoide Jason 

ONGWEDIVA-Omukwatakanithi gwongundu yoSwapo moMusati, Erriki Endjala okwa ekelehi omulombo ngoka gwashangwa miikundaneki kutya oye a tuma iilyo yoSwapo yi ka lwithe Iilyo yongundu yoRDP mbyoka yali ya longekidha oshigongi shawo anuwa momuti guna epandela lyoSwapo kOntimbu mOutapi .

Endjala okwa lombwele Kundana kutya ye ethimbo lyoshiningwanima kali mo moshitopolwa okwa li Groofontein, kwali kuna oshigongi.

“Ehokololo ndyoka ndishi olya yooloka noonkondo kwaandyoka lyashangwa moshifo shoNamibian Sun ndyoka tali ti kutya  iilyo mbyoka yaRDP oyali ya dhengwa nomamanya kiilyo yoSwapo sho ya ningile oshigongi shawo mOutapi,” Endjala ati.

Okwa yelitha woo kutya iipotha mbyoka ya patululwa oya patululilwa aantu yo yene kashishi medhina lyaSwapo.

Endjala okwati mboka taya ti kutya oye a tuma aantu mboka oye mu lundila noonkondo oshoka ye kena ombepo ndjoka yo ku ningila aantu omuyonena. Omuhwahwameki nguka okwa ti uuyelele mbu a uva iilyo yo RDP oya hinda oshoka oya tukana na okwali tayi kambadhala anuwa okuthaneka aantu yomOntimbu mboka ya li ta te ya tale. 

Shika osha etitha omananathano pokati kayo naakwashigwana na oya tameke okuumbathana nomamanya.

Okwa hokolola kutya mboka oya ka ningila oshigongi momuti ngoka ye shishi lela nawa aluhe ogo hagu ningilwa iigongi yaSwapo na omu na epandela enenenene lyoSwapo, ihe oya tokola opo ya ye mo nelalakano lyo kutula ko woo epandela lyawo.

Ashike Omukwatakanithi gwongundu yo RDP mOshitukulwa shaMusati Immanuel Shikongo okwa lya ta ompadhi pevi kokutya aayambidhidhi yoSwapo oyo ya hindi iilyo yo RDP. 

Shikongo ta ti Swapo haye awike e na iilyo mOmusati, nenge e na uuthemba oku kala ena iilyo mOmusati nokuningila iigongo mOmusati. 

“Ngashingeyi nokuli ota tu kundathana nota tu longekidha oshigongi shoka tatu kakala tu na mOmusati mehuliloshiwike tuuka,” Shikongo ta ti. 

Ookatelekonawa oya lombwele Kundana kutya iilyo yaRDP  oya hinda sho ya ka ningila oshigongi nokukambadhala okutulika epandela lyoRDP momuti ngoka guna epandela  lyoSwapo omanga puna omiti omikwawo kaadhina omapandela. 

Nashono ya mono aantu tate ya tale nawa nonkumwe oya tameke okutukana nokuthaneka aantu mboka ya li ta ye ya tale. Okwa hokololwa kutya anuwa iilyo yongundu tayi pangele oya pula iilyo yongundu yompilameno kutya oya yi ya thanekele shike na oya londodha opo ya thige po omuti ngoka ya hogolola nale okuningila iigongi yawo ashike oya tinda. Shika shoka sha etitha eipumomumwe.

Opolisi oya zimine kutya opwali pena iikolokosha mbyoka ya etitha opo aantu yamwe ya ehamekwe na omuntu gumwe okwa kwatwa po shinasha noshiningwanima shika. 

Omufekelwa okwa holoka nale mOmphangulilo yamangestalata mOutapi. 

LEAVE A REPLY

Please enter your comment!
Please enter your name here